Juan 8:4-28

⁴y chenobꞌ: —Ajcanseyajet, tajwina e ixic era conda war uyose ubꞌa taca inteꞌ winic xeꞌ majax nujbꞌir tacar.

⁵Pues tama uley e Moisés che que ucꞌani tuaꞌ achamesna jurbꞌir taca e tun inteꞌ ixic xeꞌ uche cocha era. Pero net, ¿tucꞌa aware tama tunor era? che e nuquir winicobꞌ era.

⁶Pues jaxirobꞌ uyubꞌiobꞌ tuaꞌ e Jesús cocha era tuaꞌ taca umajresobꞌ ani, porque war usicbꞌobꞌ cocha tuaꞌ utuchꞌi e Jesús tut e ley tuaꞌ uyubꞌi uchamsiobꞌ. Pero e Jesús intaca uchꞌubꞌa ut tut e rum y cay utzꞌijbꞌa tut e rum tacar or ucꞌabꞌ.

⁷Pero e winicobꞌ era machi uyactobꞌ tuaꞌ uyubꞌiobꞌ tuaꞌ e Jesús. Entonces jaxir ujachi ujor y che: —Tin e unata que matucꞌa umabꞌambꞌanir uꞌric e ixic era taca e tun bꞌajxan, che e Jesús.

⁸Y conda cꞌapa ojron cocha era sutpa uchꞌubꞌa ut y cay utzꞌijbꞌa otronyajr tut e rum.

⁹Pero conda e nuquir winicobꞌ uyubꞌiobꞌ e ojroner era cay locꞌoyobꞌ tzꞌustaca inteꞌ intiobꞌ. Cay locꞌoy tin e más onian winic bꞌajxan este que cꞌapa ixiobꞌ tunorobꞌ. Entonces quetpa e Jesús ubꞌajner taca e ixic xeꞌ quetpa yajaꞌ.

¹⁰Entonces e Jesús ujachi ut otronyajr y uyubꞌi tuaꞌ e ixic y che: —¿Tiaꞌ ixiobꞌ tunor e winicobꞌ era? ¿Ma ca majchi xeꞌ quetpa xeꞌ war ubꞌijnu que net ucꞌani tuaꞌ ichamesna? che e Jesús.

¹¹Y e ixic che: —Niwinquiret, mamajchi, che e ixic. Y che e Jesús: —Nien nen ubꞌan. Quiqui y actan tuaꞌ ache e mabꞌambꞌanir, che e Jesús.

¹²Entonces cay ojron e Jesús otronyajr tut e gente y che: —Nen jax e janchꞌaquenar y tamar era jax nen xeꞌ injanchꞌacnes tunor tin e turobꞌ tara tor e rum. Tin e uturbꞌa ubꞌa tamaren axin uchꞌami e janchꞌaquenar xeꞌ tuaꞌ uyajcꞌu e cuxtar xeꞌ machi tuaꞌ acꞌapa, y machi ixto tuaꞌ axana tama e incsibꞌaner, che e Jesús.

¹³Entonces ojronobꞌ e fariseobꞌ y che: —Net ajtaca war achecsu abꞌa tamar lo que war aware, y awojroner cocha era matucꞌa ucꞌampibꞌir, che e fariseobꞌ.

¹⁴Entonces ojron e Jesús y che: —Motor que nibꞌajner war inchecsu nibꞌa tiut pero erach tunor niwojroner. Porque nen innata tiaꞌ tarien y innata tiaꞌ tuaꞌ inxin otronyajr, pero nox machi war inata tiaꞌ tarien y nien machi war inata tiaꞌ tuaꞌ inxin otronyajr.

¹⁵Nox war ibꞌijnu iwira bꞌan taca cocha ubꞌijnuobꞌ e gente tara tor e rum. Pero nen mamajchi tamar war imbꞌijnu que mabꞌambꞌan lo que war uche.

¹⁶Pero jay imbꞌijnu ani tuaꞌ inware que mabꞌambꞌan o jay imbꞌutz lo que war uche inteꞌ, nen inxin inche ajtaca lo que erach, porque majax nibꞌajner tuaꞌ inware tunor era sino que Nitata xeꞌ uyebꞌta tarien axin utacren.

¹⁷Pues chꞌar tzꞌijbꞌabꞌir tama uley e Moisés que jay ayan chateꞌ ajchecsuyajobꞌ xeꞌ intera uyojronerobꞌ, jaxirobꞌ tuaꞌ acꞌupesnobꞌ.

¹⁸Pues nen war inchecsu nibꞌa y Nitata xeꞌ uyebꞌta tarien jax inteꞌ ajchecsuyaj tanibꞌa ubꞌan, che e Jesús.

¹⁹Entonces sutpa uyubꞌiobꞌ tuaꞌ e Jesús e fariseobꞌ era otronyajr y chenobꞌ: —¿Y tiaꞌ turu atata? chenobꞌ. Y che e Jesús: —Nox machi inata chien nen y nien machi inata chi Nitata. Jay inata ani chien nen, inata ani chi Nitata ubꞌan, che e Jesús.

²⁰Pues arobꞌna tunor era umen e Jesús conda war acanseyan tama e templo tama e lugar tiaꞌ war e cajón tiaꞌ ayajra e tumin. Pero mamajchi ucachi e Jesús tuaꞌ uqꞌueche axin tama e cárcel porque merato acꞌotoy e día.

²¹Entonces ojron e Jesús otronyajr y che: —Nen cꞌani inlocꞌoy tama e lugar era, y nox cꞌani isajquen y cꞌani ixchamay tamar imabꞌambꞌanir. Pero tiaꞌ inxin nen, nox machi uyubꞌiox ixcꞌotoy, che e Jesús.

²²Entonces ojronobꞌ e nuquir winicobꞌ era y chenobꞌ: —¿O war ca nic ubꞌijnu tuaꞌ uchamse ubꞌa y tamar era war uyareon que machi uyubꞌion caxin tiaꞌ axin jaxir? che e nuquir winicobꞌ era.

²³Entonces e Jesús che: —Nox ajlugarox tara yebꞌar ut e qꞌuin, pero nen ajlugaren tichan. Nox tuox e rum era pero nen majax tuen e rum era.

²⁴Y tamar era inwareox que nox ucꞌani tuaꞌ ixchamay tamar imabꞌambꞌanir, porque jay nox machi ixcꞌotoy icꞌupse que nen turen xeꞌ turen entonces nox ucꞌani tuaꞌ ixchamay tamar imabꞌambꞌanir, che e Jesús.

²⁵Entonces e nuquir winicobꞌ sutpa uyubꞌiobꞌ tuaꞌ e Jesús otronyajr y chenobꞌ: —¿Y chiet net? chenobꞌ. Y che e Jesús: —Cay inwareox bꞌajxan chien nen pero machi icꞌupsen.

²⁶Pues ayanto meyra lo que cꞌani ani inwareox tamar lo que war iche xeꞌ mabꞌambꞌan. Pues tin e uyebꞌta tarien uyaren jax taca lo que erach. Y nen war inware e gente tara tor e rum jax taca lo que cay umbꞌi tuaꞌ jaxir, che e Jesús.

²⁷Pero jaxirobꞌ machi cꞌotoy unatobꞌ que e Jesús war oꞌjron tamar Utata.

²⁸Y tamar era ojron e Jesús otronyajr y che: —Conda acꞌapa itꞌabꞌsen nen xeꞌ Uyunenen e winic tuaꞌ ichꞌubꞌen tut e cruz, cꞌani aquetpa chequer tiut que nen turen xeꞌ turen y que matucꞌa war inche xeꞌ bꞌan cocha incꞌani nen. Cay inwareox ajtaca lo que cay ucansen Nitata.