Kap 31:13-21

¹³Nak nandaŋapbo uwalno morapmɨ da manji gen yaŋ namaŋ. Yo pasolɨsi da nak aŋgwasaŋ. Muwugek niaŋsi aŋek aŋatno kɨmakban yaŋ do yaŋ nandat aŋ.

¹⁴Mani Yawe egɨp egɨpno gagon tosok yaŋsi nandɨsat. Nak yaŋ yosot, “Gak Piŋkopno.”

¹⁵Nak don egɨ aŋaŋ kɨkdɨsat uŋun gak da kɨsiron tosok. Uwalno nak aŋsopmaŋgaŋ uŋun da kɨsiron baŋ pulugaŋ nepbi.

¹⁶Butgo oman amɨngo nagon yɨpmaŋek yo tagɨsi aŋ nabi. Butdasi galak taŋ namɨsal, do uwal da kɨsiron baŋ pulugaŋ nepbi.

¹⁷Yawe, aŋpulugoki do yaŋ tɨdosot, do aŋpulugaŋaki mayagɨ dɨma pakeŋ. Yokwi pakpak amɨn paŋmayak abi. Aŋaki kɨmakbi tamogwan pagek gen dɨma yoni.

¹⁸Uŋun amɨn kwen wɨgɨk aŋek amɨn kɨlegɨ do yaŋba yokwi tok aŋyomaŋ, do uŋun top yogok amɨn paŋtasɨk abɨ gen dɨma yoni.

¹⁹Amɨn gak do pasalek gawak gamɨŋek ekwaŋ uŋun gak da aŋpakgo tagɨsisikon da paŋpulugosol. Mɨŋat amɨn morap da dabɨlon paŋkutnoki do gagon kwaŋ amɨn kɨlani tagɨsi asal.

²⁰Gak da uŋun amɨn gaga da kapmatjok paŋkɨsɨbɨsal. Yaŋ aŋaki dap do yoŋ amɨn dap do si paŋtɨdok aŋ. Gak da yoŋgamgwan egakwa uwalni da gen yokwi yaŋek arɨpmɨ dɨma pabɨŋ yopni.

²¹Yawe aŋkɨsino. Nak do but dasi galak taŋ namɨsak. Kokup papmon egapbo uwal da aŋgwasɨŋek nɨt do awit bɨsapmon tagɨsi aŋpulugagɨt.