Joshua 13:1-30

¹Ma aram e kari pilbithir Joshua. Me ga’ar SOMOL ngak, “Kar mu pilbithir, machane kabay e binaw ni kab ga’yang ni ku yira kol

²ga’ngin yang fare gi but’ nu Filistia ngu Geshur,

³ma ku errogon gubin yang e binaw rok yu Avvim ni bay ko yimuch. (Fare gi binaw ni tabab ko fa chipa’ i lul’ ni Shihor, ni bay ko mathil rok yu Egypt, me yan ko lel’och nib orel nge mada’ ko mathil u Ekron ni yima tay ni tafen piyu Kanaan; pi pilung rok yu Filistia e yad ma par u Gaza, ngu Ashdod, ngu Ashkelon, ngu Gath, ngu Ekron.)

⁴Ma kabay ga’ngin fare nam rok yu Kanaan, nge yu Mearah (ni tafen piyu Sidon), me yan nge mada’ nga Afek, ni bay ko mathil nu Amor;

⁵nge binaw rok yu Gebal; nge ga’ngin yu Lebanon ni bay ko ngek, ni yan u Baalgad, ni bay ko yimuch ko fare Burey ni Hermon, me yan i mada’ ko kanawo’ u thilin e but’ u Hamath.

⁶Re gi binaw ney e ba mu’un ga’ngin e binaw rok piyu Sidon ngay, ni yad ma par ko fare binaw ni go’ burey u thilin fapi Burey nu Lebanon ngu Misrefoth Maim. Bay gu tuluf urngin e pi girdi’ ney nga wuru’ e binaw nnap’an ni be yib e girdi’ nu Israel i yib. Thingar mu f’oth fare gi binaw u daken piyu Israel, nri bod ni kugog ngom ni ngam rin’.

⁷Ere chiney, e ngam f’oth e regi binaw ney u daken fa mereb i ganong nge baley ko birok Manasseh e ganong, ni fan e ngar tafned nge mil suwon ngorad.”

⁸Ganong rok Ruben nge Gad nge baley ko ganong rok Manasseh e ke mu’ Moses i pi’ e binaw ni taferad, Moses ni ir e tapigpig rok SOMOL; pi yungi binaw nem e bay u ba’ ni ngek ko fare Lul’ nu Jordan.

⁹Re gin’em ni taferad e tabab u Aroer (ni bay u thathren fare Loway ni Arnon) ni kub mu’un fare binaw ni bay u lukngun e re loway nem ngay ma ku arita’ gubin fa yungi flang nu Medeba nge mada’ nga Dibon.

¹⁰Me yani mus ko mathil nu Ammon ni kub mu’un gubin e binaw ngay ni i gagiyegnag Sihon ni Pilung ko Amorite ni ir e ki i gagiyeg u Heshbon.

¹¹Kub mu’un yu Gilead ngay, nge yungi binaw nu Geshur ngu Maakah, nge ga’ngin fare Burey ni Hermon, nge ga’ngin yu Bashan nge yan i mada’ nga Salekah.

¹²Bmu’un e gin ni gil’ilungun Og ni Pilung ngay, ni ir e en tomur ni magach ko pi Refaim, niki i gagiyegnag yu Ashtaroth ngu Edrei. I Moses e ke gel ngak e pi girdi’ ney ke tulufrad nga wuru’ e re gi but’ ney.

¹³Machane yu Israel e dar tulufed e girdi’ nu Geshur ngu Maakah ngar chuwgad; kiyad be par u Israel.

¹⁴Ma de pi’ Moses e binaw ngak fare ganong rok Levi. Aramrogon nike yog SOMOL ngak Moses ni yad e ngu’un pi’ ni f’oth rorad boch ko pi maligach ni yima urfiy u daken e altar rok SOMOL ni Got nu Israel.

¹⁵Me Moses e ke pi’ bang ko re gi binaw ney ngak e pi tabnaw nu lan e ganong rok Ruben ni ngar tafned.

¹⁶Gin ni taferad e yan nge mada’ nga Aroer (ni bay u thathren fare Loway ni Arnon) nib mu’un fare binaw u lulukngun e re loway nem ngay ma ku arita’ gubin yang e yungi flang nib liyeg yu Medeba.

¹⁷Ma kub mu’un yu Heshbon nge gubin e pi binaw nu daken e flang ngay Dibon, Bamoth Baal, Beth Baalmeon,

¹⁸Jahaz, Kedemoth, Mefaath,

¹⁹Kiriathaim, Sibmah, Zereth Shahar ni bay u daken e ted ko fare loway,

²⁰Bethpeor, nge sigre’en e Burey ni Pisgah, ngu Beth-Jeshimoth.

²¹Kub mu’un gubin e binaw ni bay u daken e flang ngay nge ga’ngin fa gin’en nma gagiyegnag Sihon ni Pilung ko Amorite niki i gagiyeg u Heshbon. Me gel Moses ngak, ma ku errogon e pi tagagiyeg nu Midian: Evi, Rekem, Zur, Hur, nge Reba. Yad gubin ni ur gagiyeg niged fare nam rok Sihon ni Pilung.

²²U fithik’ fa pi’in nni li’rad e girdi’ nu Israel ngarm’ad e immoy Balaam riy ni fare mo’on ni fak Beor nma yi’iy.

²³Fare lul’ nu Jordan e aram e mathil u ba’ ni ngal ko fare ganong rok Ruben. Ba’aray e pi binaw nge yuchi binaw nni pi’ ngak fapi tabnaw u lan fare ganong rok Ruben ni ngar tafned.

²⁴Me Moses e ka’e pi’ bang ko fagi binaw ngak e pi tabnaw ko genong rok Gad ni ngar tafned.

²⁵Gin ni taferad e ba mu’un yu Jazer ngay nge urngin e pi binaw nu Gilead, nge baley ko fare but’ nu Ammon ni yan nge mada’ nga Aroer, ni bay ko ngek u Rabbah;

²⁶taferad e tabab u Heshbon me yan nga taw nga Ramath Mizpeh miki yan nge taw nga Betonim, me yan u Mahanaim nge taw ko mathil u Lodebar.

²⁷Mu lan e Loway ni Jordan e kub mu’un yu Beth Haram ngay, ngu Bethnimrah, ngu Sukkoth, ngu Safon, nge gin ni kabay nma gagiyegnag Sihon ni Pilung nu Heshbon. Ma mathil rorad ko ngal e fare Lul’ ni Jordan me yan ko lel’och nge mada’ ko Lipath nu Galilee.

²⁸Irera’ e pi binaw nge yuchi binaw nni pi’ ngak e pi tabnaw nu lan e ganong rok Gad ni ngar tafned.

²⁹Me Moses e ki pi’ bang ko fagi binaw ngak e pi tabnaw u baley e genong rok Manasseh ni ngar tafned.

³⁰Re gin’em ni taferad e yan nge mada’ nga Mahanaim nib mu’un ga’ngin yang yu Bashan ngay — nge ga’ngin yang e gin ma gagiyegnag Og ni Pilung nu Bashan, ma ku errogon gubin fa nel’ i ragag e pi binaw nu Jair ni bay u lan yu Bashan.