3Irootaki Jesús ishitowantanakari Judea-ki, ipiyaawo Galilea-ki.
4Ari iintathakitziri inkinanairo iipatsitiki Samaria-jatzi.
5Irojatzi jariitantakari nampitsiki saikatsiri Samaria-ki oita Sicar, iro tsipanampitawori iipatsiti pairani Jacob-ni ipanairiri itomi, José.
6Ari osaikakiri jiñaa iiyakotani Jacob-ni. Tima jimakokitaki Jesús janiitaki, isaikimotapaakiro jiñaa, jiwiyaaka tampatzika ooryaa.