Juan 5:2-24

²Nãno Jerusalén ano ovejafãfe ãto kãiti ano ĩa ini. Judeofãfe yoimisfo a ĩamã ãfe ane Betesda. Nã ĩa kesemẽ pexe kafãshara mĩshti tsaofafãina ini, cinco pexe.

³Nãno yora isinĩ imisfo ichapa rasi inifo nãno rakafafãinafo. Fẽxofo, chãtofo, sifitianifo nãfo isinĩ imisfo nã pexe kafãshara mĩshti mẽra rakafafãinafo ini. Akka Niospa ãfe ãjiri nã ĩa ano nokomis nã ĩa fecha fecha axiki. Nã ĩa fecha fecha akaino nã isinĩ ikaifo nã nashi taea nashiax koshi sharamisfo. Nãskakẽ nã isinĩ ikaifãfe Niospa ãfe ãjiri manamisfo ato ĩa fecha fecha axoyonõ nã nashi nã taea koshi sharaxikakĩ.

⁵Jesús nãno nokoxõ feronãfake fichini treinta y ocho xiniya amis finipaikĩ ranãmis.

⁶Feronãfake finimisma fichixõ Jesús tãpini nã feronãfake treinta y ocho xiniya amis isinĩ itiani. Nãskaxõ yõkani: “¿Mĩ sharapaimẽ?” ixõ yõkani.

⁷Askafaito kemani: “Niospa ãjirinĩ ĩa fecha fecha akaino tsõakai ea ĩa ano iyomisma. Akka ẽ nashipaifiaino ea xĩtimisfo. Ẽkai fena nashitiroma. Nono tsõama ea ĩa ano iyoikaxiki,” faito,

⁸Jesús yoini: “Fininãkafã, mĩ rakati fifaini kasharatãfe,” Jesús fani.

⁹Askafaito nikai fininãkafãta ãfe rakati fifaini kani. Nã pena safaronõ finimisma Jesús sharafani.

¹⁰Nãskano nã judeofãfe ãto xanĩfofofãfe õinifo nã feronãfake finimismato ãfe rakati fifaini kaito yõkanifo: “¿Afeskakĩ mĩ rakati safaronõ mĩ foikaimẽ? ¿Mĩ tãpiamamẽ nõko xinifãfe yoipaonifo safaroaino nõ afaa metiroma? Akka mĩ rakati na safaronõ mĩ fotiroma,” fanifo.

¹¹Askafaifono ato kemani: “Oa feronãfãke ea sharafaxõ ea yoia iskafakĩ: ‘Mĩ rakati fotãfe,’ ea faa,” ato faito,

¹²“¿Tsõamẽ a feronãfake anori mia yoia?” fanifo.

¹³Finimismatokai tãpinima tsõa sharafaamãki Jesúsmãi a finimisma sharafafãini koshikõi a makinoax yorafã rasi mẽra kaano. Nãskakẽ finimismato anã õinima.

¹⁴Askano chipo Jesús a feronãfake sharafaa Nios kĩfiti pexefã mẽranoa fichixõ yoini: “Anã mĩ isinĩ ikima. Mã mĩ shara. Anã a mĩ chakafapaoni keskafakĩ afianã chakafayamafe. Mĩ chaka xatefe. Mĩ chaka mĩ xateyamakẽ afaranã mia anã omiskõimatiroki,” ixõ Jesús yoini.

¹⁵Nãskax nã feronãfake Jesús makinoax kani judeofo yoikai, “Oa Jesús ea sharafaa,” ato fani.

¹⁶Nã Jesús safaronõ yora sharafaa nikakanax judeofo ãto xanĩfofo Jesúski õitifishkinifo. Õitifishkikakĩ Jesús mekafakĩ chakafanifo.

¹⁷Askafaifono Jesús ato yoini: “Ẽfe Epa pena tii yonofafãini. Iskaratĩari yonoi. Ẽri ẽfe Epa yonoai keskafakĩ ẽri yonoi,” ixõ ato yoini.

¹⁸Nãskakẽ fakirira shinãnifo. Nãskara shinãkakĩ Jesús mekafanifo: “Nõko xinifãfe yoini keskara nõ safaronõ afaa metiroma, akka Jesús yonoi yorafo sharafakĩ. Nãskaxõ noko yoia: ‘Nios ẽfe Epakõi,’ noko faa. Nãskax Nios keskarakõi ipai,” fanifo. Nãskax a ranã yoinãnifo: “¿Afeskaxõ nõ Jesús ato retematiromẽ?” ikanax yoinãnifo judeofo ãto xanĩfofo.

¹⁹Nãskara shinãifãfe Jesús ato tãpini. Nãskaxõ Jesús ato yoini iskafakĩ: “Chanĩma ẽ mato yoinõ. Ea nikakapo. Ẽ Niospa Fakekõikĩ ẽa ẽ afara afeskarafaima. Ẽfe Epa Niospa akai keskara õixõ ẽri aki. Nã fisti ẽ aki.

²⁰Ẽfe Epa Niospa ea noikõi. Nãskakĩ nã akai keskara ea tãpimani ẽri anõ. Akka afara fetsa finakõia ea ispaxii. Askaino mã ea iskafakĩ yoixii: ‘Aira õikapo. ¿Afeskakĩ iskara shara akimẽ?’ mã ea faxii.

²¹Epa Niospa yora naano anã otofatiro. Nãskaxõ anã nimasharatiro. Ẽri ãfe Fakexõ nãskari fakĩ ẽ ato nimapaikĩ ẽ ato nimatiro shara ĩpaxanõfo.

²²Epa Niospa ato yoima fatora yora shara nĩpanaka, akka fatorari omiskõipakenaka. Ẽfi Niospa Fakeki. Ea nĩchini ẽ yorafo yoinõ fatofomãki a afe nĩpanakafo, akka fatoforimãki a omiskõipakenakafo.

²³Nãskaxõ yorafãfe Epa Nios yoixikani: ‘Mĩ fãsi shara. Tsõa mia finõtiroma,’ ixõ yoixikani. Nãskarifiakĩ eari yoixikani ẽmãi ãfe Fakekẽ. Ea nĩchini. Akka iskaratĩa ea tsõa yoisharaima. Ẽfe Epa Niosri askari fakani yoisharakima.

²⁴“Ẽ mato chanĩmakõi yoinõ. Fatoto ẽfe meka nikasharaimãkai, akka nã ea nĩchiniri, fatotori chanĩmara faimãkai nãfi ẽfe Epa Nios fe nĩpanakakĩ. Akka iskaratĩa yorafo oa naa keskara ikafo Nios Ifofaamax. Akka Epa Nios chanĩmara fakanax afe ipanakafo. Nafiax afianã otoxikani.