Juan 2:7-14

⁷Entonces ojron e Jesús taca tin e war upuqui e comida axin tut e gente y che: —Yaric e jaꞌ tama tunor e bongo era este que abꞌutcꞌa tunor, che e Jesús. Entonces uchiobꞌ bꞌan cocha arobꞌnobꞌ umen e Jesús.

⁸Entonces e Jesús sutpa uyare otronyajr y che: —Locsenic imbꞌijc y qꞌuechic chic tut e ajyum nojqꞌuin, che e Jesús. Y bꞌan uchiobꞌ.

⁹Entonces conda e ajyum nojqꞌuin cay uyejta imbꞌijc e jaꞌ cꞌotoy unata que vino. Pero machi war unata tiaꞌ tari, ajtaca tin e war upuqui axin e comida war unatobꞌ que e vino era jaꞌ ani. Y tamar era e ajyum nojqꞌuin upejca tari e winic xeꞌ war anujbꞌi

¹⁰y uyare: —Tama inteꞌ nojqꞌuin bꞌajxan apujca axin e vino xeꞌ más galan uyuchnar, y de allí conda uchnix meyra vino acay aꞌjcꞌunobꞌ e vino xeꞌ más calapir. Pero net war acojco este era tuaꞌ awajcꞌu e vino xeꞌ más galan uyuchnar. Bꞌan che e ajyum nojqꞌuin uyare e winic xeꞌ war anujbꞌi.

¹¹Pues jax era e bꞌajxan milagro lo que chena umen e Jesús, y conda uche tunor era cay checsuna que jaxir ayan utawarer y tamar era uyajcanuarobꞌ cay cꞌupseyanobꞌ tamar jaxir. Pues tunor era numuy tama e chinam Caná tama e departamento Galilea.

¹²Entonces conda cꞌapa e nujbꞌiar ixin e Jesús esto tama e chinam Capernaum taca utuꞌ y uwijtzꞌinobꞌ y taca uyajcanuarobꞌ. Y yajaꞌ quetpobꞌ cora día.

¹³Pues entonces cocha war acꞌotoy e día tuaꞌ acay e nojqꞌuin tuaꞌ e gente tama e Israel xeꞌ ucꞌabꞌa pascua, ixin e Jesús esto tama e chinam Jerusalem.

¹⁴Y conda cꞌotoy tama e templo cay uwira que war achojna e sian wacax y e sian oveja y e sacsac mut. Y uwira que ayan tin e turobꞌ tor e mesa xeꞌ war uwechꞌiobꞌ ut e tumin.