Juan 6:20-66

²⁰Ora nzhab Jesús lo re zha: ―¡Tsebt goo nay!

²¹Ne mlaa re zha mke Jesús leen kano, per oraaka mzin re zha yezlyu ta nda zha.

²²Ne tedib wiza, lee re men kuu myaan tedib lad roo nitdoo, myeen re men lee re zha kuu ngeteed lo Jesús ndya leen thibka kano kuu mndob tya, ne myeen re men ndat Jesús kon re zha.

²³Tsa lee tedib net kano mzin gax ta ndow re zha pan, ta mndaa Jesús texkix lo Diox, re kanoʼa nak kano chaan re zha yez Tiberias.

²⁴Or mwii re men neeka Jesús ne neeka re zha kuu ngeteed lo Jesús yenta tya, tsa mke re zha leen kano ne ndya zha par Capernaúm nda kwaan zha Jesús.

²⁵Or mzin re men tedib lad roo nitdoo, ne tya mzal Jesús lo re zha, tsa mnaabdiz zha lo Jesús nzhab zha: ―Maestr, ¿pol mzina nzhee?

²⁶Tsa nzhab Jesús lo re zha: ―Wlipaa na nin lo goo, ngekwaant goo na tak myen goo re kuu thoz kuu mtsowʼn, sinke nkwaan goo na, tak ndow goo asta plo mze leettsoo goo.

²⁷Ket goo tsiin par kwaan goo kuu wu goo kuu nlux, sinke bkwaan goo kuu ndaa yalnaban kuu thitanax, ne na Kuu Mzin Ngok Men, ta yalnaban kuu thitanax lo goo, tak lee Diox kuu nak Xutʼn mtob seny chaane na, tsa ne re men lee na nak Xgann Diox.

²⁸Tsa mnaabdiz re zha lo Jesús, nzhab zha: ―¿Kwan ndoblo tsow nee, tsa tak tsow nee reta kuu nabee Diox tsow nee?

²⁹Ora mkab Jesús ne nzhab Jesús: ―Kuu nlaaz Diox nak, yelaaz goo zha kuu mtaal Diox.

³⁰Tsa mnaabdiz re zha lo Jesús ne nzhab zha: ―¿Cho thib re milagr tak looʼa lo nee, tsa yelaaz nee lu? ¿Kwan kuu tak tsowa?

³¹Lee re teyaa zha ndala ndow zha pan kuu le maná yubiz, taxal nzhab lo xkiiz Diox: “Pan yibaa mndaa Diox ndow re zha”. Sal. 78:24

³²Tsa mkab Jesús ne nzhab Jesús: ―Wlipaa na nin, nagt Moisés kuu mndaa pan kuu mroo yibaa ndow goo, sinke Xutʼn nak kuu ndaa pan kuu wlipaa mroo yibaa lo re goo.

³³Tak lee pan kuu wlipaa ndaa Diox, nak zha kuu mroo yibaa, ne ndaa yalnaban lo re men yezlyu ree.

³⁴Tsa lee re zha mnaab lo Jesús ne nzhab zha: ―Zha Nabee, thibka btaa pana wu nee.

³⁵Jesús mkab ne nzhab lo re zha: ―Na nak pan kuu ndaa yalnaban. Ne lee zha kuu yaad lon thitanax laant raa zha, ne lee zha kuu yelaaz na thitanax naa tob xyeekt raa leettsoo zha.

³⁶Per niʼa na lo goo, nyelaazt goo na tegal ngwii goo na.

³⁷Reta zha kuu mndaa Xutʼn lon, ndyaad zha lon, ne reta zha kuu ndyaad lon, tezhonntʼn zha.

³⁸Yibaa mroon ne ndyaltʼn par tsowʼn kuu nlazʼn, sinke ndyalʼn tsowʼn kuu nlaaz Xutʼn kuu mtaalʼn.

³⁹Ne lee kuu nlaaz Xutʼn kuu mtaalʼn nak, lee reta zha kuu mndaa Xutʼn lon, latʼn lux neeka thib re zha, sinke teroban na zha wiz bluz.

⁴⁰Tak kuu nlaaz Xutʼn nak, lee reta zha kuu yelaaz xgann Xutʼn, keno zha yalnaban kuu thitanax ne lee na teroban zha wiz bluz.

⁴¹Tsa mndelo re zha Israel mbyodiz, tak lee Jesús nzhab: “Na nak taxal pan kuu mroo yibaa”.

⁴²Ne lee re men nzhab: ―¿Chu leet zha ree nak Jesús xgann Che? Nlebeeʼaa xut zha ne xnaa zha. Ne ¿chebee mbez zha yibaa mroo zha?

⁴³Tsa lee Jesús mkab ne nzhab lo re zha: ―Tow roo goo yodizt raa goo.

⁴⁴Neeka thib zha yaadt lon, os lee Xutʼn kuu mtaalʼn yaadnot zha lon, tsa lee na teroban zha wiz bluz.

⁴⁵Ne lo yeets kuu mkee re profet mbez: “Diox teteed reta men”. Kona lee reta zha kuu nzhon diiz lo Xutʼn ne nteed lo Xutʼn, ndyaad zha lon.

⁴⁶’Ne yent neeka thib zha kuu mwii lo Xutʼn Diox, sinke beeta zha kuu mroo lo Diox mwii lo Diox.

⁴⁷Wlipaa na nin, lee zha kuu nyelaaz na napa zhaʼa yalnaban kuu thitanax.

⁴⁸Na nak taxal pan kuu ndaa yalnabana.

⁴⁹Lee re teyaa zha ndala ndow zha maná yubiz, ne nguth re zha.

⁵⁰Per lee na ngetan kwent chaan pan kuu mroo yibaa lo goo, ne loka zha kuu wuy taban zha thitanax.

⁵¹Na nak pan kuu naban kuu mroo yibaa, ne loka zha kuu wu pan ree taban zha thitanax. Lee pan kuu tan nak kwerp da, ne ta nay por reta men yezlyu ree.

⁵²Tsa lee re zha Israel mndelo mbyodiz, ne nzhab: ―¿Xomod taa mbyi ree leeka beel mbyi ree wu men?

⁵³Tsa nzhab Jesús lo re zha: ―Na Kuu Mzin Ngok Men. Wlipaa na nin lo goo, os lee goo wut goo beel da, ne gut goo ren da kenot goo yalnaban kuu thitanax.

⁵⁴Loka zha kuu wu beel da ne gu ren da, tekeno zha yalnaban kuu thitanax, ne lee na teroban zha wiz bluz.

⁵⁵Tak lee beel da wlipaa nak loww zha, ne lee ren da wlipaa nak kuu nzhuu zha.

⁵⁶Ne lee zha kuu nzhow beel da ne nzhuu ren da, thibka nak nee rop nee zhaʼa ne thibka ndon kon lee zha.

⁵⁷Lee Xutʼn kuu mtaalʼn nkeno yalnaban, ne lee na naban na por Xutʼn; ne tataka lee zha kuu wu beel da taban zha por na.

⁵⁸Kwent chaan pan kuu mroo yibaa ngetan. Lee pan ree nagt taxal maná kuu ndow re teyaa zha ndala, tegal ndow zhay per nguth zha, per lee zha kuu wu pan kuu tan taban zha thitanax.

⁵⁹Re koree nzhab Jesús lo re men yez Capernaúm, or mloo Jesús xkiiz Diox lo re men ta nkaltaa zha nteed zha xkiiz Diox.

⁶⁰Or mbin re men re kuu mloo Jesús, tyen re zha kuu ngeteed lo Jesús nzhab: ―Kwathoz nagan yenaa kuu ni zha; ¿cho tak gon diiz xkiiz zha?

⁶¹Ne myeen Jesús kwan ngetediz re zha, tsa nzhab Jesús: ―Cho koree ntsow went nzo leettsoo goo.

⁶²¿Kwan tsow goo xgab, os wii goo lee na, Kuu Mzin Ngok Men, ndyan yibaa leeka ta mroon?

⁶³Lee Mbi Nayon nak kuu ndaa yalnaban, per lee lo kwerp yent pa lortsine. Ne lee re kuu nin lo goo nak chaan Mbi Nayon ne leey nak kuu ndaa yalnaban.

⁶⁴Per bee nzo thib chop goo kuu nyelaazt na. Tak desde ner neʼa Jesús, naa cho nak re zha kuu nyelaazt Jesús, ne cho taa Jesús lo re zha kuu kuth Jesús.

⁶⁵Tsa nzhab Jesús: ―Kona nin lo goo, neeka thib zha gagt yaad lon, os lee Xutʼn yaadnot zha lon.

⁶⁶Kona tyen zha kuu ngeteed lo Jesús, mlaa zha Jesús ne ndya zha, ne mndiyt raa zha kon Jesús.