Buk Song 146:3-10

³Ol king na ol man bilong graun i no inap kisim bek yu. Olsem na nogut yu bilip long ol.

⁴Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.

⁵Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas.

⁶God i bin mekim kamap heven na graun na solwara na olgeta samting i stap long en. Na oltaim God i save bihainim olgeta promis bilong em.

⁷Bikpela i save helpim ol manmeri i stap nogut aninit long ol birua. Na em i save givim kaikai long ol manmeri i hangre. Bikpela i save pinisim kalabus bilong ol man i stap long kalabus.

⁸Na em i save mekim ol aipas i lukluk gen, na i save pinisim hevi bilong ol man hevi i daunim ol. Bikpela i save laikim tru ol stretpela manmeri bilong en.

⁹Em i save lukautim ol man bilong narapela ples i stap long graun bilong yumi. Na em i save helpim ol meri, man bilong ol i dai pinis, na ol pikinini, papa bilong ol i dai pinis. Tasol em i save paulim ol samting ol man nogut i laik mekim.

¹⁰Bikpela bai i stap king oltaim oltaim. Yupela ol manmeri bilong Saion, God bilong yupela bai i stap king oltaim oltaim. Litimapim nem bilong Bikpela!