Johanningundru 9:1-20

¹Ja Nau wiringanani, Nulu kana kulno najina wonti, nau butju nganana wonti kupandru.

²Ja milieli nunkanali nina jakalkana wonti ja jatana wonti: “Rabbi, warle madlentji ngankana wonti, nulupini: kara ngaperali ja ngandrieli nunkanali kara, ngangau nauja butju dankana wonti.”

³Jesujeli kalabana wonti: “Wata nulupini madlentji ngankana wonti, bakana wata ngaperali ja ngandrieli nunkanali, a-ai, Godaia ngankana nunkangu wondraterinanto.

⁴Ngato nunkanipini ngankani ngankananto, Nulia ngana jinpanala, jeruntja ditjiwirdi ngananani; tinka wokarala nganai, nunkangupini kana warupoto ngandandarila nganai ngankala.

⁵Wintaranaia ngani mitani nganai, ngani mitaia praitji nganai.”

⁶Nau jenia matja jatana, Nulu mitani ngaltja worana wonti ja ngaltjandru buluru ngankingana wonti, ja nina buluru butjuni milkini kurana wonti,

⁷Ja nunkangu jatana wonti: “Wapau, ja Siloa pantuni kulirkateriau!” Jenia wondrai: “Matja jinpana.” Nau wapana wonti ja kulirkaterina wonti ja najila tikana wonti.

⁸Jenimalinietja, ja tana nina ngopera najina wonti potuni ngatjinani, jatana wonti: “Wata naupini nauja nganai, nauja ngamana warai potuni ngatjila?”

⁹Palpa jatana wonti: “Nauja naumata nganai;” palpa: “Nauja nunkangu jeribaka;” nau munta jatana wonti: “Ngani nauja nganai.”

¹⁰Tana nunkangu jatana wonti: Worderu milki jinkani piririna warai?”

¹¹Nulu kalabana wonti ja jatana wonti: “Kana kulnujeli, tala nunkani Jesus, buluru ngankingana warai ja nina ngakangu milkini kurana warai ja ngakangu jatana warai: Siloah pantuja wapau ja kulirkateriau. Ngani wapana warai ji kulirkaterina warai ja kantji najina warai.”

¹²Tana nunkangu jatana wonti: “Woderi Naupara nganai Nau jatana wonti: “Nganako.”

¹³Tanali nina, nau ngopera butju nganana warai, Phariaiaia wapalkana wonti.

¹⁴Jendranguta Sabbat nganana wonti, Jesujeli nina buluru ngankinganani ja milki nunkani piri ngankanani.

¹⁵Nakaldra nina bakana Pharisaiali jakalkana wonti, worderu nulu nakaldra najina warai. Nau tanangu jatana wonti: “Buluru Nulu ngakangu milkini kurana warai, ja ngani kulirkaterina warai, ja ngato kantji najiai.”

¹⁶Pharisaia palpa jatana wonti: “Naupini kana wata Godandru nganai, ngangau Nulu Sabbat wata kulikiri ngamalkai.” Palpa jatana wonti: Worderu kana madlentji ngurungunu nganai jenia malka ngankala?” Ja tana tidatida ngankijiribamalina wonti.

¹⁷Nakaldra tana butjuni jatana wonti: “Mina jidni nunkangundru jatai, ngangau Nulu milki jinkani piri ngankana warai?” Nau jatana wonti: “Nau Propheta nganai.”

¹⁸Juda kanali nunkangu, nau butju nganana warai ja nakaldra najina warai, wata morlalu ngundrana wonti, tanali nunkanipini, nulu nakaldra najina warai, ngaperi ja ngandri karkanantulu.

¹⁹Ja tanali pudlana jakalkana wonti ja jatana wonti: “Naupini judlani kupa nganai, nunkangundru judla jatai, nau butju dankanala? Worderu jenia pantjina warai, ngangau nulia karari najiai?”

²⁰Ngaperali ja ngandrieli nunkanali tanangu kalabana wonti ja jatana wonti: “Ngali milkila, naupini ngalini kupa nganai, ja nauja butju dankanala;