Jon 10:28-37

²⁸Ija age cebac bilec catanec eu adigina. Age qee fadalowain. Oso uqa age ebeninadec qee cawaltiaun.

²⁹Mei uqa sipsip eu iten eu ceteh cunug wooldoc ben. Oso uqa Memige Anut ebennadec cawaladecwe qee.

³⁰Memige Anut ijaca ele osol,” aden.

³¹Odocob Juda dana age haun Jisas qoqan imeig meen cedi ahoin.

³²Odi oodogin Jisas haun maaden, “Ija age amagana Memige Anutna me odoc mati bahic odom. Cel odoc eundec osonu age ijanu madi, meenna qoqan, egina?” aden.

³³Odocob Juda age uqa jejeg hewi madoin, “Hina me odom eunu qee meenna qihuqaun qa hina Anut lelandogona! Hina dana oso himec qa hinadodoc hina Anut agana eunu meenna qiheqan!” doin.

³⁴Odocobil Jisas maaden, “Agena loo jena jaqec oso tawen eu odi Anut maden: ‘Age anut bilegina,’ en eunu dogina.

³⁵Anutna jaqec je madena eu mele gaid tawena eu doqona. Odocob Anut uqa dana uqana jaqec je aden eundecnu maden, ‘Age anut bilegina,’ en.

³⁶Memige Anut uqa ija qagu mitimei sulteceb mahana toni nem. Eunu age adi madegina, ‘Ija madigina, “Ija Anut Melah,” iginanu Anut lelandugina,’ egina?” aden.

³⁷“Ija Meina cabi oc qee odiginafi ijanu wawaga cain meleeiaun.