SAN JUAN 5:1-27

¹Cuahn che quenan ca Dihvo vo esta̱do yahn Galilea ne, quenun a̱ma vihco yahn ihyan nación yahn Israel min ya̱n Jerusalén, ne cuahn Dihvo vo vihco me.

²A̱ma chendevah yahn chete che ndacoriya ya̱n min ne, duche Chendevah yahn Itecuche. Nino chendevah min ne, va a̱ma tanque nune che duche Betesda, che deva̱co hebreo. Chihto tanque me ne, chendihco uhn corredor,

³ne min chenun a̱ma ya̱hn ihyan che ve na̱n ye ma̱n, ihyan che neneva doh ca̱h ye ma̱n, ihyan che ndi cheche ye ma̱n, chenan rino ye ura che nuhn nune me.

⁴Yahn quenun riya a̱ma ángel, rendahcheta̱hn ye nune me, ne ihyan che conun conda̱ ye va̱n nune me ura che cuihno ndahcheta̱hn ne, ndoyahn ye, adecodehno che ndi yahn ye.

⁵Min quendite a̱ma sa̱hn che a ri ndico ntihyon ino nduyo che ndi cheche se.

⁶Nda̱ Dihvo vo min, ne ndihchero ye sa̱hn. Checadino ye che a ra̱hn cuahn ndi cheche se, ne tumerune ye sa̱hn: ―¿A nehn che ndoyehn ne?

⁷Ndaconan se yahn ye: ―Ta̱ca̱ hua. Nahn che ndoyáhn, ate metah duh ihyan che quenda ye u va̱n nune ura che nuhn. Queri a̱ma yune che redín fuerza, nahn conda̱ va̱n nune ne, ta̱ma ca ihyan rechuhnan ye u, renda̱ ye.

⁸Tuhme ra̱hn Dihvo vo ri ye sa̱hn: ―Cuenecuen, condo tah yundo yehn, ne cuique.

⁹A ndeta̱hno ndoyahn sa̱hn min, ndo ta̱h se yundo yahn se, ne cana̱n rica se. Ro min ne, a̱ma ro che rahtetuhno ihyan,

¹⁰ne a̱ma o sa̱hn ndina̱n yahn nación yahn Israel ne, ra̱hn se ri se sa̱hn che ndoyahn me: ―Ma̱n ne, ro che rahtetuhno vo. Hua redin yahn che din ntiyon, quenohn yundo yehn.

¹¹Ndahconan sa̱hn min, ne ra̱hn se ri se sa̱hn chahn: ―Hua te, a ma̱n ihyan che din ye che ndoyáhn, chihquentiyon ye che quenúhn yundo yáhn, ne ca̱cá.

¹²Tuhme tumerune sa̱hn chahn sa̱hn: ―¿Duh ihyan min che chihquentiyon ye che quenohn yundo yehn, caque ne?

¹³Ate sa̱hn min ne, nde hua devano se che a Dihvo vo Jesucristo che din ye che ndoyahn se, te a̱ma ya̱hn ihyan chenun ye min, ne ndeta̱hno chenda̱ ye va̱n ihyan, cheh na̱n se ihyan.

¹⁴Adive ne, ndihchero Dihvo vo sa̱hn, quenun se chete ya̱co, ne ra̱hn ye ri ye sa̱hn: ―Cuihcoven che ca̱hmá có di. Ma̱n che a ndoyehn ne, ametah ndaconen condihque nunde ca̱va che hua cota̱h ta̱ma cah di, din che tahque chuhrihn.

¹⁵Tuhme chahn sa̱hn min, chengo se sa̱hn ndina̱n chahn che a Dihvo vo che din ye che ndoyahn se.

¹⁶Nducote a ro che rahtetuhno ihyan redin Dihvo vo che rendoyahn ihyan cah ne, chemin che din ta̱n sa̱hn chahn nduco ye, nahn ca̱hno se ihyan.

¹⁷A̱ma yune ne, ra̱hn Dihvo vo ri ye sa̱hn chahn: ―Chidá ne, cuahn da̱ma redin ye che ndah ca̱va ihyan, ne u ne, riquendí yune yahn ye.

¹⁸Che tihca̱ ra̱hn ye ne, nde tahque chi ta̱n sa̱hn ndina̱n chahn, nahn ca̱hno se ihyan, te cuahn che ra̱hn ye te a Dendiohs che Chida ye ne, ra̱hco se te duche rino ye ihyan, nahn co ye da̱ma nduhca̱ ihyan min. Ava̱ne ne, nducote redin Dihvo vo che rendoyahn ihyan cah, andahre ro che rahtetuhno ihyan ne, ra̱hco se te rahcota̱hn ye che rihquentiyon ley nduhca̱ che rahtetuhno ihyan.

¹⁹Tuhme ra̱hn Dihvo vo ri ye sa̱hn chahn: ―Cua̱co rá̱hn rí nchuhn te hua co dín nde a̱ma na̱n ntiyon che ndiyu ntiyon yahn Chidá. Nducuahn che redin ye ne, namin redín.

²⁰Chidá ne, yahino ye u, ne ma̱n ye nduco ye u redin ye nducuahn vederihno. Nde va ca vederihno che tahque rahte che din ye, ne a̱ma ca̱hn ino nchuhn.

²¹Cuahn che má̱n náhn ne, nde ndedetuhché tena̱hn, nduhca̱ che redin Chidá.

²²Chidá ne, nda̱hco ye vederihquentiyon yahn ye tá̱h, ca̱va che techeca̱dé yahn nducoya̱ca ihyan,

²³te nahn ye che ndeva ihyan yavená̱n nduhca̱ che rendeva ihyan yavena̱n ye. Ihyan che hua rendeva ye yavená̱n ne, namin hua rendeva ye yavena̱n Chidá, ihyan min che dechuh ye u.

²⁴’Cua̱co rá̱hn rí nchuhn te ihyan che rihcovan ye ndudo yáhn, ne ritahno ye ihyan min che dechuh ye u ne, cuahtenan ye vahchetero numacuahn ro. Ihyan chahn ne, hua conda ye, te ndevahn ye.

²⁵Cua̱co rá̱hn rí nchuhn te nducoya̱ca ihyan nunde ne, anduhneca̱ ndete che a ndih ye na̱n Dendiohs. Ma̱n ne, a nda̱ ro che cahnevan ye ndudo yáhn, ne nducoya̱ca ye che cotahno ye ne, ndevahn ye.

²⁶Tihca̱, te Chidá ne, quenan cuma ye vederihquentiyon ca̱va che ndedevahn ye ihyan iyehnse, ne nda̱hco ye vederihquentiyon min tá̱h.

²⁷Namin nda̱hco ye vederihquentiyon tá̱h ca̱va che techeca̱dé yahn ihyan iyehnse, te a u che rinducó nducoya̱ca ihyan.