Koloso 1:13-27

¹³Eŋ gêjam aêac sa aŋga ŋaclai ŋakesecŋa ma ketoc aêac daŋgôŋ ênê Latu, taŋ têtac gêwiŋ eŋ naŋ, nê gamêŋ.

¹⁴Ŋac tau tonaŋ kêgaboac aêac su ma kêsuc aêacnêŋ sec ôkwi.

¹⁵Ŋac tonaŋ gêjam Anôtô, taŋ talic eŋ atom naŋ laŋô. Eŋ kêtu gêŋ samob, taŋ Anôtô kêkêŋ naŋ ŋaŋacsêga,

¹⁶gebe Anôtô kêkêŋ gêŋ samob, taŋ gêc undambê to nom naŋ, ŋa eŋgeŋ, gêŋ taŋ mateŋanô talic to gêŋ, taŋ talic sapu naŋ, amboac gôliŋ to apômtaui ma ŋasêga to ŋaclai. Anôtô kêkêŋ gêŋ samob ŋa eŋgeŋ ma kêtu eŋŋa.

¹⁷Gêŋ samob tonaŋ ŋai masigeŋ, eŋ taugeŋ gêmoa gêmuŋ ma gêbiŋ gêŋ samob tôŋ kêpi tageŋ.

¹⁸Eŋ kêtu ôli ŋamôkêapac. Ma eŋ ôli tau gôlôac dabuŋ. Eŋ kêtu gêŋ samob ŋam. Eŋ kêtu lau, taŋ sêndi sa aŋga ŋacmatênêŋ naŋ, nêŋ ŋacsêga, gebe eŋ tau êtu gêŋ samob ŋaŋamata.

¹⁹Amboac tonaŋ Anôtô gêlic ŋajam gebe nê ŋanô ênam Latu auc samucgeŋ.

²⁰Anôtô kêkêŋ eŋ gê wama gêŋ samob gêdêŋ tau. Eŋ kêkêŋ Latu kêkêc nê dec siŋ aŋga kakesotau, tec kêkêŋ biŋmalô gêdêŋ gêŋ samob, taŋ sêmoa nom to undambê naŋ.

²¹Amac tec gêmuŋgeŋ amoa jaêc Anôtô. Ma biŋ, taŋ taêm gêjam to ŋakoleŋ sec, taŋ ajam naŋ, gêgôm amac atu ênê ŋacjo.

²²Mago galoc Kilisi gêmac êndu, tec gê wama amac gêdêŋ Anôtô. Eŋ gebe êmansaŋ amac atu dabuŋ ma akô Anôtô laŋônêm tolaŋômnêm sawa ma tobiŋ masigeŋ.

²³Tec akêŋ êwiŋ to apuc taôm tôŋ akô ŋajaŋa. Gêŋ teŋ êkac amac su aŋga ŋawae ŋajam, taŋ aŋô to akêŋ matem amoa naŋ atom. Sêjam mêtê ŋamalac samob, taŋ sêmoa umboŋ ŋalatu naŋ, ma aê, Paulu tauc, tec katu ŋawae ŋajam tau ŋasakiŋwaga.

²⁴Ma galoc gaôc ŋoc gêŋwapac totêtac ŋajamgeŋ kêtu amacŋa. Ŋandaŋ ŋagêdô, taŋ kêtap Kilisi sa atom, gacgeŋ gêc naŋ, janac dabi ŋ êpi tauc ôlic, jajô Kilisi su êtu eŋ ôliŋa. Ma eŋ ôli tau gôlôac dabuŋ.

²⁵Aê katu gôlôac dabuŋ nêŋ sakiŋwaga ma Anôtô kêkêŋ kôm tonec gêdêŋ aê gebe jawa ênê biŋ sa tomalageŋ êndêŋ amac.

²⁶Gêdêŋ andaŋgeŋ biŋ tau tonaŋ kêsiŋ tau gêdêŋ ŋamalac samob gêc lêlômgeŋ. Mago galoc kêtu awê gêdêŋ Anôtônê lau.

²⁷Anôtô gebe êwa sa êndêŋ nê lau gebe biŋ toŋawasi tolêlôm-tolêlôm, taŋ kêsiŋ tau gêc lêlômgeŋ naŋ, jakêtu awê gêdêŋ lau samuc. Biŋ ŋalêlômŋa tau tonec gebe Kilisi gêmoa gêwiŋ amac, tec akêŋ matem ênê ŋawasi.