Juan 1:2-34

²Lekat te ketebò te kedita, sikandin se doma te Timanem.

³Wedad palos ininang aw kenà pineokit kandin, so ininang te Timanem se kedita pineokit kandin.

⁴Sikandin se eglekatan te pedowan te kedita, aw yan se lowa eg-anyag diyà te kengitngit kidoen te pedowan te kedita te otaw.

⁵Yan heman se mekelowa te kengitngit. Wedà palos pekedaeg se kengitngit diyà te lowa sìyan.

⁶Doen otaw ngadan din si Juan Memonyagay. Insogò sikandin te Timanem

⁷meg-indan diyà te kedita te otaw te si Jesus se lowa te Timanem, amon memenal se kedita te otaw diyà ki Jesus pineokit te itoladà din.

⁸Kenà si Juan se lowa, meneng sikandin se insogò amon meg-indan tepad te lowa.

⁹Se benal lowa, yan se dimini te keneyonan amon mekelowa te kengitngit kidoen te pedowan te kedita te otaw.

¹⁰Dimini si Jesus te keneyonan, meneng pengkey ininang te Timanem se kedita dini te keneyonan pineokit kandin, wedà sikandin kilelai te menge otaw.

¹¹Pengkey dimoton te ogpeanan te kandin kedomaan, meneng wedà dan pegsagman kandin.

¹²Meneng pengkey sinu se migsagman kandin aw nemenal kandin, yan se otaw mepakay meinang menge batà te Timanem.

¹³Pegkeinang dan batà te Timanem, kenà iyan iling te pegtebaw te otaw dini te keneyonan. Kenà iyan heman lekat te ibeg aw aneng-aneng te otaw. Meneng lekat te ibeg te Timanem, ininang din dan menge batà din.

¹⁴Migpekeotaw sikandin iningedanan Kagi te Timanem, aw mig-ogpà sikandin doma kenami. Kinità day se kelangkaw din. Ontò sikandin melangkaw so sikandin se temisa Batà te Amay din. Ontò sikandin egpenabang, aw ontò benal se kagi din.

¹⁵Sikandin se in-indan i Juan Memonyagay te peg-ikagi din, “Seini se otaw tapay ko in-indan kenyo, so minikagi a te doen pa otaw meketetondog kanak aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw.”

¹⁶Ontò kidon din neidowan, aw gayed kidon din egtebangan te wedad temanan.

¹⁷Nemegay se Timanem kenitadon te punù din pineokit ki Moises. Meneng pineokit ki Jesu Cristo, nemegay se Timanem kenitadon te tabang din aw kebenalan.

¹⁸Wedad palos otaw kimità te Timanem. Meneng se Batà din temisa, yan se migpetaga-taga diyà kenitadon tepad te Amay din, so gayed dan egpedomaay.

¹⁹Doen menge pengolo te simbahan te Judiyo aw menge bowad-bowad i Levi dimoton ki Juan Memonyagay. Insogò dan te menge obanen te Judiyo lekat te Jerusalem amon meg-insà dan ki Juan aw sinu sikandin. Seini se inikagi i Juan, so wedà din boloni se kebenalan, meneng timaba sikandin, kagi din, “Kenà ko se Misiyas megpelowà kenyo.”

²¹Mig-insà dan, “Sinu ka lay? Si Elias ka lay?” Timaba si Juan, “Kenà ko.” Minikagi dan, “Sikona besi se sìyan doma telekeliwat te kagi te Timanem pinelimanan day.” Timaba sikandin, “Kenà ko.”

²²Todà dan minikagi, “Indani kay aw sinu ka, amon doen itaba day diyà te menge otaw simogò kenami. Eden lay se inangen no dini?”

²³Timaba si Juan, “Siak se otaw impakang te telekeliwat te kagi te Timanem gebii si Isaias, ‘Doen otaw kidoen te kebigtilan megpunù te keilangan meketagad se kedita te otaw, so agpet den domateng se Pengolo.’”

²⁴Se menge otaw mig-insà kandin, yan se insogò te menge Parisiyo.

²⁵Mig-insà dan heman, “Aw kenà nikaw se Misiyas megpelowà kenami, aw kenà nikaw heman si Elias limikò dini, aw kenà nikaw heman se sìyan doma telekeliwat te kagi te Timanem egpelimanan day, nengà lay egpemonyag ka?”

²⁶Timaba si Juan, “Egpemonyag a pineokit te wayeg. Meneng doen sebad otaw doma niyo wedà niyo kilelai.

²⁷Sikandin se meketetondog aw somelilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.”

²⁸Neinang se kedita niyan kidoen te lonsod te Bitanya doton dipag te wayeg te Jordan egbonyagan i Juan.

²⁹Keeldawan niyan, kinità i Juan si Jesus migpesalo diyà kandin. Pegkità din kandin, minikagi diyà te menge otaw kidoen, “Na, yan se Nati te Karniro imbegay te Timanem, so sikandin se mengabat te salà te kedita te otaw.

³⁰Seini se otaw tapay ko in-indan kenyo, so minikagi a te doen pa otaw meketetondog aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw.

³¹Kedengan, wedà ko pa ketegahi aw sinu sikandin, meneng yan se tod te pegbonyag ko pineokit te wayeg amon metaga-taga se kedita niyo bowad-bowad i Israel tepad te pegdateng din.”

³²Minikagi heman si Juan, “Kinità ko se Espiritu Santo migpedanà diyà kandin lekat te langit iling te selepati, aw mig-ogpà kidoen kandin.

³³Kedengan, wedà ko pa ketegahi aw sinu sikandin, meneng insogò a te Timanem amon memonyag a pineokit te wayeg, aw inindanan a din te komità a te Espiritu Santo megpedanà kidoen te otaw aw meg-ogpà kandin. Sebad heman kemolò se pegbonyag din, so sikandin se memonyag pineokit te Espiritu Santo.

³⁴Yan se kinità ko den, aw iindan ko den kenyo te sikandin se Batà te Timanem.”