Jone 7:38-50

³⁸Doko, pii pepa pyapae singi dokonya lapae silyamoli pyoo, ‘Endakali mendeme namba lao masoo minatamo dokonya monanya katao lete katenge endaki doko lee kuotala liyoo patana,’ lapae silyamona,” lea.

³⁹Baame dopa leamo doko, endakali baa lao masoo minatamino dupame Oli Sipitisa doko nyetamina lao masoo lea. Gii dokopa Jisasa kenge andake nyepala nayamo dokonya Oli Sipitisa doko ipatala naya.

⁴⁰Endakali kambu pyao kateamino dupanya mendapuame baame pii dutupa leamo sepala lao pituu, “Kini, akali dake Potopesadoko lamona,” leami.

⁴¹Yangi dupame, “Kataisa doko lamona,” leami. Dopaka doko, yangi dupame lao pituu, “Kataisa doko baa Galili yuu dokonya katao ipatape?

⁴²Pii pepa pyapae singi dokonya Kataisa doko baa Dapiti puu mendenya pyakalyetana, yuu taono yakane Dapiti kateamo Beteleme dokonya manditamina lapae singina,” leami.

⁴³Dopa latala Jisasanya tenge dokonya lao endakali dupa wakale pyoloo piami.

⁴⁴Yangi dupame baa anjalanya piaminoaka doko, dupanya mendaipi mendeme baa minatala nayami.

⁴⁵Yanda singi dupa pilyoo pitisa mupa dupapi Patasi dupapi peteamisa epeaminopa dokaitame dupa pisoo, “Aipuma baa anjoo soo naepelyamipi?” leami-pyaa.

⁴⁶Dokopa yanda singi dupame yanu pyao, “Akali dokome pii lelyamoli pyoo wamba akali mendeme kukipi mende naleana,” leami-pyaa.

⁴⁷Dopa leaminopa Patasi dupame yanu pyao, “Baame nyakama apata minakaseta aipape?

⁴⁸Isingi akali dupanya mendemepi Patasi mendemepi baa lao masoo minala naelyamino.

⁴⁹Dopaka doko, endakali kambu dokome mana setapae dupa masala nayao katapimino dokome Goteme pyapenge joo kalyaminona,” leami-pyaa.

⁵⁰Dupanya akali wamba Jisasa peteasa peamo Nikotimasa lenge dokome dokaita lamaiyoo, “Endakali mendeme mende pitamo doko wambao soo kanja naenya, mee kosimi laapape lapae naimanya mana setapae dupanya silyape?” lea-pyaa.