San Juan 5:5-19

⁵Lady kchë meñ xsyaknë go no tu xaa nii kok kalyptsiipxon iz xsyaknë.

⁶Tsiñee lëë Jesús kon xaa, byeñ Jesús nii kok xtsele nix mbës xaa siko. Lëë Jesús chëb lo xaa: —¿Pe chakladzyoo kyakoo?

⁷Tsigo lëë xaa xsyaknë go chëb lo Jesús: —Xey, kindy cho ko naa leñ pily tsiñee lëë nis xni. Cad nii chakladzyaa sëëbaa, klol stu meñ xsyëëb.

⁸Tsigo lëë Jesús chëb lo xaa: —Kuxche, blis xtal aan kwsë.

⁹Wor go kazh lëë xaa go byak. Lëë xaa blis xta xaa aan lëë xaa bislo kwsë xaa. Per como mer tse nii xiladzy meñ Israel lo tsiiñ byak xaa,

¹⁰lëë bla meñ Israel chëb lo xaa: —Chakty tsiiñ natse. Chilody kyoyoo xtal.

¹¹Tsigo lëë xaa nii byak ko kwëb chëb: —Lëë xaa nii beeñ kyak naa në lon: “Blis xtal aan kwsë.”

¹²Tsigo lëë meñ Israel kwnabtiits chëb: —¿Cho në lool: “Blis xtal aan kwsë”?

¹³Per nandy xaa cho beeñ kyak xaa, porñee lëë Jesús kwnity lady meñ.

¹⁴Tsi lëë Jesús kon xaa leñ lidzy Dios, lëë Jesús chëb lo xaa: —Kon gaanoo lëël byak. Na kpikchedroo kuñoo tol tsiin ktsyooldyoo tu kyalnë nii mastre ntseeb.

¹⁵Tsigo lëë xaa nii byak ko kunitiits lo meñ Israel go nii lëë Jesús beeñ kyak xaa.

¹⁶Por ngo lëë meñ Israel go kwënal kuty Jesús porñee chuuñtsyey Jesús ngo tse nii xiladzy meñ lo tsiiñ.

¹⁷Per lëë Jesús chëb: —Tugak xkyë Tat Tios tsiiñ, nikle gaa naa tugak xkyën tsiiñ.

¹⁸Por ngo nii mastre kwyoki meñ Israel go kuty Jesús, porñee lëdy xaktyee tse nii xiladzy meñ lo tsiiñ xsaldy xaa, sink wi penak nii chakladzy xaa kak xaa sinak Dios tsiñee xñee xaa nii pxosy xaa nak Dios.

¹⁹Tsigo lëë Jesús chëb: —Nli xñen nii chilody kuuñtsyey Xiñ Dios nii klyaañtyee styoo xaa. Xaktyee nii chan xaa chuuñtsyey Tat Tios chuuñtsyey xaa. Kchësy nii chuuñtsyey Tat Tios chuuñtsyey Xiñ Dios.