Juan 5:1-27

¹Jadya juu jadya junucatsutu Jesús Jerusalénju yudijidya cuanuca jucuare. Tuhuatu israelita cuana chine jucuare.

²Tuhua Jerusalenjutu ena cani dyaque quinidaque anicuare. Israelita cuanaja yana equetu tumeque ena cani Betzata bacani jucuare. Tumeque ena canitu jucuare epu tachiquique uhuisha cuana epuju nubiquique cani japadama. Anicuaretu pishica etare caca cuana ujejeda cuanaque jara ishuque. Etare caca cuanaja etabutu jucuare.

³Tuhuatu jarabarecuare umada ujejeda cuanaque. Anicuaretu shuhui cuanaque, ajebaecua cuanaque, ecaturuti cuanaque jadya. Tuhuadya tunajatu ihuacuare ena muhuehueyaque.

⁴Juatsudya juatsudyatu barepa juque Yusu tsahuaquique bute bahue jucuare ena cani ebari juque ena muhuehuesha ishu. Tura ena muhuehueshayajudyatu ujejeda cuanaque ena caniju nubi bahue junenicuare. Ena muhuehueyaju icuene nubiyaque camadyatu chacha jubahue jucuare.

⁵Tuhuatu jaracuare ecuita eje uma mara ujejedaque. Quimisha tunca quimisacarucu earacana mara ajebaecuaquetu jucuare.

⁶Tuhua nubitsutu Jesúsra bacuare tumeque ecuita. Turatu adebacuaredya tumeque ecuita mara mara ajebaecuaque jarayaque. Isaranaticuare tuja tuque: —¿Netitsuracarami juya, tata? —jadya tujatu bacaduranaticuare.

⁷—Jejee, Ecuatsashaquique. Netitsuracara taa juya. Jadya ama buchari aijama ejeque ique ena muhuehueyaju isha ishu. Ique bucucutaqui ama juya tibu, peya cuanara bareya jutidya, —jadyatu ajebaecuara acuare Jesús

⁸—Netitsuracue. Huesacue micue jara ishuque. Dirucue micue etareju, —jadyatu Jesúsra acuare ujejedaque.

⁹Jadya Jesúsra ahuaju cuitadyatu ecuita netitsuratsu ajecuare. Ajetsutu cahuesatiquenacuare tura jara ishu ahuaque. Cahuesatitsutu diruquenacuare. Canajara huecacajutu Jesúsra ecuita ebucucujacaque chachanecuare.

¹⁰Israelita huaraji cuanaratu bacuare tura jara ishu ahuaque cadujutiyaju. —Riyaque huecaca ri canajara huecaca. Ecuanaja cacuatsashati eque amami juya. Dujuta baecuatu ni ai buchique canajara huecacaju, —jadya tunajatu acuare.

¹¹—“Huesacue micue jara ishuque. Dirucue micue etareju”, jadya ique ajeshaquira ahua, —jadya tuna acuare ecuita chacha juhuara.

¹²—¿Aira jatsumi jadya ahua: “Huesacue micue jara ishuque. Dirucue”, jadya? —jadya tunajatu bacaduracuare.

¹³Ajebaecuaque netitsurahuaquetu baecua jucuare tuque ajeshaquique ai bacanique. Tuque ajeshatsutu Jesús masadama cuinanacuare ecuita jetiama ducuque. Jadya tibutu ecuitara eje bucha bacadurataqui ama bacuare tuja ebacani.

¹⁴Jadya junucatsutu Jesúsra ecuita tsurunucacuare Yusuja etareju. —Amena mi juneniya. Cajuchatinucaume. Eajejacanucau mique, —jadyatu Jesúsra acuare.

¹⁵Tuhuatu ecuitara adebacuare Jesús tura nityatsuratsu ajeshahuaque. Tumetu cuinanacuare. Cuinanatsutu israelita cuanaja huaraji cuana tsehue quisaratira cuacuare. —Jesusradya tucue ajeshahua, —jadya tujatu ecana aticuare.

¹⁶Israelita cuanaja huaraji cuana tuna dyaque ecahuaiti jucuare Jesús tsehue, tura ujejedaque canajara huecacaju chachanehua baatsu. Quisaratitibunecuare tuna tuja ishu. Ujeu tsehue tunajatu petacuare.

¹⁷Jesústu bahuedya jucuare tuna tuatsehue dyaque ecahuaitique. Acuare tujatu ecana: —Ecue Etatatu dutya huecaca mere juya; ique tumebaedya mere jujacaya ama, —jadya tuna Jesúsra acuare.

¹⁸Jadya tuque juyaju bacatsutu israelita cuanaja huaraji cuanara dyaque iyecara acuare. Iyecara tunajatu acuare, tura canajara huecacaju ahuaque tunara tumeque huecaca ataqui ama bucha bayaque ahua baatsu. Jadya juatsu camadya ama tuna tuatsehue dyaque ecahuaiti jucuare. Iyecara tunajatu acuare tuque Yusu tsehue beta tupu jadya catiyaju, Yusupa tuja Etataque cuitadya jadya juyaju bacatsu.

¹⁹Jesusratu israelita cuanaja huaraji cuana anucacuare: —Pusha amadya micuana cuejaya. Era quisarati ayaque, ai era ayaque tuque ecue casa tsehue ama aya, ni riya piji buchique. Dutya tuque aya ecue Etataja casa tsehue. Ecue Etatara ayaju ebaque camadya tuque aya. Ecue Etatara ayaque era dyaditu jadidya aya, ique tuja Ebacuaque juya tibu.

²⁰Ecue Etatara ique dyaque iyuhueda baya, tuja Ebacuaque tibu. Turatu ique tyaishu ni ai en aya ama. Dutya tuja casa tura tyahua, tura ai ayaque ecue dyadi aishu. Tuja casa tsehue tuque ujejeda cuanaque chachaneya. Ayadya tuque dyaque ibedaque tuja casa bamere ishu. Baatsu micuana anajacataya.

²¹Ecue Etataratu emaju cuanaque yudijidya nityatsuranuca aya. Chacha tujatu ecana amerenucaya. Tuatsehue tujatu ecana anishanucaya tere nuca ishu ama. Eratu tumebaedya emaju cuanaque nityatsuranucaya. Ecue jadya inimeque juatsu tuna chachadya amerenucaya, ique tuja Ebacuaque tibu.

²²Ecue Etatara ama “Tuna ecajuchati” jadya abuque. Ique tura tyahua casa “Dutya jidama cuanaque ecajuchati” jadya aishu.

²³Jadya tura ique amerehua dutyaja tunaja ique mui ishu, tuque muitaya bae cuitadya ique muita ishu. Ique ni micuanara muiya ama, jutaquiju taa tuque micuana ecue Etata Ique Cuadishaquique muiya amadya.

²⁴“Pusha amadya micuana cuejaya. Era cuejaya eque aniya cuanaque, Ique Cuadishaqui queja catyatiya cuanaque tuna tere baecua anibuque. Yusu queja tuna judirubuque ni eje tupu jacanuca ishu ama. Yusuratu ni riya piji buchique juchaqui baya ama tuaqueja catyatiya cuanaque. Icuene tunajatu Yusu japada bacuare. Emaju bucha tuna junenicuare. Iyacua tuna amena chacha aniya.

²⁵Pusha amadya micuana cuejaya. Iyacua emaju bucha cuanaratu bacaya era cuejayaque. Yusuja Ebacuaque queja catyatitsu, tuna Yusuja yacuaju anibuque.

²⁶Jadya anie tuna Yusu tsehue terenuca ishu ama jubuque, ecue Etataja tuna jadya anisha ishu casa aniya tibu. Tumebaedya tura ique tyahua tumeque casa eaqueja catyatiya cuanaque tere baecua anisha ishu.

²⁷IQUE ECUITA tibu, ecue Etatara cuatsashahua jidama cuanaque nerecatura ishu, cuejaya equedya aniya cuanaque jidaque tyaishu jadya.