Kolesaga Koneai Bidigo Pusali Po Elalubo Buku 5:11-19

¹¹Te bidigo sabo mone ugaba holobaso da, teda te abagi hauwa asudu gebo sę elama, aga dali bidagasaibao. Tialima, te bidigo aga mone dabe elalubo suali, tiali goli agai aga doado bage abela usu meni yaibao.

¹²Te sę bidi dabe augwa bugagia hulide godege pibo dao, te augwaligo nai hauwa elaluali, ma te augwa nai sǫą paibaso me tagalao. Tialima, mone bidi da, te tiwai me egobeo. Agai aga te nai doado bage homu hauwa dogia pelama, tibaso aga godege bugagia me pigobeo.

¹³Eno suali, e tǫde dwai kolesaga mu me deli elalubao. Te kolesaga e tiwai dao. Bidi me deligo aga mena nai godolo homu mu aiyaba elaluama, te nai dabe me abeligobeo. Menio. Agai aga mone bugagia mu sabodu tonalubo dao.

¹⁴Tiali goli nosali, aga mone sabo sę yali bisnis tulaluama, tama aga mone tigidali te hagawaibao. Tialima, agade te nai me deli elalusiąma, te aga isibo si, teda aga ogwago sabo nai meni yaibao.

¹⁵Te idago da ame nani sogo, dago nai me deli meni yai elaluali. Dago tigi habu olo naga elaluali. Te tiwai naga, da isibo sogo, da olo naga mu paibao. Mu tama, dago te nai hauwa sabo sę dene yali, tiali goli dago te nai deli me sela pogobeo.

¹⁶Te me te dwai kolesaga mu elalubao. Da te tǫdu nai meni yai bage naga pedelali. Te tiwai naga dago te dago te tǫ tagalobo te tobage deli kolesaga naga yaibao. Te da tǫde bidibo sogo, da te odolali sę dene ebao, te bidi udulama, te wali nogogo tola sainu ebo tiwai ebo dao.

¹⁷Da e tǫde dugulalubo page te wiegi yai me elalubeo, te sesemane sogo dago haliga sęgę eyu, wado po weyu, gasi siyu, idubo dao.

¹⁸Eno te sęde homu koneama, tama eno koneani, te kolesaga me deli uga ela holai elalubao. Te kolesaga e tiwai da. Dago nai tuyu, ąį tuyu eyu, te dago tigidali naide sę dene yali te wiegi yai pemene eyu, te pęwadage sogo Godigo dabolo e tǫde bidimainu bodolu mani side dago te tama sę emainao. Magi baso meni. Godigo dago te sę emainu dąį ilai dao.

¹⁹Te Godigo bidi me deliba te mone hauwa menama, tama te bidi aga te nai dabede wiegi yai pemene emainu sula tagalali, te aga ebo sęde me, te sula tagalu, te bugagia dugulalubo me te bugai haliga ilibaso da, teda te wiegi yai da. Magi baso meni, te nai dabe te Godigo agabolo te wiegi yai homu pemene ilibo sę eyu, te bidibolo mabo dao.