San Juan 13:17-31

¹⁷Caycunata entendispa ruwachcanquichis chayka, cusicuyniyoj canquichis.

¹⁸“Mana tucuyniyquichismantachu cayta nini. Noka yachani picunatachus ajllaskayta. Escriturapi niskanka junt'acunan can: ‘Nokawan miqhoj, noka contra tucupun.’

¹⁹Manaraj pasachcajtin cayta niyquichis, pasajtintaj kancuna creewanquichis nokapuni Tataj Churin caskayta.

²⁰Segurayquichis, nokapaj cachaskayta jep'ekajka nokata jap'ekawan. Nokata jap'ekawajri cachamuwajniyta jap'ekan.

²¹Chayta niytawan, Jesús sinchi llaquiska sonko wawayaska sut'incharkan nispa: —Segurayquichis, kancunamanta ujnin vendiycuwanquichis.

²²Discipuloncunataj paycunapura khawanacorkancu, mana yachaspa pimanta parlaskanta.

²³Ujnin discípulo, Jesuspaj sinchi munaskan, ladonpi cachcarkan miqhuspa.

²⁴Chayman Simón Pedro señaswan nerkan: “Tapuy pimantataj parlan” nispa.

²⁵Paytaj Jesusman suchcataycuspa taporkan: —Señor, ¿pitajri? —nispa.

²⁶Jesús contestarkan: —Pimanchus t'antata chapuspa jaywasaj, chay canka. Chaypacha t'antata chapuycuspa, Simonpaj churin Judas Iscarioteman jaywarkan.

²⁷Judas t'antata jap'ekajtinpacha, supay Satanás sonkonman yaycorkan. Jesustaj payta nerkan: —Ruwanayquita, ruwallayña.

²⁸Mesapi miqhojcunaka mana maykennincupas entenderkancuchu, imaraycuchus Judasman jinata niskanta.

²⁹Waquinnincu pensarkancu, Judas Iscariote kolke wakaychaj caskanraycu, Jesús niy munaskanta, “Fiestapaj necesitaskanchista rantimuy”, chayri “Pobrecunaman komuy” nispa.

³⁰Judastaj t'antata jap'ekaytawan llojsiporkan; tutañataj carkan.

³¹Judas llojsipojtin, Jesús nerkan: —Cunanka Tataj Churinpaj glorioso honran ricuchiska canka; paypitaj Diospaj glorioso honran ricuchiska canka.