Joshua 10:3-20

³Me l’oeg Adonizedek e thin nge yan ngak Hoham ni ir e Pilung nu Hebron; nge ngak Piram ni Pilung nu Jarmuth; nge ngak Jafia ni Pilung nu Lakish; nge ngak Debir ni Pilung nu Eglon ni ga’ar,

⁴“Mu ayuweged gag nggu fek e mael nga Gibeon, ya girdi’ riy e kar fal’eged e thin ngak Joshua nge piyu Israel.”

⁵Re lal i pilung ko pi Amorite nem, ni aram e pilung nu Jerusalem, ngu Hebron, ngu Jarmuth, ngu Lakish, ngu Eglon e ra mu’ulunggad nge yu raba’ i salthaw rorad ngar longobiyed e binaw nu Gibeon miyad cham ngay.

⁶Me l’oeg e pumo’on nu Gibeon e thin nge yan ngak Joshua nga Gilgal ko gin be par piyu Israel riy ni be lungurad, “Dab mu pagmad! Mu gur nigem ngamub ngam ayuweg e pogofan romad! Ya urngin e pilung ni yad bay ko pi binaw ni bay ngalan e burey e kar pethgad ni ngar maelgad ngomad!”

⁷Me yan Joshua nge salthaw rok ni urngin u Gilgal ngaram.

⁸Me ga’ar SOMOL ngak Joshua, “Dab mu rus ngorad, ya kug duwgiliy ni gur e ngam gel. Dariy ta’bagayad nrayag rok ni nge talegem.”

⁹Reb e nep’ ni yan Joshua u Gilgal nge mada’ ngaram, me cham ngorad nib tomgin.

¹⁰Me gagiyegnag SOMOL e pi Amorite ngar rusgad ngak e salthaw nu Israel ni kar guyed nike yib. Me li’rad piyu Israel u Gibeon, miyad lol’oeg e tin ke magey i yib nga p’ening ko wo’ ni yib u daken e burey nga p’ening u Beth-horon ngar chamgad ngar mada’gad nga Azekah nge nga Makkedah ni bay ko yimuch.

¹¹Nap’an ni yad be mil rok piyu Israel i yib nga p’ening u daken fare pa’ i kanawo’ ni yib u Beth-horon nga Azekah, me yin’ SOMOL e ayis ni gang’ yang u lang nga dakenrad ngarm’ad. Pire’ e tin ni yim’ ko re ayis nem ko tin i li’ piyu Israel.

¹²Chirofen ni gagiyegnag SOMOL e pumo’on nu Israel ngar gelgad ngak e pi Amorite e non Joshua ngak SOMOL. I non u p’eowchen piyu Israel ni ga’ar, “Yal’, mu tal u daken yu Gibeon; pul, mu tal u puluwon e loway nu Aijalon.”

¹³Me tal e yal’ ndaki yan, ma ku er rogon e pul nge yan i mada’ ko ngiyal’ nike gel piyu Israel ngak e pi to’ogor rorad. Pin’ey e ni yoloy ngalan e babyor rok Jashar. I par e yal’ u lukngun e lang, ma daki yan ni reb e rran.

¹⁴Dawori yodorom reb e rran nga m’on riy, ara nga tomuren ni bod e re rran nem ni fol SOMOL rok be’ nib mo’on nge un ko mael ni bay u ba’ rok piyu Israel.

¹⁵Me sul Joshua nge salthaw rok nga Gilgal ko gin be par piyu Israel riy.

¹⁶Fa lal i pilung ko Amorite, e ra milgad ngranod ra mithgad ngalan ba yiy u Makkedah.

¹⁷Me pir’egrad be’ minog e gin yad be mith riy ngak Joshua.

¹⁸Me ga’ar, “Mu lobbiyed boch e malang nib ga’ nga langan fare yiy. Mi gimed tay boch e matnag u rom,

¹⁹machane gimed e dab mu pired u rom. Mu leked fapi to’ogor u wuryal ngam oggad ngorad; dab mu pagedrad ngar thapgad nga langgin fapi binaw rorad! I SOMOL ni Got romed e ke ta’med ni ngam gelgad ngorad.”

²⁰I Joshua nge pi’ pumo’on nu Israel e ra li’ed fapicha’ ngarm’ad, machane bochiyad e ra thapgad nga langgin e yoror ko binaw rorad mda kun li’rad ngarm’ad.