Josua 24:1-22

¹Areme Josua fune e Isureroko ijiebuo agane boeje tuero (12) ije kiamo bu are Sekemi ijia besu afui. Fu e Isureroko ijiebuo e maki ro e mamekanu buone ijiakina e koto fievo ro e ifiki buone ije kiavo bu una E Ireobo ijadufuo nidua ijia besu afui.

²Bu afuivoga Josua fune urina e boeje vua ijiege kuariae. Fu kiae, E Ireobo e Isureroko ijiebuo Godi ije fu ijiege kuae, Isuibe asaerafa jone ijiakina asae jone be e Tera Aburamekiro Neobuo asoe ije bu do Iufuretisi irifo ijia karinoeva bu godi kufui ijene baname isoekinu arorianoe.

³Rove nare asoe jone e Aburame are do irifo fu finoeno ijia mesirina keke are Keinani vae. Areme nare daro mavoga e uine fuone fuka ma uruvana rei.

⁴Nare Aburame ifejavoga fu fari fuone e Aeseki biete areme juaevasia uruvana furiko na kuke e Aeseki ifejavoga fu anafa inokiro e Jekafukiro Iso ijene nafei. Areme na uri aesakae Sia uruo irifo ije abena e Iso mae. Ro e Jekafu fu farirafa fuone ije fu kaenamiana aesakae Ijifiti ijia ari vae.

⁵Areme na e Mosisikiro Eroni kiavo bu sakae Ijifiti ijia vakoga na duvado buone ijia irufui ka ise mamekanu ije e Ijifitiko ije vajia areme na asaerafa jone kaenamiana keke ruae.

⁶Na kaenamiana ruoma do davare irifo ijia rovoga e Ijifitiko bu osekiro sarioti karina ja kame arafiria ruae. Bu nuvedia ruoma Do Kavuane nafuema irifo ijia usiae.

⁷Rove asaerafa jone buka uri E Ireobo na kumevoga na ifejiana karauniae. Nare titutema ije kuavoga fu e Ijifiti ijiakiro asaerafa jone ijiebuo ukua ijia nae. Areme nare kuke do davare ije kuavoga fu e Ijifitiko ije okuriamoga jane ni jone ijia gae. Nare ijiege rei areme kaenamia romoga ja juaevasia ma uruvana aesao ijia karinoe.

⁸Ro kuke nare ja kaenamiana e Amoraetiko ijiebuo aesakae ije bu do Jodeni irifo maza ajiamo nake kariva ijia vae. Ja ijia vakoga bu jaena bijae rove naka nare ifejiavoga ja iraraena e boeje kania furi areme aesakae buone ije kei.

⁹Ro e Moabiko ijiebuo kini Beraki e Zifodo fari ije fuka e Isureroko ije jaena bijaekiro samuae. Ijadufuo fu urina Berame e Biodo fari ije kumeno fu e Isureroko ije ja kuravajiana vafiakiro ruae.

¹⁰E Berame fu na baname isoena kumenoga na naebe fiena ifejae. Rove naka vierafe fuone ije dabe dakudevoga fu una ja daro miakinu vua ma ijiaru joesina kuaemoga na karauniavo ja irufui ije daoveabue.

¹¹Areme jane uri do Jodeni tuana are Jeriko ijia vae. Ro e Jeriko ro Amoraeti ijiakiro e Ferizaeti ro Kenanaeti ijiakiro e Itaeti ro e Gegasaeti ijiakina e Ivaeti ro Jebusaetiko ije bu jaena bijaekuae ruae. Rove na nare ifejiavoga jaka jare giriesana iraraevoga bu subinae vae.

¹²Ro ja jare daro jone ijia e boeje ijiakiro e Amoraetiko ijiebuo kini inokiro ije juvuamagu jone ijia buina bijaena kaniaeva baki. Ro na nare ude vakoga e ani jone buka ijadufuo ireobo jumekinu ro ka totenamikoga ja kaniakuriae.

¹³Nare aesakae ije ja ijia juae meva baki ro kuke sidove ije ja ijia are saeva baki ijene vajiae. Ro jame are ijia karina ine vaeni juare ijiakiro ine orivi fo ije ja umui jone ijia oeva baki ijene inoeve.

¹⁴Ijadufuo ni godi kufui ije asaerafa jone bu sakae Mesofotemia do irifo ro sakae Ijifiti ijia karina buone baname isoenoeva ijene kame garege korefo. Ro nika uri E Ireobo ije oetuakinu irinana fuefuo ijuebaki imefo.

¹⁵Ro ja fu oetuakinu irinadufuo ije ja isediakuva ni ivia samadukua ja era oetuakinu irinadufuo ije kuaefo. Ja vierafe ja asaerafa jone ijiebuo godi kufui ije bu are Mesofotemia do irifo ijia karina buone baname isoeva ije baname isoekuva ni ijiege kuaefo. Ro kuke gaga ja e Amoraetiko ijiebuo godi kufui ije baname isoekuva ni ijiege kuaega na fiefo. Ro naeje na agane none boeje ijena no vierafe no nuvuosukua no uria E Ireobo ije oetuakinu irinakono kiae.

¹⁶Josua fu vua ijiege kuariamoga e boeje bu urina kuae, No E Ireobo ije ijuogafana una godi kufui ijiebuo baname isoekuva fuka naebe marei.

¹⁷Ijadufuo maeje fune Godi nuvuone ijare no asaerafa nuvuone ijena Ijifiti ijia karina ebuo moni baki imenoevoga fu ijia karaunuona kaenamuo keke ruae. Ro kuke fuka ire sumiki uruvana nidua nuvuone ijia rei. Fuka vame ijia aesakae boeje no asidiaejana ruaeva ijia mukoreigia samuaguokinu kaenamuo ruae.

¹⁸Fune E Ireobo ijare nidua nuvuone ijia e aesakae uruvana ijia kariva ijiakiro e Amoraetiko ijene kaniakuriae. Ijadufuo nodua no vierafe noka E Ireobo ije oetuakinu irinake. Ijadufuo maeje fuje fuka ma Godi nuvuone.

¹⁹Bu ijiege kuaevoga Josua fu kiae, Na vierafe ja fu oetuakinu irinadufuo ije jaka naebe mani. Ijadufuo maeje E Ireobo ije fuka Godi akae. Fu vierafe jaka maza boeje fu fuosukua fuone baname isoedufuo. Ro ja uria faememarena godi kufui ije buone baname isoekuva fuka defaruike. Ro kuke ise jone fube giana areke.

²⁰Ro ja E Ireobo ije ijuonena uri e ae binoko ijiebuo godi kufui ije buone baname isoekuva fuka ire ise ro vajae fiane bino vajiake. Fu ude ja fuka marejiae rove ja una ijiege rekuva fuka kaniaga jaka oe furikono kiae.

²¹Rove e boeje buka una Josua kuae, No vierafe nobe ijiege rekiro noka una E Ireobo oetuakinu irinakono kuae.

²²E boeje bu ijiege kuaevoga Josua fu una kiae, Jane kojo ijifureki itire jone ijia E Ireobo irinakuae kuaevono kiae. Fu ijiege kuariamoga e boeje bu kuae, Ke ije noneka konuvuo kuaedo no ijiege rekono kuae.