Judt 3

1

2

3

4

5

6

7

8

9

10

11

12

13

14

15

16

¹Te dongah anih taengla rhoepnah saii hamla he ol he a tah uh tih,

²“Manghai boei Nebukhadnezzar kah sal rhoek tah na taengah ka kuep uh coeng. Na ngaih bang boeih la kaimih taengah saii mai.

³Ka im neh ka khohmuen boeih khaw, cang lo boeih khaw, ka saelhung neh ka boiva boeih khaw, ka rhuengim boeih khaw na hmaiah om coeng. Te rhoek te na ngaihnah bangla sai mai.

⁴Ka khopuei rhoek neh a vangca boeih khaw na sal pai ni. Halo lamtah amih te na hmuh bangla saii mai,” a ti nah.

⁵Hlang rhoek khaw Holofernes taengla cet uh tih he he boeih a thui uh.

⁶Te dongah a caem neh tuipuei kaeng la suntla. Te dongah rhalmah khaw a khueh khopuei khaw a cak la sai, rhakap a thapnah hlang te khaw a coelh.

⁷Pilnam neh khokaep boei long khaw a nih te rhaihulh neh, lam neh, kamrhing neh a doe uh.

⁸Tedae amih kah cangimphu boeih a phae pah tih a rhobuk khaw a vung pah. Khohmuen pathen rhoek boeih te boeih phae tih thup hamla laipai a tueih. Namtom boeih loh Nebukhadnezzar bueng te bawk saeh lamtah koca takuem neh ol cungkuem loh anih te pathen la n'khue saeh a ti.

⁹Te vaengah Judea kong puei rhaldan kah, Dothan taeng, Esdraelon taeng khaw a pha.

¹⁰Geba neh Scythopolis laklo ah rhaeh dae a caem hamla lampu a vawtnah rhuet loh hla khat puet om.