Juan 13:17-31

¹⁷Sayno captenga yäsishgänöla yanapänacorga cushishmi cawayanquipä.

¹⁸“Manami lapayquipäsu sayno nicä. Noga musyämi maygayquicuna entregamänayquipä cashganta. Tayta Diospa palabranchöpis sayno cananpämi cayno guelgaraycan: ‘Nogawan micog cagmi conträ sharcush.’ Say guelgaraycashganga cumplengami.

¹⁹Say guelgaraycashganno manarä päsaptinmi gamcunata wilapaycä sayno cananpä cashganta. Saymi nishgänöla päsaptin musyayanquipä Tayta Dios cachamashgan Cristo cashgäta.

²⁰Cachashgäcunata chasquicogcunaga nogatami chasquicaycäyäman. Saymi nogata chasquicamag cäga Taytätapis chasquicuycäyan.”

²¹Sayno nircurmi Jesús fiyupa laquicushpan nergan: “Gamcunapitami jucniqui chiquimagnëcunapa maquinman entregamanquipä.”

²²Jesús sayno niptinmi discïpuluncuna jucninpis jucninpis ricapänacuyargan mayganpä nicashgantapis mana musyayashpan.

²³Saychömi Jesuspa cuyay discïpulun paypa naupancho weguraycargan.

²⁴Paytami Simón Pedro sëñargan mayganpä parlaycashgantapis Jesusta tapunanpä.

²⁵Saymi taporgan: “¿Maygantä entregashogniqui caycan, taytay?” nir.

²⁶Sayno tapuptinmi payta Jesús nergan: “Sayga caycan tantata ushmarcasir macyashgä cagmi.” Sayno nirmi tantata ushmarcasir aptapargan Simonpa surin Judas Iscariotita.

²⁷Say tantata chasquircuptinmi payman Satanás yaycorgan. Nircurnami Jesús nergan: “Ruranayquipä cagtaga jucla ruray.”

²⁸Sayno niptinpis manami discïpuluncuna tantyayargansu imanir sayno nicashgantapis.

²⁹Gastuncunapä guellayta puriseg captinmi waquin yarpäyargan merendapä rantipacamog Jesús cachaycashganta. Waquin discïpuluncunami yarpäyargan muchogcunata yanapänanpä cachaycashganta.

³⁰Tantata chasquircurnami Judas jucla aywargan yarpashganno rurananpä. Sayga cargan pasa sacaycaptinnami.

³¹Judas yargusquiptinnami Jesús discïpuluncunata nergan: “Hörä chaycämunnami noga wanunäpä y nircur cawarimunäpäpis. Saynöpami runacuna tantyayanga noga pï cashgäta y Tayta Dios munayyog cashgantapis.