Jon 4:19-35

¹⁹A ino i balu i lena, “Labino, uniri, a tasmani lena ui a poropet.

²⁰A kum tumtubu met tagun numugu det ser lotu torom o God una tangai ri, ikut mot a taro Juda mot watungi lena, din lotu torom o God sapat kut o Jerusalem.”

²¹Ra o Iesu i watungi tano lena, “Tama i, a lingmulusino ri an watungi tam, a du bung in nanpat, ra ka mot in lotu mo torom o Tita una tangai ri, ma sapat kai o Jerusalem, awu.

²²Mot a kum te Samaria ka mot tasman osi ra mot ser lotu toromi, ma met a taro Juda met tasmani ut osi ra met ser lotu toromi, uni a pinapam anun o God ra i ulaun a taro, i wanpat ut tagun a taro Juda.

²³A du bung in nanpat ma iri i sa wanpat, ra a kum tene lotu mulus det in lotu torom o Tita una nion ma una lingmulus. A kum ngas na tene lotu lenra, o Tita i nem doko det.

²⁴O God a nion. Det ra det ser lotu toromi, det in lotu ut una nion ma una lingmulus.”

²⁵Ra a ino i watungi tano lena, “A tasmani lena a Mesaia ra di watungi nama Karisito, in nanpat, ma in upuaso a kum utna rop torom dat.”

²⁶Ma o Iesu i balu i lena, “Iau ut ri, a wasiso torom ui.”

²⁷Una du bung ut ra, a kum nat na ususer anun o Iesu det milet melet. Det tama o Iesu i wasiso tomo nam ara ino, ra det kisin. Ikut katutaio tagun det i iting lena, “U nem asau?” o lenri, “Sur asau ra u wasiso tomo nami?”

²⁸A ino ra i wan pas gusun anun in nadanim, i milet melet utiro utamon, ra i inanos a taro tiro iai lena,

²⁹“Ai, mot iap, sur mot in tama ara musano, i inanos iau una kum utna rop ra a sa pam tari numugu. Kutiro i a Mesaia?”

³⁰Ra a taro ra, det wan pas gusun a tamon, ma det wan torom o Iesu.

³¹Ra a ino i sa wan taru, a kum nat na ususer det inanos dekdeki lena, “Tene Ususer, un nangon pas.”

³²Ikut o Iesu i balu det lena, “Anga utna na inangon kuri ut, ka mot tasmani.”

³³A kum nat na ususer det ting etetalai det lena, “Kutiro taio i sa tabor tari nam lako utna na inangon?”

³⁴O Iesu i watungi tandet lena, “Anga utna na inangon iri i, an pam sot pas a nemnem anun o naro ra i tulu ru iau urin, ma an urop anun a pinapam.

³⁵Mot ser watungi lenri, ‘A watnin kalang utmakai kura ra din pasong maragom.’ Ikut a watungi tamot lena: Mot in tamtama tokodos usa numugu, ma mot in tama a kum kinobot, det sa taka rop, ma i sa sot sur din pasong.