Jon 5:5-19

⁵Ono dana oso bilen eu hag umei cabi gel 38 ihoc lec gaid hag nijoloi.

⁶Jisas uqa dana eu ninijen fimei uqa hag saen odi cecelacca nijina dumei sisildu madon, “Hina hag mehecnu gale henafo?” don.

⁷Odocob hag dana eu Jisas jejeg hewi madon, “Dana Ben, ija cesultec oso qee bilina. Wa mulodocob ija mahuc tonecwe qee. Tonecnu odocomin oso mahuc hu woolti tonimei wa jona,” don.

⁸Odocob Jisas madon, “Hina cajimeg hinana taeg umeg coboga,” don.

⁹Mahuc bahic dana hag medocob caji uqana taeg umei jic cobon. Aria, deel Jisas uqa me muden eu Juda agena cuha deel.

¹⁰Euqa Juda dana age dana hag medon eu madoin, “Qila cuha deel, hina eetanu hinana taeg gahidogona? Egena loo je eu odi odocnu cain ec madena,” doin.

¹¹Odocobil uqa maaden, “Dana uqa me mitia uqa mateceb ijana taeg umig cobigina,” aden.

¹²Odocob age sisildoin, “Dana eu hinana taeg umeg coboga heia eu in?” doin.

¹³Dana mati bahic cudun euna beleinnu Jisas uqa filec isec nuen. Eunu dana hagca eu in uqa me muden eu qee dol.

¹⁴Hibna Jisas uqa dana eu tempelna cocobon gulucdumei madon, “Faga, hina hag mehen. Ceteh me qee bahic eu wooldoc hinana hag dewenna hoiaunnu haun silail cain magaun,” don.

¹⁵Odocob dana eu nuimei Juda dana maaden, “Me miten eu Jisas,” aden.

¹⁶Odocob Juda dana age Jisas uqa Juda agena cuha deelna eu odonnu aqati toodoin.

¹⁷Odocob Jisas uqa Juda dana maaden, “Ija Mei gaid cabi oloi, qila ha cabi ona eunu ija ha cabi odi ugina,” aden.

¹⁸Age madein, “Cuha deelna loo je gadac tefacdon eu himec qee, uqa ha madena, ‘Anut uqa ija Mei,’ ena eunu uqadodoc uqa Anutca ele ihocihoc biluwuna ena,” ein. Odi madecebnu age Jisas qocnu geh cisdoin.

¹⁹Eunu Jisas uqa Juda dana maaden, “Ija je mele maadigina, Anut Melah uqadodoc dih ceteh oso odocwe qee. Uqa Memige Anut oodon fena eu himec uqa odona. Memige Anut uqa Melahnu nalug mena. Uqa ceteteh cunug uqadodoc odona eu Melah ihacdona. Mele, age fimeig tumatumaoqagannu Memige Anut uqa ceteteh qila fegina eu ceteteh wooladec ihacdugian. Eunu Memige Anut odona eu himec Anut Melah odona.