Labidakas 23:4-9

⁴Yu garra dalimbat olabat wen det rait taim blanga dislot serramoni.”

⁵Wal YAWEI bin kipgon tok, “Wal det Pasoba Serramoni im blanga jinggabat langa mi na YAWEI, en im garra stat sangodantaim langa det namba 14 dei langa det feswan manth.

⁶En langa det namba 15 dei, det speshalwan serramoni gulum Damba Nomo Garram Raising garra stat, en langa det 7 dei na yumob nomo lau blanga dagat eni damba garram raising.

⁷En langa det feswan dei yumob garra majurrumap miselp blanga weship en yumob nomo lau dum eni wek.

⁸Yumob garra gibit detlot ofring langa mi fo 7 dei. Langa det namba 7 dei, yumob garra majurrumap miselp igin blanga weship, bat yumob nomo lau dum eni wek.”

⁹Wal YAWEI bin tok langa Mosis, “Wal wen yumob garra kaman langa det kantri weya ai garra gibit yumob, yumob garra growimap sambala sid daga. Wen yumob kadim detlot sid daga, yumob garra deigim detlot feswan sid daga langa det serramonimen.