Jon 21:2-20

²I tapiek aragii: Saimon Pita, ke Tomas nenge asa sabin e Didimas, ke Nataniel tina Kana na Galili, ke iun kalalik ke Sebedi turan iu e kalalik na fafausum sabin tinaiwa.

³Saimon Pita ka fas ri aragii, “Ian la isi ubiin.” Ke ri ka fas u le, “Kemen la turam.” Ke ri ka wof na mon ma ri ka la. Isau le na wor ae, biil ri kep ti kok.

⁴Na biingbiing saksak, Iesu ka sotih na kiin, isau le berberat na fafausum, biil ri iliim u le i e Iesu.

⁵Ke ka tautau usuf ri aragii, “Foron talang, gam kep ti kok sabin?” Ri ka kiliis u le, “Biil.”

⁶Ke Iesu ka fas ri aragii, “Gamen lin ubiin kimi una baban mon na mia gam, isi gamek kep ti fal.” Aunbiing ri tel u arae, ke biil mang i fasih rin dat fafis ubiin, wara le i fuun kanaka e kok.

⁷Ke, kalalik na fafausum ae Iesu i ier kanaka isi, ka fas Saimon Pita le, “I sau e Kumguui!” Ma aunbiing Saimon Pita ka ongen u aragii le, “I sau e Kumguui,” ka kabet fafis kaen sabin ae i puk ufu tah aunbiing i lin ubiin, ke ka wof una dan.

⁸Fal e berberat na fafausum ri ka mih ini mon, ma ri ka date ubiin ae i fuun ini kok, wara le biil ri tapak una mas, i fasih sau aragii nenge mar e mita.

⁹Aunbiing ri masah, ri ka par nenge yiif i soksok la ini kumluut ma imel e kok lo ke ri ka par fal e beret sabin.

¹⁰Iesu ka tara sing ri aragii, “Kep ti fal e kok ae igii sau gam ubiin u uga.”

¹¹Ke Saimon Pita ka fen una mon ma ka dat famasah ubiin. I fuun ini piran kok, ma i fasih aragii nenge mar ini lim e sangful ini tuul. I fuun kanaka e kok, isau le ubiin biil i tamrabat.

¹²Iesu ka tara sing ri aragii, “Gam la ma gamek ien.” Foron berberat na fafausum tikii ri sokeh isi diik u le, “Wo seh?” Wara le ri ka usum tah le i e Kumguui.

¹³Iesu ka la, ka kep beret ke ka ta u usuf ri, namih ka kep kok sabin ke ka ta u usuf ri.

¹⁴Igii, fatuul u mang e aunbiing Iesu i tapiek sing berberat na fafausum kia, aunbiing i aptih fis tah tina minet.

¹⁵Aunbiing ri ka ien tikii tah, Iesu ka tara sing Saimon Pita aragii, “Saimon kalalik ke Jon, o ier kanaka tom isi iau lon fal igii?” Ke Pita ka kiliis u aragii, “Iuu, Kumguui, o usum le ia ier kanaka isi wo.” Iesu ka fas u aragii, “Fen foron natun sipsip kiak.”

¹⁶Iesu ka tara sabin sing i le, “Saimon, kalalik ke Jon, o ier kanaka tom isi iau?” Pita ka kiliis u aragii, “Iuu, Kumguui, o usum le ia ier kanaka tom isi wo.” Iesu ka tarah, “Parpar kale foron sipsip kiak.”

¹⁷Fatuul u e aunbiing, Iesu ka tara sing i le, “Saimon kalalik ke Jon, o ier kanaka tom isi iau?” Ka purngis e bala Pita, wara le Iesu ka diik u fatuul mang e aunbiing le, “O ier kanaka tom isi iau?” Pita ka tarah, “Kumguui, o usum na foron tier tikii, ma o usum le ia ier kanaka isi wo.” Ke Iesu ka tara sing i le, “Fen foron sipsip kiak.

¹⁸Tekentu kanaka ia fas wo, aunbiing ae o guam tah, o fakilkiliis fafis wo la tom ke o ka la una falifuh ae o ier le on la ulo, isau le aunbiing on tubunkak, on sawe iun limam, ke tikas keskes ik fakilkiliis wo, ma ik lame wo una falifuh ae biil o ier le on la ulo.”

¹⁹Iesu i use u aragii, una finngas matngan minet ae Pita in tafe u, isi ik ta memeh usuf God. Ke Iesu ka fas u aragii, “Mi lo iau.”

²⁰Pita ka giliim fis ma ka par kalalik na fafausum ae Iesu i ier kanaka isi, i mimih la lo ruh. I sau e ier ae i tan tah lo Iesu na aunbiing na inen turim ma ka tara le, “Kumguui, seh in ta ufu wo una liman tuui?”