Leevi 14:29-53

²⁹Zalaɠa ɠula nui ɠa gulɔi mɔtai zeɠe, zɛgai zea, é siɛ naa nɔungi ma, nii é ɓɔɠɔ ɲadesu, naa ɠa a kɛ é koto gba vai ɠɛ tɔun bɛ Ɠɔoɠɔ GALAGI ɠaazu.

³⁰Naa ʋolu toɠa kpumagoiti gila kula ga zalaɠai, ɓaa poopo kpokpagiti gila, nii é zooga é sɔlɔɔ,

³¹gilagi ɠa ɠɛ ga koto gba zalaɠai, zɔi ɠɛ ga gala zalaɠai, é ʋɛɛ vebɛanii ʋa. Zalaɠa ɠula nui ɠa koto gba vai ɠɛ Ɠɔoɠɔ GALAGI ɠaazu, naama nui ʋɛ, nii é ɓɔɠɔ ɲadesu.»

³²Ɲadedai ma lɔgi ɠana, naama nui vaa zu, nii kulama zeeɓɛi ba, tama sɔlɔɔgiti ti la kula ɠɛa su.

³³Ɠɔoɠɔ GALAGI ɓɔɛni Moize ʋɔ ta Aalɔn, é ɠɛ ti ma:

³⁴«Siɛgi zu wo lɔɔzu la Kanaan yooi zu, nii gè feezu wo ya ga wɔnɔ, ni nà fuinfuingi ʋɛɛna pɛlɛi ta ʋa, zooi zu wo sɔlɔɔsu,

³⁵zɔi nɔnɔ ga pɛlɛi, naa ɠa li, é daazeeli zalaɠa ɠula nui ma, é ɠɛ ma: ‹Nà fuinfuingi ʋogi ʋɛtɛsu nà-pɛlɛi ʋa.›

³⁶Aisa zalaɠa ɠula nui ʋa lɛ, é ʋa ná ɠɛʋele ʋɛtɛ, toɠa devei ve ga ti pɛlɛi zuwo, naa ɠa a kɛ, bu anii pɛ ge mina leve ga ti ɠɔzɔʋɛ. Naa ʋoluma zalaɠa ɠula nui ɠa lɛ pɛlɛi wu, é ná ɠɛʋele ʋɛtɛ.

³⁷«Toɠa fuinfuingi ʋogi ɠɛʋele ʋɛtɛ. Ni a kaana ga naa ʋogi ɠa pɛlɛi ʋa ga zeɠezeɠegiti suɓeingai, ɓaa ti maaɓɔikpɔigai, ti wɔai pɛlɛi zu suɠooza,

³⁸toɠa ɠula pɛlɛi wu, é lo daaʋɛ, é daaɠulu, é kɛ ga folo lɔfela.

³⁹Zalaɠa ɠula nui ɠa ɠale ma ná, foloi lɔfelasiɛi ma. Ni a kaana ga fuinfuingi ʋogi vazagɛ pɛlɛi ma,

⁴⁰toɠa deve ga ti kɔtui naati kula ná, niiti ti vuinfuingai, ti ti ʋili ya ti-ʋuuzuʋɛ ʋoluʋɛ, ada ɠɔzɔai ta.

⁴¹Toɠa pɛlɛ ɠoozuʋɛ kpein fɔin, fufiligi kpein ti kpalesu, ta naa ʋili ya ti-ʋuuzuʋɛ ʋoluʋɛ, ada ɠɔzɔai ta.

⁴²Ta kɔtuiti maaleʋe ga ma niinɛ ɠiligaa, ti pɔlɔi zeɠe, ti pɛlɛi ziɛ.

⁴³«Ni fuinfuingi ʋogi a ɠaaɠalena ma, é ɠula pɛlɛ ɠoozuʋɛ ma, kɔtuiti kulaa ʋoluma ná, maavɔin, ta pɛlɛi ziɛ ʋolu,

⁴⁴zalaɠa ɠula nui ɠa ɠale ma ná ʋolu. Ni a kaana ga fuinfuingi ʋogi vazagɛ pɛlɛ ɠoozuʋɛ, fuinfuingi ʋe, é sumiizu. Pɛlɛi ɠɔzɔʋɛ.

⁴⁵Ta pɛlɛi wolo, ti ma ɠɔtuiti seɠe, ta guluiti, ta siɛ ʋɔlɔiti kpein, ti li ga tiye ti-ʋuuzuʋɛ ʋoluʋɛ, ada ɠɔzɔai ta.

⁴⁶Zɔi a lɛ pɛlɛi wu, siɛgi kpein su daaɠulugai la, naa ɠa ɠɔzɔ eyɛsu kpɔkɔi.

⁴⁷Zɔi a ɠɛ laani pɛlɛi naa wu, naa ɠa ná-seɠeiti gba. Zɔi a laamiina pɛlɛi naa wu, naa ɓalaa ɠa ná-seɠeiti gba.

⁴⁸«Ni zalaɠa ɠula nui nii é ɠalegai ma pɛlɛi wu, naa a kaana ga fuinfuingi ʋogi la vazani, pɛlɛi ziaa ʋoluma, toɠa dɛɛ ga pɛlɛi ɲadegɛ, mazɔlɔɔ fuinfuingi ɓega.

⁴⁹Pɛlɛi ɲade fai zu, toɠa wɔni felegɔ zeɠe, ta sɛdele gulu ɓuɠai, ta geze ɓɔi sɔsɔgi ta ɠizɔɔpe tufa ɓifɔgi.

⁵⁰Toɠa wɔni gila kɔdaaleʋe pɔlɔ liɠii maazu, daavegai ga ziɛungi zu ɗɛi.

⁵¹Toɠa sɛdele gulu ɓuɠai zeɠe, ta ɠizɔɔpe tufa ɓifɔgi, ta geze ɓɔi sɔsɔgi, ta wɔni vului, é ti lɔ wɔni ɠɔdaaleʋeai ma ɲamai wu, é faza daa ɠɛ lɔfela pɛlɛi wu.

⁵²Zekana a pɛlɛi ɲade da, ga wɔnii ma ɲamai, é ʋɛɛ ziɛungi zu ɗɛi ʋa, ta wɔni vului, naa ʋɛɛ sɛdele gulu ɓuɠai ta ɠizɔɔpe tufa ɓifɔgi ʋa, ta geze ɓɔi sɔsɔgi.

⁵³Toɠa yeeɓe wɔni vului ʋa, é li ti-ʋuuzuʋɛ ʋoluʋɛ, dɔɓɔi zu. Zekana a koto gba vai ɠɛ la pɛlɛi ʋɛ. Pɛlɛi ɠa ɲade.»