Kap 59:5-17

⁵Piŋkop Yawe, Tapmɨm Ami, tepmɨsi abɨŋek nak aŋpulugoki. Gak Israel amɨn dakon Piŋkop, tepmɨsi abɨŋ amɨn kabɨ morap egɨ aŋaŋ kwaŋ tepmɨ pi yobi. Uŋun jamba but amɨnsi, do bupmɨ dɨma nandaŋ yobi.

⁶Pɨlɨn kaga abɨŋek kokup pap da kosiron agek pɨŋan da yaŋ nɨmɨ yoŋ.

⁷Nandaki, gen kaganikon da gen yokwisi da moŋ. Uŋun emat agak sɨba geni tepmɨsi yombem. Mani yaŋ yoŋ, “Namɨn da nandaŋ nimjak?”

⁸Mani Yawe, gak da jɨkgo yokwisi yanjaŋ yomɨsal. Gak da uŋun mɨŋat amɨn morap kabɨ kɨsi do yaŋsul aŋ yomɨsal.

⁹Gak dagɨn nak aŋteban aŋek kɨlano asal. Piŋkop, gak dam tebano arɨpmɨ dɨma tuwɨlɨ egɨsal.

¹⁰Piŋkopno da but dasi galak taŋ namɨsak, ae uŋun da abɨŋ aŋpulugokdɨsak. Piŋkop da nak yum nandaŋek nepban pɨndagapbo uwalno pabɨŋ yopdɨsak.

¹¹Amɨn Tagɨ, dɨma dapbɨ kɨmotni. Mɨŋat amɨno da tapmɨmgo madep do dɨ ɨŋtaŋbam. Gak pasɨknin tebaisi, gaga da tapmɨmon uwal yolbɨ kɨŋakwa paŋupbal aki.

¹²Toktogɨsi yokwi ak dogɨn yoŋ. Iyɨ do nandaba wɨkwaŋ do yum pɨndagaki iyɨ da paron yokwalni. Jobɨt tɨmɨtdo dakon gen ae top gen gat kɨsi yoŋ.

¹³Do gak da butjap nandaŋ yomɨŋek dapbɨ kɨmotni kaŋ tagɨsi. Amɨn yokwi uŋun dapbɨ pasɨlni. Yaŋ aŋaki mɨŋat amɨnyo da gak do Piŋkop, ae Israel amɨn dakon kɨla amɨn madep, ae dukwan dukwan kɨsi dakon kɨla amɨn madep egɨsal yaŋ nandaŋ gamni.

¹⁴Pɨlɨn kaga abɨŋek kokup pap da kosiron agek pɨŋan da yaŋ nɨmɨ yoŋ.

¹⁵Jap wusɨŋ pɨndak nok do kɨŋ ap aŋ. Ae burɨ dɨma tugoni kaŋ, nɨmɨ yoŋ.

¹⁶Mani, nak tapmɨm madepgo do kap yokeŋ. Wɨsa dagokdo but dasi galak taŋ namɨsal, uŋun do nandaŋek kap yokeŋ. Nido, kalɨp jɨgɨ mibɨlɨ mibɨlɨ noman taŋ namgwit bɨsapmon tagɨsi aŋkutnagɨl, aŋek dam tebano arɨpmɨ dɨma tuwɨlɨ egɨpgul.

¹⁷Piŋkop, gak kaloŋgɨn teban tokno. Gak dakon man awɨgɨk do kap yokdɨsat. Piŋkop, toktogɨsi but dasi galak taŋ namɨsal, ae dam tebano arɨpmɨ dɨma tuwɨlɨ egɨsal.