IOSUA 24:1-22

¹Iosua ese Israela edia iduhu ibounai ia haboua Sekema dekenai. Iduhu ibounai edia tau badadia, bona edia hanua lohia taudia, bona edia kota biagudia, bona edia gunalaia taudia ia boiridia hebou. Vadaeni Dirava ena vairanai idia gini.

²Bona Iosua ese taunimanima ibounai dekenai ia hereva, ia gwau, “Lohiabada, Israela ena Dirava be inai bamona ia hereva, ia gwau: Umui emui sene taudia edia nega dekenai, Tera, Aberahamo bona Nahoro edia tamana, be Euperate Sinavai unai kahana dekenai ia noho. Unuseni idia ese dirava idaudia dekenai idia tomadiho henidia.

³Vadaeni lau, Lohiabada ese emui sene tauna Aberahamo be sinavai unai kahana dekena amo lau abia, Kanana tanona ibounai dekenai lau hakaua hanaia. Natuna momo ia dekenai lau henia, Isako danu lau henia.

⁴Bona Isako dekenai Iakobo bona Esau lau henia. Esau dekenai Edoma ena ororo gabudia lau henia, to emui sene tauna Iakobo mai iena natuna taudia be Aigupito dekenai idia lao.

⁵“Gabeai Mose bona Arona lau siaia, bona egu kara dekenai Aigupito taudia dekenai hisihisi lau henia. Unai murinai umui lau hakaua mai.

⁶Umui emui tamadia be Aigupito dekena amo lau hakaua mai, vadaeni kone dekenai umui ginidae. Aigupito taudia ese emui tamadia idia lulua, mai edia kariota, bona mai edia hosi idia guia taudia, ela bona Davara Kakakaka.

⁷Vadaeni emui tamadia ese Lohiabada dekenai idia tai, bona ia ese umui bona Aigupito taudia edia padadia dibura ia siaia. Bona Lohiabada ese davara dekenai Aigupito taudia ia koudia, idia mase. Aigupito taudia dekenai dahaka lau karaia be umui ese matana dekenai umui itaia. Inai murinai taunimanima noho lasi tano dekenai nega daudau umui noho.

⁸“Unai murinai Amoro taudia edia tano dekenai umui lau hakaua, Ioridane Sinavai ena dina daekau kahanai. Amoro taudia ese umui idia tuari henia, to kwalimu umui dekenai lau henia. Lau ese umui emui vairana dekenai idia lau alaia ore, bona umui ese edia tano umui abia.

⁹Balaki Siporo, Moaba ena king ia toreisi, Israela taudia ia tuari henidia. Ia ese Balama Beoro ia boiria, umui do ia hadikaia totona.

¹⁰To Balama dekenai lau kamonai lasi, unai dainai ia ese umui ia hanamoa. Inai bamona dala dekenai Balaki dekena amo umui lau hamauria.

¹¹“Unai murinai Ioridane Sinavai umui hanaia, Ieriko dekenai umui ginidae. Ieriko taudia ese umui idia tuari henia. Amoro taudia, Perisi taudia, Kanana taudia, Hiti taudia, Girigasa taudia, Hivi taudia, bona Iebusu taudia ese danu umui idia tuari henia, to lau ese idia ibounai dekena amo umui dekenai kwalimu lau henia.

¹²“Umui raka vaira neganai, lau ese lau hagaridia dikadika, bona Amoro taudia edia king rua umui emui vairana dekenai lau luludia lao. To emui tuari kaia bona emui peva ese unai Amoro taudia idia halusia lasi.

¹³Umui dekenai lau henia tanona be umui geia lasi, bona umui dekenai lau henia hanua be umui haginia lasi. Bona umui hadoa lasi umadia, vain umadia bona olive umadia, edia huahua umui ania.”

¹⁴Ma Iosua ia gwau, “Unai dainai, Lohiabada do umui gari henia, iena hesiai gaukara do umui karaia, mai emui momokani, bona mai emui laloa maoromaoro danu. Unai dirava koikoidia, emui sene taudia Mesopotamia bona Aigupito dekenai idia tomadiho henia diravadia do umui negea, bona Lohiabada sibona mo ena hesiai gaukara do umui karaia.

¹⁵To bema Lohiabada ena hesiai gaukara dekenai umui daradara neganai, hari dina do umui abia hidi be namo. Edena dirava ena hesiai gaukara do umui karaia? Sedira emui sene taudia Mesopotamia dekenai idia tomadiho henia diravadia, o Amoro taudia edia dirava, inai hari umui noholaia tanona ena dirava,a? To lau, bona lauegu famili taudia, ai ese Lohiabada sibona ena hesiai gaukara do ai karaia.”

¹⁶Vadaeni Israela taudia idia haere, idia gwau, “Ai ese Lohiabada do ai rakatania lasi, dirava idauna be do ai tomadiho henia lasi, lasi momokani.

¹⁷Badina be Lohiabada, iseda Dirava, ese ita bona iseda sene taudia Aigupito dekena amo, bona hesiai mai guia dekena amo ita ia hakaua vadaeni. Ia ese toa kara badadia ia karaia, iseda matana idia itaia vadaeni. Bona iseda laolao ibounai lalonai Lohiabada ese ita ia hamauria, edia tano ita raka hanaia taudia dekena amo ia ese ita ia naria namonamo.

¹⁸Lohiabada ese danu taunimanima ibounai iseda vairana dekenai ia luludia. Amoro taudia danu, unai tano idia noholaia taudia ibounai ia ese ia luludia. Unai dainai ai danu Lohiabada ena hesiai gaukara do ai karaia, badina ia be aiemai Dirava.”

¹⁹To Iosua ese Israela taudia ia hamaoroa, ia gwau, “Umui ese Lohiabada ena hesiai gaukara umui karaia diba lasi, badina ia be Dirava Helagana. Ia ese emui kara dika bona emui kara kerere do ia gwauatao lasi, badina ia ese idau dirava dekenai ia badu henia noho.

²⁰Bema Lohiabada umui rakatania bona dirava idaudia edia hesiai gaukara umui karaia neganai, ia ese iena hanamoa kara umui dekenai do ia hadokoa, bona ia ese umui do ia hadikaia, bona umui do ia alaia ore.”

²¹Vadaeni Israela taudia ese Iosua dekenai idia haere, idia gwau, “Lasi momokani, ai be Lohiabada ena hesiai gaukara do ai karaia.”

²²Vadaeni Iosua ese idia ia hamaoroa, ia gwau, “Umui sibona emui hereva dekenai umui hedinaraia, umui gwauhamata vadaeni, Lohiabada sibona do umui tomadiho henia.” Idia gwau, “Oibe, momokani, ai gwauraia hedinarai vadaeni.”