KOHELETE 7:21-29

²¹Taunimanima edia hereva iboudiai basio hakala henidia, emu hesiai tauna baine uduguiraimu bena ena hereva ba kamonai na garina.

²²Lalomu ai vada o diba, nega momo oi ese haida na vada o uduguiraidia.

²³Ina idoinai aonega amo vada na tohoa. Lau nato “Baina aonega”; to aonega egu amo na idauhai.

²⁴E miamu ḡauna na idauhai; ia na dobu, dobu masemase. Daika ese baine davaria diba?

²⁵Lalogu na haloua, baina diba, bona aonega bona ḡau badidia baina tahudia; bona kara dika ena kavakava bona kavakava ena kava kukuha baina dibadia.

²⁶Bena ḡau idita-hereana ta na davaria, mase iditana e hereaiamu ḡauna; una ḡau be lalona na idoa bona huo bona imana na gadea hahinena. Dirava e hamoaleamu tauna na iena amo e roho maurimu; a kara dika tauna na ia ese e abiamu.

²⁷Haroro Tauna e tomamu: A itaia, ina na vada na davaria. Lalo-hadai idau-idau vada na haboudia, ede bae hatamona toma;

²⁸Ialogu ai vada na tahua loulou, to asina davaria. Daha ta lalodia amo tau tamona na davaria, a ini iboudiai lalodia amo hahine ta asina davaria.

²⁹A itaia, ina mo vada na davaria: Dirava ese taunimanima e karadia mai edia maoromaoro, a idia ese dala idau-idau vada e tahudia.