Ioane 5:1-27

¹Ina ta murina eai abo Iudea tataodi se mataasi; to Iesu ie sae Ierusalema.

²Goila esau Ierusalema eai, mamoe edi aba sorasora hasarina eai, Heberu arinadi si ene Beteseda, sorasorana haligigi.

³Sorasoradi wa alodi eai tauasiasiebo tataodi gamagaridi arinai se ota; tatao matagibubudi eo, tatao laulaudaedi eo tatao taudi se matemate, goila wa tabutabubuna se bagibagiei.

⁴Huia headi, Guiau ena aneru esau i gaeopesadobi ipuna eai, goila wa abo i hetabutabubu; goila wa i tabutabubu wa, tau esau i daladobi baguna i aiduidui, ana iwala saha abo se lautom.

⁵Tau esau nei eai borimai tau‐imate‐saudoudoi‐haligigi‐haiona i aiiwala.

⁶Iesu tau wa i ita ie ota, i nuatuiyao ana iwala huiana ie loha, i ribalau ia arinai i ene, “U henua bena se hemaurim?”

⁷Tauaiiwala wa, ia i heuio i ene, “Taubada e, goila wa ma tabutabubuna eau nige tauhesosoaegu abo i laegu ipuna eai, ma laugu na esau i aiduibaguna.”

⁸Iesu ia i heriba i ene, “U torohai em eba u abidi, u lau.”

⁹Arinai abo tau wa ana iwala i tatapesa, ena eba i launou abo ie lau. Nei huiana ne Sabati.

¹⁰Iudea tataodi se ribalau tau se hemauri wa arinai, si ene, “Wau Sabati ina: em aba‐eno u baheidi arinai laugagaeo u utusi.”

¹¹Ia i ribalau isi aridi eai i ene, “Tauhemaurigu i ene, ‘Em eba u abidi, u lau.’”

¹²Isi se oimurilau ia arinai si ene, “Aitea tau i heribam i ene, ‘Em eba u abidi, u lau?’”

¹³Tau se hemauri wa tauhemaurina nige i nuatui: na Iesu i lausuarao, paana ede moutuadi nei eai.

¹⁴Abotai Iesu tau wa numa tabuna alona eai i lobai, to i ribalau ia arinai i ene, “Hage! oa se helolom wa: baaea tabu u abiuioi, ata ginauri baabaaea ariri se hearom.”

¹⁵Tau wa abo ie lau Iudea tataodi i heribadi, i ene, “Tauhemaurigu ede Iesu.”

¹⁶Arinai Iudea tataodi Iesu bena se heamamna, eo se eooi bena si unui, paana ede teina laulau ta Sabati eai i laulauei.

¹⁷Iesu i heribadi i ene, “Tamagu i paipaisoa, eau hinage ea paisoa ta.”

¹⁸Arinai Iudea tataodi se eoodaoi ia bena se unui, paana ede Sabati laugagaeona i utusi, eo paana hinage i ene Eaubada ia Tamana ede, doha hinage i ene ia eo Eaubada gonogonoadi.

¹⁹Arinai Iesu i ribalau aridi eai i ene, “Mamohoi, mamohoi, ea heribamiu ta, Natuna iabom taba nige saha abina i ata i ginauri, Tamana ana paisoa ie ita meta mo abina i ata: eo ginauri gamagaridi Tamana i ginauridi doha ede Natuna i ginauridi hinage.

²⁰Tamana, Natuna i gadosisiei, ginauri gamagaridi ia i ginauridi ia i heita: hinage ginauri se gigibori ariri abo ia i heita bena abo au nooedi.

²¹Doha Tamana tatao se mate i hetorouioidi eo i hemauridi, Natuna hinage headi i henua abo i hemauridi.

²²Tamana nige tau esau i hedudurai, hedudurai gamagaridi i moselaei Natuna arinai.

²³Bena tatao gamagaridi abo Natuna se heasisiei doha hinage Tamana se heasisiei. Esau Natuna nige i heasisiei, ia Tamana, tauhetamariamana nige i heasisiei hinage.

²⁴Mamohoi, mamohoi, ea heribamiu ta, egu riba tauataiena, eo ia tauhetamariguma hinage i sunusunumaei, mauri nige nosina i abiyao, eo ia taba nige se hemaisa, ia mate i diogabaei, ie lage mauri eai.

²⁵“Mamohoi, mamohoi, ea heribamiu ta, huiana i lagema, hinage i lagemao, taumatemate tataodi Eaubada Natuna arinana abo se ataiei; isi hinage tauataiena abo se mauri.

²⁶Doha ede Tamana ena mauri i abi ia boeana eai, i moseheawa Natuna arinai, hinage ia mauri i abi ia boeana eai;

²⁷ia hinage i hetoro ma gigiborina ia tauhedudurai, paana ia Tau Natumamohoina ede.