Kap 146:3-10

³On mɨktɨm dakon kɨla amɨn madep da gak arɨpmɨ dɨma aŋpulugokdaŋ, do egɨp egɨpji uŋun amɨnon tosok yaŋ dɨma nandani.

⁴Uŋun kɨmagek mɨktɨm dagokdaŋ. Yo ak do yawit uŋun bamɨ dɨma noman tokdaŋ.

⁵Mani amɨn kɨnda Jekop dakon Piŋkop da aŋpulugosak do nandaŋ gadaŋek jomjom asak uŋun amɨn kɨsɨk kɨsɨk tagɨ asak.

⁶Piŋkop da kundu ae mɨktɨm ae tap ae yo morap uŋungwan toŋ wasagɨt. Toktogɨsi yo morap ak do yosok uŋun akdɨsak.

⁷Jɨgɨkon ekwaŋ amɨn paŋpulugosok. Ae jap do aŋ amɨn jap yomɨsak. Yawe da dam tebanon ekwaŋ amɨn wɨtdal yopban kwaŋ.

⁸Dabɨlɨ mɨni amɨn dabɨlni paban pɨsaŋban sɨŋtoŋ. Ae jɨgɨ da tebai pabɨŋ yopmaŋgaŋ amɨn uŋun jɨgɨni kukwaŋ yomɨsak. Yawe uŋun amɨn kɨlegɨ do but dasi galak taŋ yomɨsak.

⁹Dubagɨkon amɨn nin da mɨktɨmon ekwaŋ uŋun kɨlani asak. Ae sakwabat gat ae monjɨ meŋi datniyo kɨmakbi uŋun kɨsi kɨlani asak. Mani amɨn yokwi aŋ uŋun da yo ak do nandaŋ uŋun kosit sopmaŋ yoban dɨma aŋ.

¹⁰Yawe uŋun dagok dagogɨ mɨni kɨla amɨn madep egɨpdɨsak. Saion kokup pap amɨn ji dakon Piŋkop dagok dagogɨ mɨni Kɨla Amɨn Madep egɨpdɨsak. Yawe dakon man aŋkɨsini!