San Juan 5:2-24

²Dan me se chumanꞌ Jerusalén roꞌ, vaa ꞌo̱ na cuꞌna̱j Betesda xnaꞌánj aꞌmii nij síí israelitá a. Nichru̱nꞌ naj na yoꞌ ga̱ taꞌyaa atúj matzinj, ne̱ vaa ꞌu̱nꞌ veꞌ ne̱ nu̱ꞌ anica̱j tuꞌva na yoꞌ a.

³Rá veꞌ yoꞌ mán ndoꞌo síí ninaj do̱ꞌ, síí tuchri̱i do̱ꞌ, síí rengo̱ do̱ꞌ, síí nuu chrúnj raꞌa do̱ꞌ a.

⁴Dan me se nda̱a vaa orá nanij yoꞌo̱ se‑mo̱zó síí ꞌni̱j raꞌa man níꞌ rá na yoꞌ, ne̱ tanica̱j soꞌ na yoꞌ, taj nij yuvii̱ yoꞌ a. Ne̱ ga̱a anica̱j na yoꞌ, ne̱ síí nanij asino ya̱a̱n rque na roꞌ, o̱rúnꞌ soꞌ güe̱j na̱j guun chiꞌii̱ xráá, taj uún nij yuvii̱ yoꞌ a.

⁵Ne̱ na̱j yoꞌo̱ snóꞌo tuꞌva na yoꞌ, ne̱ síj ico̱ xnu̱ꞌ vaꞌnu̱j ya̱ yoꞌ ranꞌ soꞌ a.

⁶Dan me se queneꞌen Jesucristó man soꞌ se vaa na̱j soꞌ rej yoꞌ, ne̱ a̱j queneꞌen Jesucristó se vaa guun queꞌe̱e̱ yoꞌ ranꞌ soꞌ, ne̱ xnáꞌanj Jesucristó man soꞌ, cataj Jesucristó a: ―Nahu̱un sa̱ꞌ so̱ꞌ, rá so̱ꞌ naꞌ ―taj Jesucristó rihaan soꞌ a.

⁷Ne̱ cataj síí ranꞌ yoꞌ rihaan Jesucristó a: ―Na̱huún ꞌu̱nj raj, tza̱j ne̱ taj va̱j tuvíꞌ ꞌu̱nj síí ti̱nanij mán ꞌu̱nj rá na ga̱a anica̱j na, man señor. Cheꞌé dan me ga̱a ꞌanj ꞌu̱nj tuꞌva na yoꞌ, ne̱ guun yucua̱nꞌ yoꞌó soꞌ, ne̱ asino soꞌ atúj rque na rihanj na̱nj ado̱nj ―taj soꞌ rihaan Jesucristó a.

⁸Ga̱a ne̱ cataj Jesucristó rihaan soꞌ: ―Na̱xagaa so̱ꞌ, ne̱ na̱xcaj so̱ꞌ tuvéé so̱ꞌ, cache̱e̱ so̱ꞌ á ―taj Jesucristó rihaan soꞌ a.

⁹Ga̱a ne̱ nu̱ꞌ nahuun sa̱ꞌ snóꞌo yoꞌ, ne̱ naxca̱j soꞌ tuvéé soꞌ, ne̱ caꞌanj soꞌ a. Ne̱ güii nahuun sa̱ꞌ snóꞌo yoꞌ me güii naránj rá nij yuvii̱ israelitá a.

¹⁰Cheꞌé dan me nij síí uun chij rihaan nij yuvii̱ israelitá me se cataj nij soꞌ rihaan síí nahuun sa̱ꞌ yoꞌ: ―Güii naránj rá níꞌ me nihánj á. Ne nó xcúún so̱ꞌ ca̱tá so̱ꞌ tuvéé so̱ꞌ cuanꞌ maꞌ ―taj nij soꞌ rihaan soꞌ a.

¹¹Ga̱a ne̱ cataj soꞌ rihaan nij soꞌ a: ―Tza̱j ne̱ síí quiꞌyaj nahuun sa̱ꞌ ꞌu̱nj roꞌ, soꞌ me síí caꞌneꞌ suun rihanj na̱xcaj ꞌu̱nj tuvéé ꞌu̱nj ne̱ cache̱e̱ ꞌu̱nj ado̱nj ―taj soꞌ rihaan nij soꞌ a.

¹²Ga̱a ne̱ xnáꞌanj nij soꞌ man soꞌ, cataj nij soꞌ: ―Me síí cataj rihaan so̱ꞌ na̱xcaj so̱ꞌ tuvéé so̱ꞌ ne̱ cache̱e̱ so̱ꞌ ga̱ ―taj nij soꞌ rihaan soꞌ a.

¹³Tza̱j ne̱ ne queneꞌe̱n síí nahuun sa̱ꞌ me síí quiꞌyaj da̱nj maꞌ. ꞌO̱ se ga̱a quisíj nahuun sa̱ꞌ soꞌ, ne̱ naxuun Jesucristó man maꞌa̱n soꞌ cachén Jesucristó scaꞌnúj nij yuvii̱ ma̱n anica̱j niꞌya̱j man síí nahuun sa̱ꞌ yoꞌ, caꞌanj soꞌ a.

¹⁴Veé dan, ne̱ nariꞌ Jesucristó man síí nahuun sa̱ꞌ yoꞌ rá nuvií noco̱o, ne̱ cataj Jesucristó rihaan soꞌ a: ―Ya̱ nahuun sa̱ꞌ so̱ꞌ á. Ta̱náj so̱ꞌ chrej chiꞌi̱i̱ á. Sese taj, ne̱ ca̱nica̱j uún chiꞌii̱ mán so̱ꞌ, ne̱ doj a̱ qui̱ránꞌ so̱ꞌ na̱nj ado̱nj ―taj Jesucristó rihaan soꞌ a.

¹⁵Dan me se cavii snóꞌo yoꞌ, ne̱ nataꞌ soꞌ rihaan nij síí uun chij rihaan nij yuvii̱ israelitá se vaa Jesucristó me síí quiꞌyaj nahuun sa̱ꞌ soꞌ a.

¹⁶Cheꞌé dan guun rá nij síí uun chij yoꞌ quiꞌya̱j nij soꞌ sayuun man Jesucristó, cheꞌé se güii naránj rá nij soꞌ me güii nahuun snóꞌo yoꞌ, quiꞌyaj Jesucristó a.

¹⁷Ga̱a ne̱ cataj Jesucristó rihaan nij soꞌ a: ―Réj me se ne anicunꞌ soꞌ ga̱ suun maꞌ. Cheꞌé dan yoꞌo̱ ꞌyaj suun ma̱ꞌanj ado̱nj ―taj Jesucristó rihaan nij soꞌ a.

¹⁸Cheꞌé dan doj a̱ nanoꞌ nij soꞌ da̱j quiꞌya̱j nij soꞌ, ga̱a ne̱ caꞌve̱e cavi̱ꞌ Jesucristó a. ꞌO̱ se nuveé cheꞌe̱ ina̱nj tinavij Jesucristó tucuáán noco̱ꞌ nij soꞌ cheꞌé güii naránj rá nij soꞌ me guun rá nij soꞌ cavi̱ꞌ Jesucristó maꞌ. ꞌO̱ se cheꞌé se cataj soꞌ se vaa Rej maꞌa̱n soꞌ me Diose̱, cheꞌé dan guun doj rá nij soꞌ cavi̱ꞌ Jesucristó na̱nj ado̱nj. Dan me se ase vaa Diose̱ vaa maꞌa̱n soꞌ, taj soꞌ a.

¹⁹Cheꞌé dan cataj Jesucristó rihaan nij soꞌ a: ―Dan me se cata̱j xnaꞌanj yá yá ꞌu̱nj rihaan soj a. Dan me se ase vaa xnii rihaan rej xnii roꞌ, da̱nj vaa ꞌu̱nj si̱j taꞌni̱j Diose̱ nihánj rihaan Réj Diose̱, ne̱ ne uun nu̱cuáá ꞌu̱nj ꞌyáá ꞌu̱nj se vaa rii nimán ma̱ꞌanj maꞌ. ꞌO̱ se ina̱nj ꞌyáá ꞌu̱nj nda̱a vaa ꞌyaj Réj Diose̱ neꞌenj a. Ne̱ ase vaa ꞌyaj gue̱e̱ soꞌ roꞌ, veé da̱nj vaa gue̱e̱ ꞌyáá ꞌu̱nj uún ado̱nj.

²⁰ꞌO̱ se ꞌe̱e̱ ndoꞌo rá Réj Diose̱ niꞌya̱j soꞌ manj cheꞌé se taꞌni̱j soꞌ mej, ne̱ tihaa̱n soꞌ manj nu̱ꞌ se vaa ꞌyaj soꞌ a. Ne̱ suun sa̱ꞌ doj rihaan suun sa̱ꞌ quiꞌyáj queneꞌen soj cuano̱ roꞌ, ti̱haa̱n soꞌ manj a. Yoꞌ me se doj a̱ cara̱yaꞌa̱nj soj ni̱ꞌyaj soj suun sa̱ꞌ yoꞌ ei.

²¹Dan me se ase vaa nuu iꞌna̱ꞌ uún nij síí caviꞌ ꞌyaj Réj roꞌ, da̱nj qui̱ꞌyáá ꞌu̱nj uún ado̱nj. Dan me se cunu̱u iꞌna̱ꞌ uún na̱j guun yuvii̱ qui̱ꞌyáá ꞌu̱nj, sese gu̱un rá ꞌu̱nj cunu̱u iꞌna̱ꞌ uún nij soꞌ ado̱nj.

²²Dan me se ne aꞌneꞌ Réj Diose̱ cacunꞌ cheꞌé a̱ doj yuvii̱ maꞌ. ꞌO̱ se a̱j caꞌneꞌ soꞌ suun rihanj si̱j taꞌni̱j soꞌ se vaa caꞌne̱ꞌ ma̱ꞌanj cacunꞌ cheꞌé cunuda̱nj yuvii̱,

²³ne̱ ase vaa aráj cochro̱j yuvii̱ rihaan soꞌ roꞌ, da̱nj ga̱a̱ cara̱a̱ cochro̱j yuvii̱ rihanj ado̱nj. Dan me se síí naꞌvej rá cara̱a̱ cochro̱j rihanj si̱j taꞌni̱j Diose̱ me se soꞌ me síí se̱ guun rá cara̱a̱ cochro̱j rihaan nda̱a Réj Diose̱ síí caꞌnéé manj a.

²⁴“Ya̱ ya̱ cata̱j xnaꞌanj ꞌu̱nj rihaan soj cuano̱ se vaa síí uno se‑na̱na̱j ne̱ amán rá niꞌya̱j man síí caꞌnéé manj roꞌ, se̱ cutaꞌ Diose̱ cacunꞌ xráá soꞌ maꞌ. Dan me se daj chiha̱a̱ míj se̱ caviꞌ nu̱ꞌ soꞌ maꞌ. Tana̱nj ga̱a̱ iꞌna̱ꞌ soꞌ nu̱ꞌ cavii nu̱ꞌ caꞌanj ga̱ Diose̱ ado̱nj.