1Hlaem a pha vaengah tah a sak rhoek phang khoe uh. Bagoas loh dap te poeng lamloh a khaih tih a taengom rhoek a boei mikhmuh lamloh a nong sak. Buhkoknah khaw muep a koe coeng dongah amih khaw bong uh tih ihkung la boeih khoem uh.
2Tedae Judith amah bueng te dap ah sut a caeh tak uh. Te vaengah Holofenes tah a duek dalh hil a ok dongah a thingkong dongah rhoel uh coeng.
3Te vaengah Judtih loh a taengom nu te, cet lamtah n'rhing, anoek kah banga thangthui la ka cet dae ni a ti nah. Bagaos khaw amh tlam te a thui pah.
4Te dogah tanoe kangham khaw boeih cetih uh imkhan khuiah pakhat khaw om uh pawh. Judith khaw thingkong kaep pai tih a thinko nen tah, “Tlungthang boeih kah Boepa Pathen aw, Jerusalem pacuetnah hamla ka kut ah bibinah nan paek coeng.
5Na rho he bomnah tue la om coeng tih kaimih aka pai thil thunkha rhoek phae ham mangtaengah te ka saii pawn ni,” a ti.
6Te phoeiah Holofernes lu kah thingkong tong taengla cet tih cunghan a hoei te pahoi a loh pah.
7Thingkong te rhep thoeih a lu sammuei te a tuuk pah. Te vaengah, “Israel Pathen, Boeipa aw tihnin ah thadueng m'pae lah,” a ti.
8Te phoeiah a thaa neh a rhawn te voei nit a boeng tih a lu te pat.
9Te dongah a rhok te thingkong dongah a palet. Pobang te tung taengah a hlih. Te phoeiah phawn ce tih Holofernes luh a tueihyoeih taengah a paek.
10Te long khaw bucun sungkoi khuiah lom a sang. Te phoeiah amih rhoi te phawn cet rhoi tih, a saii noek bangla thangthui la cet rhoi. Rhaehhmuen te a poeng tih kolvan a hil phoeiah tah Bethulia kah tlang la a luei phoeiah tah vongka te a pha rhoi.
11Te vaengah Judith loh vongka kah rhaltawt rhoek te a khue tih, “Vongka, ong, ong oeh, Pathen, mamih kah Pathen tah mamih taengah om. A thadueng te Israel neh mamih kah thunkha rhoek soah tihnin kah bangla a saii coeng,” a ti nah.
12A khopuei pilnam loh anih ol te a yaak uh dongah khopuei vongka la suntla uh tih khopuei kah a hamca rhoek te a hueh uh.
13Anih a mael te tanghnainah a om pawt dongah a yit a len khaw huek yong uh. Vongka a ong uh tih amih rhoi te a doe uh. Hmai te a tok uh a taengah tun ngol uh.
14Te phoeiah amih te ol ue la, “Pathen koeh uh, Aw amah te koeh uh. Pathen mah koeh uh. A sitlohnah he Israel imkhui lamloh a khoe coeng dae tahae khoyin ah tah ka thunkha he ka kut loh a phae coeng,” a ti nah.
15Sungsa dongkah hlang lu te a poh tih amih te a tueng. Te vaengah amih te, “Assyria caem kah rhalboei, Holofernes kah a lu la he. He tah amah a rhuihmil la a yalh nah pobang kah a pen la he. Boeipa loh a nih te huta kut ne a tloek coeng.
16Boeipa tah a hing dongah me la ka caeh a khaw kai n'tungaep coeng. Boeipa tah a hing dongah ka maelhmai loh anih phae ham a yoek vaengah khaw kai taengah tholhnah saii boel saeh lamtah poeinah neh yahpohnah kai taengah om boel saeh tila ka toemngam coeng,” a ti.
17Pilnam boeih khaw a ngai muep hmang uh. Te dongah bakop uh tih Pathen a bawk uh. Te vaengah ol thikat la, “Pathen nang tah na yoethen pai saeh, tihnin rhoe ah na pilnam kah thunkha rhoek te na tlayae sak coeng,” a ti uh.
18Te phoeiah tah Uzziah loh anih te, “Hlang canu aw, nang tah Khohni Pathen loh diklai huta boeih lakah yoethen m'paek coeng. Te dongah Boeipa Pathen tah a yoethen pai saeh. Amah loh vaan neh diklai a suen. Mamih thunkha mawtkung ka a lu a rhaih pah.
19Nang koehnah he tah, Pathen kah thaomnah aka poek rhoek kah thinko lamloh nong tlaih mahpawh.
20Pathen loh nang te kumhal ah thangpomnah m'pae saeh, nang te yoethennah neh n'thuung saeh. Pilnam he a tlak vaengah na hingnah te na phum coeng. Mamih kah patangnah te na palet tih Pathen mikhmuh a dueng la na caeh sak,” a ti nah. Te vaengah pilnam pum long khaw, “Amen, Amen,” a ti uh.
