Jon 4:3-29

³Jisasgo koneai augwali Farisi bagego te po odama, dwai homu yai. Tama tibaso, Jisas aga te Judia tǫ pedai taga pelama, te Galili tǫ pedaiba pai.

⁴Tama Godigo homu wali peyu, te tų Jisas aga pali tų te Samaria tǫ pedai tomoba pabo tų dao.

⁵Tama tilama, Jisas pelama, Samaria bagego hanuba sabolai, augwaligo te bulu nogi Sikar wali. Te tǫ te polobadu mu bidai bidi Jekopgo aga ogwa Josep mani tǫ te pąde tama dao.

⁶Ąį sabo tǫ dedage polobadu Jekopgo nigai, te bulude elalubuo. Jisas pelama, aga tigi dene baso, te ąį sabo tǫ dedage pąde dugulaluai. Te giliga tomo yagasobode.

⁷Jisas aga wali pabo bidi augwali te be nani nogi Sikarba pelama, nai abelegi pai. Tama Samaria we me deli asama, ąį tuagasu asai. Jisasgo te webolo po weyu, te po wai, “Aį ena mao, ena tueio,” te po wai, Jisasgo.

⁹Te Samaria we noma siyu, agai Jisasbolo te po wai, “Ya, nage Juda bidi dao, te ena Samaria we dao. Magi baso nago te po obawe, ‘Aį ena mao, ena tueio,’ magi basowe?” te Samaria wego te po wai, Jisas dali. (Magi basowe? Juda bidi dabe augwali Samaria bidi dabe dali kisasa gelasa bilibo menio.)

¹⁰Jisasgo te webolo po wei ponoyu, te po wai, “Nago te God agai te we bidibolo olo mabo nai konegi sogo da, tama ena mena bidigo nagebolo ‘Aį ena mao, ena tueio’ obao konegi sogo da, te si nago konegi sogo da, teda nago ena hanalu olama, eno nagebolo te bidabo bomo elalubo ąį mao wagi da,” Jisasgo te po wai.

¹¹Te wego Jisasbolo te po wai, “Genuai Bidio, nago ąį tuabo nai meni. Tama te ąį tubo dedage aba mu dao. Tama tiyu da, nago te bidabo bomo elalubo ąį menade saibawe?” te wego Jisas dali te po wai.

¹²“Dago wąį Jekopgo te ąį dedage dabolo polobadu mawai dao. Tama aga dali, aga wai dabe dali, aga kibu bulmakau sipsip dali tamago tuai ąį dao. Tialima, nago homu nago Jekop aga aiyaba elalualiwe?” te wego Jisas dali te po wai.

¹³Jisasgo po wei agabolo ponoyu, te po wai, “Tigidali bidi te ąį naga ede tuyu da, augwali ąį nogone ma yaibao.

¹⁴Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai.

¹⁵Tama te wego Jisasbolo te po wai, “Genuai Bidio, nago te ąį enabolo mao, tama nosali ena ąį nogone ma idalio, tama ena eba ąį ma tuagasidalio,” te Jisas dali Samaria wego te po wai.

¹⁶Jisasgo te webolo te po wai, “Nago bidibolo i wagi bilama, tama dage si eba asiąo,” wai.

¹⁷Wego po wei ponoyu, te po wai, “Ena bidi menio.” Jisasgo agabolo te po wai, “Nago ‘Ena bidi meni,’ obawe, te nago mu po wabuo.

¹⁸Magi basowe? Polobadu nago bidi a naga dao. Tama te bidi megi nage dali bidibo bidi da, te naga bidi menio. Nago po te mu tama dao,” Jisasgo te po te we dali wai.

¹⁹Wego Jisasbolo te po wai, “Genuai Bidio, megi eno koneanio, nage da te Godigo nosali yabo sę po ola mabo profet bidi deli dao.

²⁰Polobadu da Samaria dabego wąį dabe augwali te bulu duba sisinama, tama lotu po wai dao. Tialima, dage Juda dabego te po wabo dao, ‘Te tigidali bidigo lotu po wabo bulu te Jerusalemde, tede naga wao,’ dagego te po wabo dao,” te wego te po wai.

²¹Jisasgo te webolo te po wai, “Nago eno po mu po dao olama, konealuao. Me sogo deli pedaliyu, tama dagego te Ayabolo lotu po te bulu dude wagobeo. Tama dagego Jerusalem tede me lotu po wagobeo.

²²Dagego konesiąwai naibolo lotu po wabo dao. Da Juda dabe dago lotu po wabo da, te dago koneai bidibolo lotu po wabo dao. Magi basowe? Godigo we bidi ma sabo sę page te da Juda dabe tomode pedalaibao.

²³Tialima, te sogo pedaliyu da, megi tama pedalalio, tama tigidali bidigo lotu po mu wabo bidi dabe da augwali lotu po augwa mobo bidigo waibao, augwa dolo ebo kolesagago me lotu po waibao. Tama Aya Godigo te tobage bidi gegebo dao, agabolo lotu po omainogo.

²⁴God da, te mobo bidi dao. Tama bidigo agabolo lotu po weyu da, te bidigo aga mobo bidigo waibao, aga dolo ebo kolesagago me lotu po waibao,” Jisasgo te po wai.

²⁵Te wego agabolo te po wai, “Eno koneanio, Godigo sa muani bidi asaibao, augwali aga nogi Krais tama wai. Aga asobo sogo da, te agai dabolo tigidali naide po ola mawaibao,” wali.

²⁶Jisasgo te we agabolo te po wai, “Te ena tama dao, megi nage dali eno te po obao.”

²⁷Te Jisasgo te po obadi yaide, tama aga wali pabo bidi dabe augwali ma begasa asai. Tama augwali Jisasgo te Samaria we dali po mibo subaso, augwali noma sai. Tialima, bidi me deligo te webolo “Nage magi nai saiwe?” wabeo. Augwaligo Jisasbolo “Nage te we dali magi baso po obawe?” hanalu wabe.

²⁸Tama te wego te aga ąį tubo nai tagalama, tama te we aga hanuba ma pai. Tama te wego te we bidi dabe augwalibolo wagi peyu, te po wai.

²⁹“Dagego bidi me deli suagasiąo. Agai eno polobadu yali sę po tigidali enabolo wai. Te bidi te Godigo sa muani asaibao wali bidi Krais te yaliwe?” te wego te po te we bidi dabe dali wai.