Leevi 15:1-18

¹Ɠɔoɠɔ GALAGI ɓɔɛni Moize ta Aalɔn ʋɔ, é ɠɛ ti ma:

²«À ɓɔɛ Izelayɛle nuiti pɔ, wo ɠɛ ti ma: Zunu nɔpɛ kalaɲa kolegi ba, kɔzɔʋɛ naa maaʋele ma.

³Ná-kalaɲa kolegi maaʋele ɠa kɔzɔai la, é ɠɛni ɠulazu kpusɛi ʋa, ɓaa suzo pa de, kɔzɔʋɛ.

⁴Bete nɔpɛ a la su, naa ɠɔzɔʋɛ, ta ani nɔpɛ a zei ma, naa ɠa ɠɔzɔ.

⁵Zɔi a vɔɔɠu ná-betei ʋa, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

⁶Zɔi a zeina ani ma, niigi é ɠɛa zeini ma, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

⁷Zɔi a vɔɔɠu kpusɛi ʋa, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

⁸A laaɗɛi ʋuuna nu ma, nii ɲadegai, kɛni naa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

⁹Seima ani nɔpɛ a zei ma togani ɠɔma, naa ɠa ɠɔzɔ.

¹⁰Zɔi a vɔɔɠu ani nɔpɛ ba, nii é ɠɛa tɔun bu, naa ɠɔzɔai ɠa yɛ de, eyɛsu kpɔkɔi. Zɔi a naama anii ta zeɠena, kɛni é ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

¹¹Nu-o-nu nii kalaɲa kolegi ba, é la yeagbani, a vɔɔɠuna nu ʋa, kɛni naama nui ná-seɠeiti gba, é maagba. Kɔzɔai ɠa yɛ de, eyɛsu kpɔkɔi.

¹²Pɔlɔ liɠii kpein tɔun ka vɔɔɠuna ba, kɛni naa wolo, gulu aniɲakai kpein ka gba ziɛi wu.

¹³«Siɛgi zu ná-kalaɲa kolegi a ɓena la, toɠa folo lɔfela ɠaalu ná-ɲade fai zu, é ná-seɠeiti gba, é maagba ga ziɛungi zu ɗɛi. Naa ʋolu toɠa ɲade.

¹⁴Folo lɔsaʋasiɛi ma, toɠa kpumago felegɔ zeɠe, ɓaa poopo kpokpa felegɔ, é li Ɠɔoɠɔ GALAGI ɠakala, GALA daaɠomi seɠe ʋɛlɛi laaʋɛ, é ti ve zalaɠa ɠula nui ya.

¹⁵Naa ɠa gilagi ɠɛ ga koto gba zalaɠai, é zɔi ɠɛ ga gala zalaɠai, é koto gba vai ɠɛ tɔun bɛ Ɠɔoɠɔ GALAGI ɠaazu, ná-kalaɲa kolegi vaa zu.

¹⁶«Zunui nii maaɠoloɠolosu, kɛni é ɓusɛi kpein gba. Kɔzɔai ɠa yɛ de, eyɛsu kpɔkɔi.

¹⁷Seɠei kpein, ta kɔlɔi kpein a ʋu ti ma, naati ta gba ziɛi wu. Ti ɠɔzɔai ɠa yɛ de, eyɛsu kpɔkɔi.

¹⁸«Ni zunui ta anzanui ta laana, ta maagba ti ɠilagilagi. Ti ɠɔzɔai ɠa yɛ de, eyɛsu kpɔkɔi.