Kolesaga Koneai Bidigo Pusali Po Elalubo Buku 3:1-6

¹Tigidali nai e tǫde pedelama elalubo, te aga bodolu muani sogode digi pedalu ebo dao. Awe, te tigidali haniani sę deli deli te dolo si kadu walio.

²Godigo bidi da e tǫde ame nabo sogo bodolu dąį muani, te isabo sogo bodolu me muanio. Agai te nai wai bulabo sogo bodolu dąį ilibadi, te nai gudabo sogo me bodolu muai dao.

³Agai te bidi ela muabo sogo bodolu mubadi, agai gasi ebo bidi ma usu ilabo sogo bodolu mubadi yali. Agai te nai dabe hųgiabo sogo bodolu muyu, te nai dabe nigabo sogo bodolu muyu yai dao.

⁴Agai te gela wabo sogo muyu, te gisugu wabo sogo bodolu muyu yali. Agai te hobede yabo sogo muyu, te tęąbi po wabo sogo muyu yalio.

⁵Agai te dago te masigi dabe sela sąbo sogo bodolu muyu, me te masigi dabe dago deliba sisinabo sogo bodolu muyu yai dao. Agai te bidigo aga we dali pagela piabo sogo bodolu muyu, te we dali pagela pisąbo sogo bodolu muyu yai dao.

⁶Agai te nai hagawai gegabo sogo bodolu muyu, te hagawai nai tagalabo sogo bodolu muyu yali. Agai te nai doado bage bugagia muabo sogo bodolu mubadi, te nai dabe sela sąbo sogo bodolu muai dao.