Godigo Nogi Ugwaba Sabo Tęąbi Po Wabo Buku Dabe 59:5-17

⁵Genuai Bidi, nage te Tigidali Bomo Elalubo God dao. Nago polo tama ena tau sagasao. Nage te Israel dabego God, te bidi dabe suao. Nage polo aselama, tama te Israel hani isąwai we bidiba dwai dene magasobo sę yagasao. Nago augwalide homu dene me elamuo. Te bagego wiegi yai kolesaga yaiba po wali, tiali goli, augwaligo te dwai kolesaga yabo homu naga elaluai. Te augwali wei ponobo sę nago mu yao,

⁶Te hulide augwali te genuai hanuba ma aselama, tama augwali te taun bobegelali obo sesege badu bagula biliyu, tama te yowi dabego wabo tiwai i ola bilai.

⁷Odao. Te augwaligo po te dwai mu weyu, te bainat hwą poa pai mu tiwai yali. Tiali goli, augwaligo te po wali, “Dego dago te po odomainu yagawe?”

⁸Tiali goli, Genuai Bidi, nago augwaliba dwai gisugu mu mabo dao. Nago te tigidali Israel hani isąwai we bidi haniba te kęnę po wabo dao.

⁹Nago naga ena dąų waliyu, tama ena tonalubao. God, ena te nageba naga pelama, tama ena te boi bidi dabede geme duala sabo dao.

¹⁰Te eno God agai ena wei eyu, godolo mu elama, tama aga aselama, ena tau sagasali. Godigo te agai eno boi bidi dabe te aiyaba elalubo te enabolo sumainu yaibao.

¹¹God, te nago augwali ela mugio. Magi baso meni, te eno hani bage augwaligo te naide homu kone ebo tagalidalio. Genuai Bidi, nage da tonalubo bidi dao. Te nago bomogo naga, nago te boi bidi dabe sela sąnama, te augwali tedela pomainao.

¹²Sesemane sogo augwaligo te dwai sę yabo po naga weyu ebo dao. Te augwa hagoma ebo kolesagade te augwa dolomainu sula tagalao. Augwaligo te nago nogide po dwai weyu, tama sesemane sogo tibo po wabo dao.

¹³Tama tialima, te nago haliga sębę augwalide eyu, te augwali elao. Te dwai sę ebo bidi dabe mu silao. Nago te tibaso da, tama te we bidi dabego koneama, nage te God, nage te da Israel dabego king bidi me, tama nage te tigidali bulu tǫde bagego king da olama, te augwaligo konemainao.

¹⁴Tama hulide te eno boi bidi dabe te taunba ma aselama, tama augwali te bagula biliyu, tama te yowi dabego go wabo tiwai ebo dao.

¹⁵Augwali te yowi tiwai biliyu, te uga peyu, eda asiyu, te nai gegebo ebao, tama te augwali haliga pągąsiąbaso, augwali te i dwai mu weyu ebo dao.

¹⁶Tiali goli, eno te nago genuai bomode te tęąbi weyu yaibao. Te tigidali sogo kigamude te eno tęąbi genuai weyu, te nago ena sesemane sogo godolo ebode te homu paliyu tiaibao. Magi baso meni, te haniani sęgę dabe polobadu enaba pedelali, tama nago ena bugagia tonalu, tama nage te eno obo tiwai elalubo dao.

¹⁷God, nage naga te ena seselalubo bidi dao. Eno te nago nogi ugwaba sabo tęąbi po wainogo ebao. God, nago ena godolo mu ebao, tama nage te eno bomai obo elalubao.