Sion 8:17-48

¹⁷E rae xil na Mosis xa xamim vari di munggusil xati biteni xa melele xa sepinien na moletin lu usil neta tei lupin, moletin xil likila like reitin xa naha xa lubiteni be reitin.

¹⁸Mak, ma inou nasepin e rin navan, e Tata navan xa misil inou namei, xi mun di misepin e rin navan.”

¹⁹Ma, xil lasisi labit, “?Xosxa mak, tata nam da xave?” Iesu bit rilomun ni bit, “Xamim mutakil ti nou e mutakil ti Tata navan mun. Vengan, xosxa mukil inou, ma mukila mukil Tata navan mun.”

²⁰Melele xa Iesu bit holesok xil ak, de vioh te Nim Eo, sangas visal rute xa laling kuh mani te Nim Eo di en. E tave ti neta xa rute ak de sangas ni rute xa vat na Siu xil ladi vituei en, moletin tovuol vatal xati. Latatal xati ti vengan xa melele nan xati tamei ti mu.

²¹Di, Iesu bit rilomun ni mi titsa xil te rae na Mosis e Farasi xil bit, “Inou nihe reling xamim e, neta sav musak pisi tengan mulang ni nou, munakamet nou ti. Xamim muxulehi mupol ni tesaen e muhur huite teni e von maten tang. Mak, ma xamim musakras muve rute xa inou niha en.”

²²Vat xil na Siu xil latakil ti koute te sepinien na Iesu. Ma, lasepin mi xil mun tang labit, “?Veneh ma xi biteni xa xir rasakras rave rute xa xi iha en? ?Itep? ?Ihas vin tasen ni xi tang?”

²³Iesu bit rilomun ni bit, “Xamim mube te ut etan ak tang. E inou, nabe te ut nesao. Xamim mube moletin xil te ut etan, e inou natave te ut etan ti.

²⁴Mak, ma nabiteni xa xamim muhur huit tesaen namim xil e von maten tang. Vengan xa xosxa munake reitin ti en xa inou nabe xi, reitin xa mumat itel xat tesaen namim xil.”

²⁵Xil latemanin ni sepinien nan e labit, “?Xouk obe visi vari?” E Iesu bit rilomun ni bit, “Tetiamu mei duxol xosali, di nabit lelen ni mi xamim xa nabe visi.

²⁶Inou nikila nihit rat neta holu xa misa iha xat rin namim. E di nabit lelen ni mi moletin xil te ut etan naha xa Tata biteni minou vengan xa nakila xa ngan xa tesil nou namei be reitin.”

²⁷Melele xa Iesu di bit usil Tata nan, xil latakil ti xa Iesu di bit usil Tata nan xa de ut nesao.

²⁸Mak, ma Iesu biteni mi xil bit, “Melele xa mupo rat Nat Moletin ihe nesao, mupus kila xa inou nabe xi. E melele nen ak mukila sung xa natapol ni ti neta vahusil nenemien navan tasok. E di nabit naha kestang xa Tata navan di pispisi minou.

²⁹E ngan xa misil nou namei, xi di minou e tastokovein nou ti. Vengan xa, vehakut, di napol kes ni neta xa xi besi xi ven.”

³⁰Melele xa Iesu bit holesok xil ak, moletin xil holu lake reitin en xa xi be Mesaea na Hi reitin.

³¹Di, Iesu pusi xa rut Siu xil lake reitin en, ma biteni mi xil bit, “Xosxa muxulehi ni ngan taxa ti mulong xat pispisien navan xil, ma mupisen ni xa xamim mube moletin navan xil reitin.

³²Mukil naha xa be reitin, e reitinen ak isak ni xamim mei mumeluv reitin.”

³³E xil labit, “Xamem mabe vatimol na Ebraham, e matave slev na moletin ti vatova. ?Mak, ma veneh vari obiteni xa xamem mei mumeluv reitin?”

³⁴Iesu biteni mi xil bit, “Reitin li nabiteni mi xamim xa moletin xil vus xa di lapol ni tesaen labe slev xil teni.

³⁵E slev tei, voninen tovuol e vatimol xati na masta nan. E nat masta ak, voninen xati e vatimol nan da vehakut.

³⁶Mak, ma xosxa Nat Hi pol ni xouk mei omeluv, ma omeluv reitin.

³⁷Nakila xa xamim mube vatimol xil na Ebraham. E neta sav xa mak, di musak pisi tengan mulang ni suse xa muvas vin inou vaxo en. E iemim bei tengan muvas vin inou vengan xa ut tovuol e tinemim tengan sepinien navan vaha vata en.

³⁸Inou di nabit mesen naha xa natepusi e melele xa natete visal Tata navan. E xamim, ihos xa ti mupol ni naha xa Tata di biteni mi xamim tengan ti mupol ni.”

³⁹Xil labit rilomun ni labit, “Tata namem Ebraham.” E Iesu biteni bit, “Xosxa xamim mube horamue xil na Ebraham reitin, ma sexien namim xil ixoni sexien nan xil.

⁴⁰Inou nabit mesen ni mi xamim reitinen xa Hi biteni minou. E xamim, musak tengan muvas vin inou. Ngan ak tave sexien xil na Ebraham ti.

⁴¹E‑e. Sexien xil namim nggoni sexien xil na tata namim xati.” E xil labiteni labit, “!Ei! !Tave xamem ti iaxa mabe horamue xil te suse! Tata namem tei takes, xi be Hi vari.”

⁴²Iesu biteni mi xil bit, “Xosxa be reitin xa Hi be Tata namim, eheien namim vati e nou. Vengan xa inou natexo visal Hi, e xosali nade visal xamim inggak. Natamei ti vahusil nenemien navan, e Hi iaxa tesil inou namei.

⁴³E nakila veneh ma xamim musakras mulong kil naha xa nabiteni. Vengan xa iemim ti tavei mukil sepinien navan xil.

⁴⁴Tata namim be Temat vari e iemim bei tengan mupol ni naha xa xi ien bei xamim tengan mupol ni. Vengan xa xi misak ni moletin xil labas vin moletin sav xil e melengien xil tetiamu mei duxol xosali. Xi tara ti e rin te reitinen, vengan reitinen tovuol en. Melele xa miluvos, di misa sepinien nan xati, vengan xa xi be vat luvosen, e be tata na ngan xil xa di laluvos.

⁴⁵Mak, ma vengan naha xa inou nabiteni mi xamim be reitin, xamim mutake reitin e nou ti.

⁴⁶?Visi e xamim mikila vahit rat naha xa inou di napol ni xa misa? Tovuol e xamim mukila vapol ni. ?Ma xosxa di nabit naha xa be reitin, veneh vari mutake reitin ti e sepinien navan xil?

⁴⁷Ngan xil xa labe horamue xil na Hi di lalong kil sepinien nan xil. E xamim mutave horamue xil na Hi ti, ma mutalong kil ti.”

⁴⁸Ma Siu xil lasepsisil Iesu labit, “!Ei! Mabiteni reitin melele xa mabit osa tova tang e onggoni ngan Sameria tei e temat tei de xouk.”