Kolosi 1:13-27

¹³Ipikana꞉ma꞉ niki timba꞉ leke ekina꞉ honkopu pa꞉ta꞉ haoma꞉eki pa꞉ta꞉ pa꞉ta꞉la꞉ mea a꞉pa mo ipika꞉ Eiyekena꞉ kilu tumbuao hala꞉eki pa꞉ta꞉ hatuku epea꞉me.

¹⁴Ipikana꞉ma꞉ta꞉ niki ka꞉la꞉pa꞉ tapaala꞉me. Kotota꞉ nika꞉ hoke hau paeyawala꞉me laa loa꞉me.

¹⁵Ketisota꞉ mo na handa꞉peke Koda꞉ma꞉ handeke nono pa꞉la꞉ hali konee. Ipikita꞉ mupeke weki hata꞉ Koda꞉ma꞉ wa꞉pa꞉la꞉ ale paeyaota꞉ ipikana꞉ma꞉ lu tumbaala꞉me.

¹⁶Kutupa oli ya do kenke yaapo pa꞉ta꞉ handoloma꞉ ale pita꞉ na handoloma꞉ alemanu paeyao make mo wele wopupiki temokomanu make kini haliweki make kapomani haliweki make handeteke hala꞉ haliweki make paeyao tapaota꞉ Koda꞉ma꞉ Ketiso pa꞉ta꞉ yama꞉ wepiekeme. Koda꞉ma꞉ do ale paeyao Ketiso ipika꞉eki wina꞉e laa ipiki pa꞉ta꞉ yama꞉ wepiekeme.

¹⁷Ketisota꞉ ale paeyao a̱i̱ na wepiki haena꞉ kone pa hayekeme. Kutupa ipiki ame̱le̱ mo ale paeyao ika꞉ da panda꞉ mina꞉ la꞉la꞉me.

¹⁸Ipikita꞉ ipika꞉ lokena꞉ you halie. Mo siosina꞉ loa꞉me. Ipikita꞉ mo lokena꞉ da꞉ta꞉la꞉ ekina꞉ tekee. Ipikita꞉ mupeke weki hata꞉ homeekepate paa mea tiaeyeke ekita꞉ ipiki homeke mo ale paeyaona꞉ titina꞉ hali haena꞉yeke piekeme.

¹⁹Koda꞉ ipika꞉ hone pieke ekina꞉ kone mo Eiyeketa꞉ ota꞉ Koda꞉ ipikima꞉ kone handena꞉ leekeme.

²⁰Eiyeke pa꞉ta꞉ yama꞉ Koda꞉ma꞉ mo do kenkena꞉ oli ya nane ula꞉ alemanu paeyao paa la꞉ka꞉la ipiki ame̱le̱ a꞉pa ta꞉ma꞉ni pina꞉ hone wiekeme. Koda꞉ma꞉ a꞉nda꞉ peliayeke ekita꞉ ipika꞉ Eiyeketa꞉ a꞉ka꞉tei wape piki ti manda homena꞉ leeke ekima꞉ oli ya do kenke nane ula꞉ alemanu paeyao paa la꞉ka꞉la ipiki ame̱le̱ a꞉pa ta꞉ma꞉ni pina꞉ leekeme.

²¹Amba꞉ a꞉nda꞉ta꞉ ika꞉ pimi hoke hau manuma꞉ make wimi hoke hone manuma꞉ make ikita꞉ Koda꞉ teke pa꞉ta꞉ na hake ipika꞉ a꞉nda꞉ tunkuliki wanda꞉hali haememe.

²²Pate ameta꞉ ipika꞉ Eiyeke kenke hali tupa꞉ homa꞉la꞉ ekima꞉ta꞉ Koda꞉ma꞉ ikita꞉ ipika꞉ yankeke tonu hamena꞉ la꞉la꞉me. Ikita꞉ ipika꞉ leke popelekena꞉ eki a꞉nda꞉ na piki wanda꞉hali leke hake peao yako pealuekema꞉ pa꞉la꞉me.

²³Koto pa꞉la꞉pate ikana꞉ma꞉ta꞉ mo da̱o̱la pelia hala꞉ ekina꞉ hata꞉ honkopu hao kima꞉ na homeke pa putia pua꞉pa꞉peke. Kutupa ikita꞉ ika꞉ mo hande waloma꞉ Pi Seliapo opimi natena꞉ mimi hone ti laasemeeki pa꞉ta꞉ta꞉ aleta꞉ ma꞉nda꞉ma꞉ iki wato baena꞉ waleke na hala꞉pa꞉peke. I̱ Polota꞉ do Pi Seliapona꞉ pa hameke e pokaasa꞉ hali haowa꞉me. Do Pi Seliapota꞉ mo kenke honiki paeyao pa꞉ta꞉ haleme wanda꞉hali pa꞉ta꞉ wala꞉la꞉ pina꞉ loa꞉me.

²⁴Koto ekina꞉ ameta꞉ I̱ta꞉ mo ikina꞉ tanda minolo ekina꞉ ta꞉na꞉ma꞉ homolome. Yaka lokema꞉ tanda minolo ekita꞉ mo hande Ketisoma꞉ ipika꞉ loke mo siosina꞉eki peaaso mieke tanda putupiliki u pelia hala꞉ ekita꞉ I̱ma꞉ paeyaaluekema꞉ tamba꞉ minolo loa꞉me.

²⁵Kutupa Koda꞉ma꞉ I̱ta꞉ siosina꞉ pa hameke e pokaaso hali hano laa ipikana꞉ma꞉ dupiki e ika꞉ epeke hauna꞉ peano la꞉la꞉me. Do eta꞉ mo hande ipika꞉ pi anekema꞉ walawano ala꞉ekie.

²⁶Do pita꞉ amba꞉ hatia epemeke wanda꞉hali paeyao pa꞉ta꞉ta꞉ a꞉mbao wiekepate ameta꞉ ipika꞉ wanda꞉hali pa꞉ta꞉ peneme yaala꞉me.

²⁷Koda꞉na꞉ pulueke hone ula꞉ ekita꞉ ipika꞉ a꞉mbao ula꞉ ekita꞉ ipika꞉ wanda꞉halima꞉ hone wina꞉e hone wita꞉la꞉me. Do napeke wia seliapo piki a꞉mbao ula꞉ ekita꞉ paeyaoma꞉ hone wina꞉ ula꞉ ekina꞉ loa꞉me. Do a꞉mbao ula꞉ ekita꞉ Ketisota꞉ iki pa꞉ta꞉ hala꞉me. Koto ekina꞉ta꞉ ikita꞉ Koda꞉na꞉ pa̱a̱ pa꞉ta꞉ pua halimikie la ala꞉me.