Yowan 9:1-20

¹Yesu iyege di Yuda tina, motong la ipa a ila, ngan ikamata tool atu in matan kis. Ngan tool tani in kene yo tinana ipasuiu ye i, ngan matana nga ikis nen.

²Motong la di galiunu tikamata tool tani le nga titoru nen, “Pannoongoo, sei iyei noonoo a le tinana ipasuiu ngan matan kis nen nga, ya taunu, too tamana le tinana?”

³Titoru nen, motong la Yesu iraua betanga kidi nen, “Ya taunu, too tamana le tinana la tiyei noonoo ngan la le matana nga ikis nen, ngan tiap. Bong so yo nen in be pombe ye, a be nen ngan ikarata dada pang Maro be ipatnai gurana le urata ki le iken mallangana pang di tooltool.

⁴Nookoot nga ni galanga nen, le kin tayei urata ke tool yo iwangau a asi i. Kumata be tayepe nen le lo bong pombe nga, ngan kene tani in tool sa ke be iyei urata yo nen ngan mulu tiap.

⁵Ngan ye kene yo ayepe ye tana i nga, ngan au i la be ayei ben sul pang di tooltool ke tana i.”

⁶Yesu iwete nen a imot, motong la ikoronai ngoonoo du ye tana, inbe isaraii ye baene le iyei ben tingi, motong ikap a isirimi tool mata kis tani, in matana ye.

⁷Inbe iwete panga nen, “Kula le la kupusu matam ye ran kelingi yo ene Siloam ni.” (Ngan betanga yo Siloam i, in punu ben Tiwanga). Le nga tool tani in ila la ipusu matana, motong la ye kene yo be imulu a ila pang rumu ki ye in nga, ngan le matan galanga a ikamata ni ye dook mata.

⁸Motong la di tooltool yo tiyepe potai ye nga, ngan tiye di tooltool kapala yo muku ngan tikamata igaugau pat le so ye di tooltool nga, ngan tikamata le tipartortor nen, “Ai, i tool tani yo muku ngan iwurur a igaugau pat le so in naii, too?”

⁹Ngan di tooltool kapala tiyei ne, “E, ya tani naii.” Bong di kapala tiyei ne, “Tiap, ya in matana dawa ben tool tani in leu, bong in tool san.” Ngan tiwete nen, motong la tool tani iyei ne, “Ai, i au tani naii.”

¹⁰Le nga di tooltool tina ngan titoru. Tiyei ne, “Nga kuyei belei a le matam rere, inbe kumata ni ye nga?”

¹¹Motong la iwete pang di nen, “Tool yo tipootoo ene ye Yesu i, in iyei tana le iyei ben tingi, motong la isirim matak ye, inbe iwete pau be la apusu matak ye ran kelingi yo Siloam i. Le nga ala la apusu matak ye ran tani, ngan la le matak rere a akamata ni ye nga.”

¹²Iwete nen, motong la di tooltool tina ngan titoru. Tiyei ne, “Ngan tool tani in iyepe ngai?” Ngan iyei ne, “Atoo, au i lok galanga ye tiap.”

¹³Motong la tikaua tool tani yo muku ngan matan kis i, in a tila pang ye di Paresi.

¹⁴Yesoo, ye kene yo Yesu iyei tana le ben tingi a ikarata tool tani in matana le dook mata ye i, in ye lal kidi Yuda ke sungunu.

¹⁵Motong la di Paresi tina ngan titoro tool tani. Tiyei ne, “Ai, matam nga yelei a le dook mata nga?” Ngan tool tani in iwete pang di nen, “Isirim matak ye tana yo iyei le ben tingi nga, motong la apusu matak ye ran, ngan la le nookoot nga matak rere a akamata ni ye nga.”

¹⁶Iwete pang di nen, motong la di Paresi kapala tiyei ne, “Tool in Maro iwanga la isi, nga tiap, yesoo ikap tutu lal kiidi Yuda yo ke sungunu, in tiap.” Bong di Paresi tina kapala tiyei ne, “Nga yelei, tool yo ke yeingi noonoo i, in ke be iyei mos yo nen nga?” Ngan nen le di tapdi tiparpoto.

¹⁷Motong la di Paresi tina ngan tiportak be titoro tool mata kis tani, in mulu nen, “Lom tar be tool tani yo iyei ong le matam rere i, in tool belei?” Ngan iraua betanga kidi nen, “Ya in Maro koonoo atu.”

¹⁸Muku ngan tool tani in matan kis, motong la nookoot nga matan rere nga, bong di kuto maimai ke di Yuda titara lodi medana ye yo nen, ngan tiap. Le nga tiwanga pang tamana le tinana a timan.

¹⁹Timan, motong la titor di nen, “Ai, i angru natumim tani yo kawete be ye kene yo tinana ipasuiu ye in nga, ngan matan kis, in naii, too? Ngan nga yelei a le nookoot ngan ikamata ni nga?”

²⁰Ngan tamana le tinana tiyei ne, “Amru nga lomam galanga ben i natumam, inbe kene yo tinana ipasuiu ye in nga, ngan matan kis.