Jon 6:8-34

⁸Aga bidi me deli Andru, te Saimon Pita aga ama, agai Jisas agabolo te po wai,

⁹“Ogwa me deli ede bidibao, te ogwa agai a naga bret dali sųgų si dali munalubo. Te bret te bali plauago nigai. Tiali digi, te naigo e genuai we bidi hani usu egobeo,” Andrugo te po wai.

¹⁰Jisasgo te po wai, “Te we bidi augwali duayao wao,” te po wali. Noswai hauwa tede elaluai, tama te we bidi augwali duawai, augwali te bidi hani bidi sese hauwa mu 5,000, te we dali wai puluba dali nedebeo.

¹¹Augwali duada pao olama, augwali dualaluai, tama Jisasgo te ogwago bret selama, tama Jisasgo Godibolo nage usu dao wai. Tilama, te we bidi augwalibolo te nai dobaba pai. Te sųgų si me agai tama naga tiwai agai augwalibolo mawai, augwa homugo usu yabo te tiwai naga.

¹²Augwali nai tuali usu ela silai. Tama Jisas aga wali pabo bidi dabebolo te po wai, “Dagego nai me badu munalubo sisinao,” wai. “Tiyu yaide me badu nai olo tagalobuo,” wai. Jisasgo te po aga bidi dabebolo wai.

¹³Tama tialima, augwaligo te tulama, me badu munalubo nai dabe sisinama, tama augwaligo bonou wa nogo si olama, sągą badu si pągąwai. Te a naga bali bret tego bidi augwali nai tuali usu yalima, tama me badu munaluai, te nai augwaligo te bonou wade ma buai.

¹⁴Te we bidi augwaligo Jisasgo te bomo yai sę ebo sulama, tama augwaligo te po wai, “Mu tamao, te aga e tǫba asaiba wali bidi te aga dao, te Godigo po ola mabo bidi dao,” te we bidi augwa hasi te po wai.

¹⁵Tialima Jisasgo koneai, augwaligo homugo Jisas aga dąų olama, tama Jisas aga augwaligo tuni bidi bidimainogo yaibao, augwali te homu yai Jisas aga dali. Tama tibaso, Jisas agaduba bulu duba ma pai.

¹⁶Pio tama Jisas aga wali pabo bidi augwali te sigi ąį geba dulai.

¹⁷Megi hulia sai, tama Jisas augwali bidibo digi pedalobeo. Tama tibaso, augwali moni gebaba holama, te ąįdu pai. Augwali Kaperneam be naniba painogo yai.

¹⁸Bomo yai wali dali tama genuai ąį gisigi asiyu dali yai.

¹⁹Augwali te gebadu ąį todogo pali, te kilomita a naga ma te a naga olama me badu nogo deli tama dąį egi pai. Tama augwaligo suali, Jisas ąį daidu asiyu tama te geba pąba sabolainogo asai. Tama augwali moni wi yai.

²⁰Tialima, Jisasgo augwalibolo te po wai, “Ena Jisas tama asobao,” wai. “Dage wi ebo tagaliąo,” te po wai, Jisasgo.

²¹Tama augwaligo Jisas geba tomoba sela asainogo yai. Tama te geba polo augwali te pabo bulu teba poloba tugi pai.

²²Te do tama wabo side te we bidi augwali te sigi ąį sesege badu bidaluai. Augwaligo koneai, te do tama te gasa geba me menio. “Deli digi e munaluali,” wai. Tama Jisas aga wali pabo bidi dali te gebaba holobeo. Menio. Te bidi dabe augwa naga te gebaba holama pai, te we bidi augwaligo te koneai.

²³Tama augwaligo homu hauwa ebadi yaide, Taiberius bulu du asai geba meba teba poloba tuagasai, te Genuai Bidigo Godibolo nage usu da olama, tama te we bidi hauwa augwaligo nai tuali madigi pąba.

²⁴Te we bidi augwaligo suali, Jisas dali aga bidi dabe dali bidibo subeo. Tialima, augwali te tamadi asai geba dabeba holama, tama augwali Kaperneam buluba Jisas gegegi pai.

²⁵Te we bidi augwaligo Jisas sigi ąį sesege badu gegai. Sulama, tama augwaligo Jisasbolo te po hanalu wai, “Po ola mabo bidi, nage eba nisu asai dawe?” te po wai.

²⁶Jisasgo po wei ponoyu, te po wai, “Mu tama eno dagebolo obao, dagego eno yali bomo yai sę page homugo koneama, ena gegeyu ebeo. Menio. Dage eno te mani bret tulama, tama dage haliga pągąwai dao. Te tiali pagede dagego ena gegebo sę ebao,” wai. Jisasgo te po Juda bage dali wai.

²⁷“Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai.

²⁸Tama tibaso, augwaligo Jisasbolo te po wai, “Dago mena tama tilama, tama dago Godigo sę yaibawe?” augwaligo Jisas dali te po wai.

²⁹Jisasgo augwalibolo po wei ponoyu, te po wai, “Godigo sę e tama dao: dagego te Godigo tagala palali bidigo wabo poba duga homu tigidali muyu bidao,” Jisasgo augwalibolo te po wai.

³⁰Tama tibaso, augwaligo Jisasbolo te po wai, “Dena homu tigidali nageba mumainogo, tama nago magi bomo yai sę yaibawe? Nago magi sę yaibawe?” te Juda bagego Jisas dali te po hanalu wai.

³¹“Dago wąį dabe augwaligo bidi meni yai bulude ili isiąwai nai nogi mana tuai dao. Godigo wali po bukude bidi mego asęani po gilama, ‘Agai dagaludu bret augwalibolo menama, tama augwaligo tuai dao,’ wai,” augwaligo te po wali.

³²Tama tibaso Jisasgo augwalibolo te po wai, “Mu tama eno dagebolo obao. Polobadu Mosesgo dagebolo mani nai te dagalu bret te dage mabeo. Menio. Eno Aya Godigo da te dage dagalu bret mu dage megi mabo dao.

³³Te bret Godigo mani, te aga dagalu tagalama, e tǫba dulama, tama agai tǫde bidibo we bidi bidada pabo bomo magasobo dao,” Jisasgo te po wai.

³⁴Tama tibaso, augwaligo Jisasbolo te po wai, “Genuai Bidi, nago te bret dabolo tigidali sogo da mao,” wai.