Kap 61:1-5

¹Kap on kap yoŋ dakon kɨla amɨn do mandabi. Dewit dakon kap kɨnda. Gita tɨdaŋek yogogɨ. Piŋkop, mɨrakgo yopmaŋek aŋpulugoki do yaŋ tɨdosot uŋun nandaki. Bɨsitno nandaki.

²Nak mɨktɨm dubagɨsikon da gak do yaŋ tɨdosot. Butnokon da paŋpulugogɨ mɨni egɨsat yaŋ nandaŋek yaŋ tɨdosot. Aŋkɨ nepbɨ tɨp madep da yoŋgamon pasɨlɨ egɨpbeŋ,

³nido tagɨsi aŋkutnosol. Nagal tebano agaki uwalno da arɨpmɨ dɨma abɨŋ nepni.

⁴Nak bɨsap mudok mudogɨ mɨni gak da yutnon egɨpbeŋ do nandɨsat. Pup pudɨk meŋi da pɨtgwan tagɨsi ekwaŋ, uŋun da tɨlak gak da kapmatjok egapbo aŋkutnoki do nandɨsat.

⁵Piŋkop, nak yaŋ teban tok agɨm uŋun gak da nandagɨl. Yo tagɨsi gak do pasolgoŋ amɨn kabɨ do yomɨsal uŋun nak do kɨlɨ namgul.