Colosenses 1:13-27

¹³Gun Ñgyoozh bi bloo nap mi de ub na lugaar zeꞌ nu cow, zeꞌ nu riib ic nuras. Orzeꞌ ya num de ub na par lugaar zeꞌ nu riib ic Iꞌñ mi nu dzi rcam.

¹⁴Nu nac Iꞌñ mi zeꞌ bloo mbañ mi de ub na, nunu bicy sulagy mi dela cyi den.

¹⁵Ñgyoozh wac zac nam, tees gal nu na Ñgyoozh niꞌ ziꞌl na Crisht, biñ nu gac zac na. Orzeꞌ mi zeꞌ Iꞌñ logam, biñ nu gya zir zu par dela coz nu psaꞌ lagy Ñgyoozh.

¹⁶Par nu nac Iꞌñ mi zeꞌ psaꞌ lagy mi dela coz nu yuꞌ gyibaa, gal nu dela coz nu yuꞌ gyishlombecy ii. Laab nu nac Iꞌñ mi psaꞌ lagy mi de coz nu gac zac na, gal nu de coz nu wac zac na. Gazaꞌ de anc nu riib ic, gal nu de anc fert, par nu nac mi zeꞌ Ñgyoozh psaꞌ lagy mi dela de yu zeꞌ. Orzeꞌ Ñgyoozh psaꞌ lagy mi dela coz nu nac Iꞌñ mi, nunu psaꞌ lagy mi dela coz par Iꞌñ mi.

¹⁷Crisht nil zum nese anzir nu gruu zac dela coz, nunu par nu nac mi zeꞌ, dela coz yuꞌñ gal mod nu rlagy ñi.

¹⁸Dela mbecy ni Crisht na dey gal nu na tub cuerp. Zeꞌ Crisht nac mi too cuerp zeꞌ. Laab mi zeꞌ zum nese nu loga la. Nunu laab mi byabañ mi nu loga la ornu gut mi, gun orzeꞌ gya zir zum par dela coz.

¹⁹Gal nu na Ñgyoozh niꞌ ziꞌl na Jesucrisht, gun ndeꞌ coz nu rlagy mi.

²⁰Gun par nu nac Crisht, Ñgyoozh rlagy mi zu nap mi dela coz nu psaꞌ lagy mi, de coz nu yuꞌ gyishlombecy ii, gal nu de coz nu yuꞌ gyibaa. Gun orzeꞌ nap yuꞌ num dela coz par nu nac nu pshu reñ Jesuuz ornu pcam lo cruuz.

²¹Gulas de ru walab mbecy ni Ñgyoozh nac der, sinu guc der losaꞌ yuum nañ lardoor par nu nac de coz a̱ꞌ nap nu bicy der.

²²Tees na laab Ñgyoozh bicy mi nu nap yuꞌ nu der mi nu nac mod nu bzac Crisht ornu gut cuerp nim. Ni bicy mi, gun orzeꞌ gad mod nu gyechaꞌ der lom. Byac der mbecy nu bi zu chu par nu gac nim. Byac der mbecy cacy, mbecy nu sac falt ni.

²³Tees par nu ni ricy Ñgyoozh num de ru, orzeꞌ rlagy ñi nu gzu fert der nu nac de coz nu bi ricy cup der consuel lo. Orzeꞌ cueꞌ glaa yaa der de coz nu rgyish lo der lo, de coz nu guud ni der ornu güeñ ru de riidz nu sac ni Jesucrisht. De ndeꞌ riidz nu rdunii lo de mbecy dutuub la gyishlombecy. Nunu gaza̱ꞌ ya̱ Baly rlocyuuba̱ nu rshaala̱ de riidz zeꞌ.

²⁴Na ya̱ yet lagya̱ nu rzac zi̱ nu nac de ru, gun nil bi ca lo cuen nu tonaꞌ la gzac zi de mbecy. Na ya̱ rzac zi̱ nu cuerp la ne̱ gal nu bzac zi Crisht, gun orzeꞌ gaza̱ꞌ locyuuba̱ nu shuub laz ni de nu rzac zi de mbecy ni Crisht. Ya̱ rzac zi̱ nu nac de mbecy ni Crisht, de yu nu bi nac cuerp nim.

²⁵Orzeꞌ Ñgyoozh bicy mi nu gyicya̱ riiñ ni dela mbecy nim. Bduꞌm riiñ zeꞌ ya̱a̱ nu locyuuba̱ de ru. Zeꞌ riiñ zeꞌ, ndeꞌ nu rshaala̱ dela riidz nim.

²⁶Ya̱ rshaal nap la̱ de riidz nu rila wangad lagy de mbecy gulas. Tees na Ñgyoozh rbic mi nu gad lagy dela mbecy nim ni de riidz zeꞌ.

²⁷Orzeꞌ Ñgyoozh rlagy mi cuic mi nu gad lagy de mbecy tub coz ngach nim nu tonaꞌ la coz nap, nunu tonaꞌ la cyit. Coz ngach zeꞌ, ndeꞌ par dela mbecy mas yu nu walab mbecy Israeel. Coz ngach zeꞌ, ndeꞌ Crisht, biñ nu rcyiiñ nañ lardoo de ru. Orzeꞌ nu nac mi zeꞌ segur la gzac der lo de coz cyit na nu gad ni der par lo.