Juan 4:11-20

¹¹Jalla nekztanaqui naa maatakqui tuz̈ cjichinc̈ha: —Señor, am anaj kjaz coozizzamla. Tii tuj kozic̈ha. ¿Jakzictanam nii z̈ejtñi kjaz tjaasajo?

¹²Uc̈hum Jacob cjita tuquita ejpqui tii tuj ecanchic̈ha. Niz̈aza tii tujquiztan kjaz licñitac̈ha, niz̈aza niiz̈ maatinacami, niz̈aza niiz̈ animalanacami. ¿Amqui niiz̈quiztan juc'antim cjes, kjaz̈tatajo?

¹³Jalla nekztanaqui Jesusaqui naaquiz cjichic̈ha: —Jakziltat tii tuj kjazquiztan licc̈haja, jalla niiqui wiltaz̈ kjaz pecaquic̈ha.

¹⁴Pero jakziltat weriz̈ tjaata kjaz licc̈haja, jalla niiqui anaz̈ iya kjaz pecñiz̈ cjequic̈ha. Weriz̈ tjaata kjazqui niiz̈ persun kuzquiz tsjii jalzuriz̈takaz cjisnaquic̈ha wiñaya z̈ejtzjapa.

¹⁵Jalla nekztanaqui naa maatak z̈onqui niiz̈quiz cjichinc̈ha: —Señor, nii kjaz tjaalla, ana iya kjaz peczjapa, niz̈aza tii tujquiz ana iya kjaz cooyi tjonzjapa.

¹⁶Nekztanaqui Jesusaqui naaquiz cjichic̈ha: —Oka, am luctaka kjawz̈ca. Nekztan wiltam wejtquin tjonaquic̈ha.

¹⁷Naa maatak z̈onqui tuz̈ kjaazic̈ha: —Ana luctakchiztc̈ha. Jalla nuz̈ kjaaztiquiztan Jesusaqui tuz̈ cjichic̈ha: —Amqui weraram chiic̈ha, “Ana luctakchiztc̈ha” cjicanaqui.

¹⁸Amqui pjijska luctakchiztakalala amqui. Jalla niz̈tiquiztan anziqui am lucum cjic̈haja, jalla niiqui anaz̈ am ultim lucuqui. Jaziqui weraram chiic̈ha.

¹⁹Jalla nekztanaqui naa maatak z̈onqui Jesusiz̈quiz tuz̈ cjichinc̈ha: —Señor, amc̈ha profetaqui, nuz̈ tantiyuc̈ha.

²⁰Wejtnaca tuquita ejpnacaqui tii curquiz Yooz rispitñitac̈ha. Anc̈huc judío z̈oñinacazti cjiñchucc̈ha, Jerusalén wajtquin Yooz rispitsa, nii.