Jon 8:17-48

¹⁷Kandriyen taha malen asehek i buku doh, ‘Buku sahou turu lau ma la-uh i le randra eh, uru badeh, tiye sahou handru ai.’

¹⁸Jo badeh, asehek jo amwenen. Ano tama nane suni jo eme dan, iy ale asehek jo.”

¹⁹Iri ndremenya iy, “Tamam ndraheh?” Jises eme tiye tiri i buku doh, “Aha tanan jo bwe, ma aha tanan tama bwe le. Buku aha tanan jo eh, badeh kameh aha tanan tama ale ai.”

²⁰Jises asehek iri sahou marakon doh badeh, udu bolo len iy leheya iri udu bolo asiu tinan ta Kindrei. Iy ales udu mirihik ta lakou ari ta iri adeu ta ndrahune luk ta nyara salom. Arile ari ndramak babawei iy bwe, tasah len tan handru badeh, kahis le.

²¹Jises asehek sahou ili tiri lau ja, “Jo kameh iu ai. Aha kameh asilah jo, arile aha kameh amak ta kandriyen ndra-in taha. Aha kameh winiyan bame kon kameh jo ilih aliy bwe.”

²²Eme bwidi iri Juwis ndremenya iy ja, “Iy kidi iy nadeh? Eme adeh iy asehek i buku doh, ‘Aha winiyan bame kon kameh jo ilih aliy bwe.’”

²³Arile Jises asehek le ai, “Aha lau marakon kede-eh badu kon andri dah. Jo le badu kon loken. Aha marakon badu kon munyak dah. Jo badu kon munyak dah bwe.

²⁴Jo ndratiye taha, ta aha kameh amak ma ndra-in taha. Buku aha batehei budon taha bame tek bwe, buku, ‘Jo iy ndramak nane iy ta udu le buku doh,’ aha kameh amak hawe kandriyen ndra-in taha.”

²⁵Iri ame ndremenya iy ja, “Ya ou are lau handru?” Jises eme tiye i tiri, “Jo adeh lakou nane jo ndrasehek taha.

²⁶Budon tek solo-an labai ta asehek ewek taha ma ta maha-an taha. Arile jo kameh tiye iri kandriyen taha i buku ari ndramak ta anuhun sahou. Jo ndranuhun iri sahou ta are lau nane suni jo eme dah, iy asehek iri sahou handru. Eme jo asehek ili tiri lau badu kon munyak.”

²⁷Jises asehek taman ili tiri, arile iri bandrei bolo sahou tan bamwenen bwe.

²⁸Jises eme asehek ili tiri ja, “Buku aha ndratudun Nadu Kindrei ere bada kei tondreh, ma aha kameh atanan, jo iy ndramak nane iy udu le buku doh. Ma jo winiyan bamekes iri lakou na le budon tek le bwe. Jo asehek dah buku tama ndraleheya jo.

²⁹Are lau iy nane suni jo eme dah iy udu hawek. Iy winiyan bamani jo bwe, tasah jo amekes iri lakou in hamon ta budon tan.”

³⁰Jises asehek iri sahou doh kahis le, eme iri lau solo-an atehei budon tiri ili tan.

³¹Jises eme asehek tiri Juwis nane atehei budon tiri in tan, “Ya, buku aha anuhun sahou tek, ma aha an hamon tiri leheya tek badeh, aha lau tek.

³²Idah kameh aha atanan sahou handru, ma sahou handru kameh bwidi aha mani gok taha bonyo-ou.”

³³Iri Juwis ame asehek i ta Jises, “Ahi dah nadu Abraham handru. Ahi bala buku bonyo-ou ta ari ndramak bwe le. I buku sah ja, ou anya, ahi kameh mani gok tahi bonyo-ou?”

³⁴Jises asehek sahou ili tiri ja, “Handru labai jo tiye taha, buku are lau iy amekes kandriyen ndra-in, iy badeh, ndra bonyo-ou tiri kandriyen ndra-in.

³⁵Buku are lau iy bonyo-ou, iy kameh winiyan bala buku nadu iy ndramak ta asiu nane iy in hawe oro, bwe. Arile nadun handru amwenen kameh udu hawe taman uru tinen na len marakon.

³⁶Ya, buku Nadu Ndramak Awas ndrabwidi aha ndramani iri gok taha bonyo-ou, badeh, kameh aha winiyan bamekes gok ta bonyo-ou ja bwe.

³⁷Jo tanan aha nadu Abraham handru. Arile aha anya kadi jo kimek, tasah aha batehei budon taha bala ta sahou tek bwe.

³⁸Jo asehek taha ta iri lakou tama ndraleheya jo. Arile aha amekes lakou an hamon ta tama aha, iy ndrasehek taha.”

³⁹Iri ame asehek i ta Jises, “Ahi nadu Abraham.” Ano Jises asehek ili tiri ja, “Buku aha nadu Abraham handru eh, ya aha kamekes lakou kili le buku iy ndramekes.

⁴⁰Iri lakou marakon jo ndrabwidiy ma sahou handru jo ndrasihidiy ndrawek taha, jo anuhun ta Kindrei. Bwe ja, aha none ta adi jo. Abraham bamekes bala buku aliy bo-oh.

⁴¹Aha amekes iri lakou kede-eh i le buku tama aha amwenen amekes.” Iri Juwis anya, “Ahi nadu andra bweu bwe! Kindrei le ari amwenen badeh, tama ahi, ma ahi dah nadun handru.”

⁴²Jises asehek ili tiri, “Buku Kindrei tama aha handru eh, badeh, aha kaso-ok jo ai, tasah jo udu hawe Kindrei eme udu kada-ah. Jo bame laleyah na le budon tek amwenen bwe. Iy suni jo ta eme.

⁴³Buku sah handru aha bakohok bolo iri sahou tek bala mwasin bwe? Tasah aha bandrei kati iri sahou tek bamwenen bwe.

⁴⁴Tama aha balik, aha nadun, aha amekes lakou an hamon ta iri lakou iy aso-ok. Udu ndra bada katin eme, iy ta idi lau. Iy bwalen sahou handru, tasah iy tanan ta asehek sahou handru bwe. Iy ta wendreya, ma iy aso-ok ta asehek sahou ta wendreya. Iy badeh, tine wendreya udu tan.

⁴⁵Jo badeh, asehek iri sahou handru. Arile, aha ja, batehei budon taha bame ta sahou tek bwe.

⁴⁶Are lau taha winiyan nyuwani jo amekes iri kandriyen ndra-in? Buku jo asehek sahou handru, i buku sah, aha batehei budon taha bame tek bwe ja?

⁴⁷Are lau iy badu hawe Kindrei handru, iy anuhun saba lakou Kindrei asehek. Katin ta ou bwalem ta anuhun, tasah ou badu hawe Kindrei bwe.”

⁴⁸Iri Juwis asehek sahou boto-on i ta Jises i buku doh, “Ahi asehek handru, ou ndramak ndra-in badu Samariya, malawin ndra-in udu bwele-em.”