Jon 9:1-20

¹Jesus iyok ile fen, tamo taka mala ifofakeleya gõ difen anĩ ilen.

²In dõ fiya tar Jesus to difiyen, “Rabi, aim mosor ino di, ĩ mala ifofakeleya gõ difen, tamo enei yogo de, sina tamam de?”

³Jesus aitedin yale iron, “Tamo eneimeg sã, sina tama adomeg sã, anĩ ere, Negur nẽ kabĩ ĩ bunem yaorouf nigin eig fiya wõ yen.

⁴Eĩ fau gaa ado, aya sur fiyan in kabĩ talouf bagai. Bõ fau isif, sain anĩ, taka nem kabĩ yaleya kisi feleya sã.

⁵Sain aya tenebur abodok, aya teneub enei nẽ fula fiya.”

⁶Age wogõ yel fen, ĩ tenebur isis fen, salina buru ado falei fe fen, tamo mala bun inon.

⁷Jesus ĩ irokenen, “Ule, Siloam naan kukor ugũ” (Siloam nẽ gariya, are ‘Sur fiyen’). Anĩ nigin, tamo ile, naan igun, agef fen, mala kelẽ yel, fõ bun isin.

⁸In fõ tura tar ado, idi ĩ nonĩ ye mog diledig anidi diron, “Tamo de eneim ibod ken, nonĩ yedig anĩ sã de?”

⁹Idi tunĩ diron, “Im.” Tunĩ diron, “Im sã, taka ĩ genem.” Anĩ ere, ĩ yogo iron, “Aya de tamo anim.”

¹⁰Idi ĩ dirokenen, “Naig fe di, õ malã kelẽ yeledin?”

¹¹Ĩ aitedin yale iron, “Tamo yana Jesus dedig im, buru falei fe fen, malau uru bun inodin. Ĩ, aya ele, Siloam naan agũf nigin irokanan. Anĩ aya ele, naan agun, age afe fen, aya malau kelẽ aun.”

¹²Idi ĩ to difiyen, “Tamo are nain?” Ĩ iron, “Aya keleĩ sã.”

¹³Idi tamo mala ifofakelen anĩ, Farisia tamo gedin dale dirou disin.

¹⁴Jesus buru falei fe fen, tamo mala el fedin nẽ naa are Sabat naa.

¹⁵Anĩ nigin, Farisia tamo idig, ĩ naig fe fen, mala kelẽ yedin anĩ to difiyen. Tamo are irokenẽdin, “Ĩ malau buru inodin, age fe di, agun, anĩ aya gama kelẽ auf.”

¹⁶Farisia tamo tunĩ diron, “Tamo enei Negur bun tamal sã, ere nigin, ĩ Sabat naa to dõ fef.” Anĩ ere, tunĩ diron, “Naig fe di, mosor tamo memelik age fediya inoya kisi feleya?” Anĩ nigin, idi fara difen.

¹⁷Idi baban tamo mala ifofakelen anĩ dirokenen, “Ĩ õ malã el fen anĩ, õ ĩ nigin ere wof?” Age de di, ĩ iron, “Ĩ profet.”

¹⁸Juda tamo idi, tamo mala ifofakeleya mala kelẽ yelen anĩ, fau to momoi den. Anĩ nigin, idi tamo anĩ sina tama diweignẽdin.

¹⁹Idi to difen, “Eĩ ã naaluĩ de? De ĩ anĩ mala ifofakeleya gõ mafen gef? Naig fe di, ĩ gama sã mala kelẽ yelef?”

²⁰Sina tama diron, “Amã keleĩ, ĩ nemã kesu, anĩ ĩ mala ifofakeleya gõ mafen.