Judges 13:7-24

⁷Machane keyog ngog ni bay gu diyen ngug gargeleg bochi pagel. Ma keyog ngog dab kug unum e wayin ara rrum, ara gu way e ggan nike yog e motochiyel ndab ni kay, ya chi pagel nem e nge milfan ngak Got ni ir reb e Nazirite u n’umngin nap’an e yafos rok.”

⁸Me meybil Manoah ngak SOMOL ni ga’ar, “SOMOL, wenig ngom, mu gagiyegnag fare mo’on ni reb e girdi’ rok Got ni kamol’og nge yib ngomow, nge weliy ngomow e n’en nthingar gu rin’ew ngak fachi pagel ko ngiyal’ ni bay ni gargeleg riy.”

⁹Me rin’ Got e tin ke wenignag Manoah, me sul fare engel nge yib i m’ug ngak fare pin nike par fare pin nga but’ u milay’. Ma de moy Manoah ni figirngin rok.

¹⁰Me mil nge yan i yog ngak figirngin ni ga’ar, “Fare mo’on ni fa’ani yib i m’ug ngog fa binem e rran e ke yib i m’ug ngog bayay.”

¹¹Me sak’iy Manoah nge lek le’engin ngranow. Me yan ngak fare mo’on me fith ngak ni ga’ar, “Mog, i gur fare mo’on ni fa’an um welthin ngak e bpin rog?” Me ga’ar, “I gag.”

¹²Ma aram me ga’ar Manoah, “Nap’an nra yib i m’ug nib riyul’ e tin kamog, ma mang e n’en thangri rin’ fachi pagel? Ma uw rogon pangin thangri par ko yafos rok?”

¹³Me fulweg fare engel rok SOMOL ngak Manoah ni ga’ar, “Le’engim e thangri guy rogon ngi i rin’ urngin e pin’en ni kug weliy ngak.

¹⁴Thangri dabi kay ban’en ni yib ko grapes; ma thangri dabi unum e wayin ara rrum, ara kay e ggan nike yog e motochiyel ndab ni kay. Thangri rin’ urngin e tin kug weliy ngak.”

¹⁵Ma dawori nang Manoah ni ir fare engel rok SOMOL, me ga’ar ngak, “Wenig ngom, dab ka’a mman. Ya nggu lithew ba pifak e kaming ni fan ngom.” Machane me ga’ar fare engel ngak, “Fa’anra gu par, ma dab gu way e ggan romew. Machane fa’anra gimew ba’adag ni ngam ngongliyew rogon, me ere mu urfiyew nib maligach ngak SOMOL.”

¹⁷Me ga’ar Manoah ngak fare engel, “Mog fithingam ngomow, nge yag ni gon’ew e sorok ngom ko ngiyal’ nike yib i m’ug nib riyul e tin kamog.”

¹⁸Me fith fare engel ngak ni ga’ar, “Mangfan ni ga ba’adag ni ngam nang fithingag? Fithingag e nge par nib mith.”

¹⁹Me fek Manoah fare pifak e kaming, nge boch e grain nge pi’ ni maligach u daken fare altar ni war, ni aram e ke pi’ ngak SOMOL, nma ngongliy e maang’ang.”

²⁰Nap’an ni be gubulbul e daramram u daken fare altar, me guy Manoah nge le’engin fare engel rok SOMOL nike yan u fithik’ fare daramram ngalan e lang. Miyow paraw nga but’.

²¹Ma daki guy Manoah nge le’engin fare engel bayay. Me nang Manoah ni fare mo’on e engel rok SOMOL.

²²Me ga’ar Manoah ngak le’engin, “Ke mich ni ngadmow, ya kad guyew Got!”

²³Me ga’ar le’engin ngak, “Fa’an mang e finey SOMOL ni nge li’dow ngadm’ow, ma dabi fel’ u wan’ e tin kadpi’ew ni maligach; ma dabi dag ngodow urngin e pin’ey, ara weliy ngodow e tin ke weliy e ngiyal’ney.”

²⁴Me gargeleg fare pin bochi pagel me tunguy Samson ngak. Mi i ilal fare tir, me par SOMOL ni be ayuweg.