Jone 1:2-34

²Tee pyala nayamo dokopa Pii dokopa Gote-pipa katea-pyaa.

³Baame dupa pitaka pyoo injia-pyaa. Dupanya mende waka mendenya-kaita pyakalyala nayamopa baame pyoo injia-pyaa.

⁴Baa ketae lete katenge doko sia-pyaa. Lete katenge dokome endakali dupa tii pisia-pyaa.

⁵Tii pipae dokome iminjetae doko tii pisilyamopa iminjetae dokome tii pipae doko ita naminingi.

⁶Akali mende Goteme epena leamopa ipao katea. Baa kenge Jone lenge.

⁷Baame pii lamaiyanya ipao katea. Endakali dupa pitakame baanya pii sepala masoo minina lao baame tii pipae dokonya lao pii lamaiyanya ipao katea.

⁸Jone baa tii pipae doko daa. Dopaka doko, baame tii pipae dokonya lao pii lamaiyanya ipao katea.

⁹Endakali dupa pitaka tii pisoo katenge tii pipae angi doko isa yuunya epea.

¹⁰Baame yuu dake pyoo injetala kateamopa yuunya endakali dupame baa masala nayami.

¹¹Baa baanya yuu tenge dokonya epeamopa baanya endakali dupame baa lanyala nayami.

¹²Dopaka doko, endakali baa lanyoo baa lao masoo miniami dupa baame kapana latala Gotenya wane injisia.

¹³Dupa Gotenya wane jiamino doko, endangi takangepinya ipangepi, yonge itangepi, endakalimi mandenge mana dokonyapi dupanya mendenya daa. Gote tangeme dupa baanya wanena lao mandea.

¹⁴Pii doko endakali jetala naimanya kainanya katea. Naimame baanya tii pipae doko kandeama. Tii pipae dopale doko Ikiningi mendai iki dokome Takange-kisa nyia. Baa mona epe palyakao paliuu kiningi mana minalakao minao katenge.

¹⁵Joneme baanya lao pii puu lao dapa lea: “Akali doko kandao nambame nyakama langyoo, ‘Namba watao maitapyao epelyamo akali doko nambanya alyasale. Doko, namba namandengesa baa wamba katea-pyaana,’” lea.

¹⁶Baa mona epe palyakao palipala naima pitaka kandao epawaka mona epe palea.

¹⁷Doko, Goteme mana setapae dupa Mosese-kisa maiya-pyaa. Dopaka doko, mona epe palengepa kiningi manapa dolapo Jisasa Kataisa-kisa epea.

¹⁸Endakalimi Gote paa mendaipi mende etete nakandeami. Gotenya Ikiningi Gote mendai iki Takangenya mona itangenya katenge dokome Gote doko dopalena lao panao naima langia.

¹⁹Jetusaleme tange Juta dupame Jone doko aipa pipaepe lao akali pitisapi Lipaipi mendapuame pisoo sala pena leaminopa Jone baa tangeme yapae napyoo tolao lao panao pituu, “Namba Kataisa doko daana,” lea.

²¹Dopa leamopa dokaitame baa pisoo, “Dopa tamo kandao doko, emba apipi? Emba Ilainjape?” leami. Dopa leaminopa baame, “Namba doko daana,” lea. Dokopa dokaitame, “Emba akali Potopesadokope?” leami. Baame yanu pyao, “Daana,” lea.

²²Dopa leamopa dokaitame baa pisoo, “Embame emba dopa pipaena lao naima langi. Naimame pao naima pupa lalamino akali dupa lamaimana, embame emba tange kandao apina leepe?” leami.

²³Dopa leaminopa baame yanu pyao “Akali potopesa Aisayame lao pituu, ‘Akali mendeme endakali napalenge yuu dokonya katapala Kamongonya kaitini doko tolasakamaiyepape lao wii lao katatana,’ lea-pyomo doko nambana,” lea.

²⁴Patasi dupame akali dokaita pena leami.

²⁵Dokaitame baa pisoo, “Emba Kataisa doko mauwapi, Ilainja mauwapi, Potopesa doko mauwapi dupanya mende daa tamo kandao doko, aipuma endakali dupa kaimbu pilipi?” leami.

²⁶Dokopa Joneme yanu pyao, “Nambame endakali dupa endakimi kaimbu pilyona, nyakamanya kainanya akali mende kalyamona doko nyakamame nakandelyamino.

²⁷Baa namba watao maitapyao ipanya pilyamo. Nambame baanya moko pee pingi kende doko tata lakamaipenge namba epe daana,” lea.

²⁸Dutupa endaki Jotane omotena Joneme kaimbu pyakamaiyoo kateamo yuu Betani dokonya yaka lea.

²⁹Taita dopa pyoo Joneme baa kateasa Jisasa epeamo kandatala lao pituu, “Gotenya Sipisipi Yakane dokome yuunya endakali dupa pitakanya koo dupa kunanya nepenge dokona kanjepa!

³⁰Nambame akali doko kandao lao pituu, ‘Namba watao maitapyao epelyamo akali doko namabanya alyasale. Doko, namba namandengesa baa wamba katea-pyaana,’ leo.

³¹Nambame baa apipi lao kanja nayawaka doko, baa Isataele endakali dupa laitaka pyaanya nambame endakimi dupanya ipao kaimbu pyakamaiyona,” lea.

³²Joneme pii lamaiyoo lao pituu, “Sipitisa doko yaka maileo joo kaiti-kisa katao isa ipao baa-kisa peteamo kandeo.

³³Nambame baa kanja nayao katewaka doko, endakimi kaimbu pyakamaiya puu leamo Gote dokome namba langyoo, ‘Sipitisa doko ipao akali mende-kisa pititamo kandate. Akali dokome Oli Sipitisa dokome kaimbu pyakamaitana,’ lea.

³⁴Nambame akali doko kandatala baa Gotenya Ikiningi dokona lapuna,” Joneme lea.