Juan 4:1-39

¹Tsa mbin re fariseo lee dits Jesús ndeke masraa zha nake dits Juan, ne masraa zha nda ntsowleyy Jesús nake Juan.

²Per tegal leet Jesús ntsowleyy re men, sinke re zha kuu ngeteed lo Jesús ntsowleyy re men.

³Ne leettsa myeen Jesús kona, tsa mroo Jesús yezlyu Judea ne nda Jesús yezlyu Galilea tedib welt.

⁴Per or nda Jesús, ndoblo rid Jesús yezlyu Samaria.

⁵Tsa mzin Jesús thib yez chaan Samaria kuu le Sicar, ne gax tya nax thib le yu kuu mndaa Kob lo Che xgann Kob.

⁶Ne tya ndob pos kuu ni re zha pos Kob. Ne tak ngokwan Jesús ndo Jesús net, tsa mneyy Jesús thib lad roo pos. Kona ngok teeka ndrol wiz.

⁷Ne lee re zha kuu ngeteed lo Jesús, mlaa zha Jesús, ne nda re zha yez ndati zha kuu wu zha. Ne ora lee thib ngot kuu nak zha yez Samaria ngwaxii nit roo pos, tsa nzhab Jesús lo ngot: ―Taa lut nit gun.

⁹Per lee re zha Israel nzaalt leettsoo kon re zha Samaria, kona lee ngota mkab, ne nzhab lo Jesús: ―¿Chebee lon naaba nit, si zha Samaria nakʼn ne lee lu nak zha Israel?

¹⁰Lee Jesús mkab lo ngot ne nzhab: ―Os leeʼa nlebeeʼa kuu nataak kuu ndelaaz Diox, ne os neʼa naa cho nak zha kuu ngenaab nit loʼa, ne os lu naaba nit lo zha, lee zha taa nit kuu ndaa yalnaban guʼa.

¹¹Tsa lee ngot nzhab lo Jesús: ―Zha Nabee, per neeka thib kuu ndenta par kooʼa nit, ne lee pos kwathoz naats, ¿ne pa nkenoʼa nit kuu ndaa yalnaban kuu taaʼa gun?

¹²Naa ¿chu masraa nataaka nake tey nee Kob? Lee zha mlaa pos ree lo nee, ne lee zha, re zhiinn zha ne re maa zha ngwii nit pos ree.

¹³Ora mkab Jesús ne nzhab Jesús lo ngot: ―Reta zha kuu nzhuu nit pos ree, tebre tob xyeek leettsoo zha,

¹⁴per lee zha kuu gu nit kuu tan, thitanax bret raa zha tob xyeek leettsoo zha, tak lee nit kuu tan gu zha, leettsoo zha gake taxal thib xlen nit, kuu ndaa yalnaban kuu thitanax.

¹⁵Tsa lee ngot nzhab lo Jesús: ―Zha Nabee, taa nita gun, tsa tob xyeegt raa leettsoon, ne tsa yalt raa na yaadlon nit nzhee.

¹⁶Ora nzhab Jesús lo ngot: ―Gwa gwaxii tsaala, tsaraa yaada nzhee.

¹⁷Lee ngot mkab ne nzhab: ―Naptʼn tsaalʼn. Tsa nzhab Jesús lo ngot: ―Wliʼa kuu neʼa, napta tsaala,

¹⁸tak mkenoʼa lu gaay tsaala, ne lee zha kuu napa nal, nagt zha tsaala, wliʼa kuu neʼa.

¹⁹Or mbin ngot kona, tsa nzhab ngot: ―Ndakʼn thib profet naka.

²⁰Lee re tey nee zha ndala mbil zha lo Diox yek yii ree, per lee re goo zha Israel mbez goo, yez Jerusalén nak ta ndoblo golaa lo Diox.

²¹Tsa lee Jesús nzhab lo ngot: ―Wlipaa na nin loʼa, too wiz kuu ndechet raa yaad goo yek yii ree, neeka Jerusalén, par gol goo lo Diox.

²²Lee re goo net goo cho lo nzhool goo, per lee re nee ne nee cho lo nzhool nee, tak lo re zha Israel ndyaad yalnaban kuu thitanax.

²³Per mzina or, ne nal nak or kuu lee re zha kuu wlipaa nzhool lo Diox, gol zha lo Diox taxal nlaaz Mbi Nayon chaan Diox. Tak tata nlaaz Diox gol re men lo Diox.

²⁴Diox nak mbi, ne lee re zha kuu wlipaa nzhool lo Diox, taxal nlaaz Mbi Nayon, ndoblo gol zha lo Diox.

²⁵Tsa nzhab ngot lo Jesús: ―Nen tyaad Zha Kuu taal Diox Nabee (kuu nak Crist), ne leettsa yaad zha, tsa ne zha naa xomod nak reta kwaa lo nee.

²⁶Jesús nzhab lo ngot: ―¡Na nak zhaʼa, kuu ngetediz loʼa!

²⁷Ne ora mzin re zha kuu ngeteed lo Jesús, ne kwathoz mzegey leettsoo re zha, tak mwii zha lee Jesús ngetediz kon thib ngot, per neeka thib zha myet leettsoo ganaabdiz, kwan nlaaz ngot o cho kwent ngetediz Jesús kon ngot.

²⁸Tsa lee ngota mlaa ree, ne ngwane ngot lo re men yez, nzhab ngot:

²⁹―Ndaa goo, tsa wii goo thib mbyi, kuu mne lon reta kuu mtsowʼn. ¿Naa chu nagt zha Crist Kuu Mtaal Diox Nabee?

³⁰Tsa mroo re zha ne ngwa zha ta ndo Jesús.

³¹Ne lee re zha kuu ngeteed lo Jesús, nzhab lo Jesús: ―Maestr, dow lut kwaa.

³²Per lee Jesús nzhab lo re zha: ―Napʼn thib kwaa wun, per net goo kwane.

³³Tsa lee re zha kuu ngeteed lo Jesús mndelo zha mnaabdiz zha lo altaa zha, ne nzhab zha: ―¿Chu nzo cho myaadtaan kuu ndow zha?

³⁴Per lee Jesús nzhab lo re zha: ―Lee kuu nzhowʼn nak, ntsowʼn kuu nlaaz zha kuu mtaalʼn, ne kona nak taxal kuu nzhowʼn, ne wlipaa teyelo tsow nay.

³⁵Lee re goo mbez: “Bee nzhak falt thap mbee par thop zha yalgonn”, per lee na ni lo re goo, wii goo, ngoka yalgonn ne mzina wiz thop zhay.

³⁶Lee zha kuu nke tsiin par thop yalgonn, nzhax lo zha, ne lee yalgonn kuu nthop zha, nak kuu xek thitanax, tsa lee zha kuu mloo bin, ne zha kuu mthop yalgonn kwathoz naley nzo leettsoo rop zha.

³⁷Wli kuu nzhab diiz: “Thib zha ngo bin lo yu ne lee tedib zha nthop yalgonn”.

³⁸Na mtaal goo thop goo yalgonn kuu ngonnt goo, tedib net zha nak zha kuu ngonne ne mtembiy, per lee re goo thope ne kayaay.

³⁹Kwathoz zha yez Sicar kuu nzi yezlyu Samaria ngwalaaz Jesús, tak lee ngota nzhab lo re zha: “Mne zha reta kuu mtsowʼn”.